Read Rongmei Naga METTHIU 28 Bible Online

METTHIU 28 - Rongmei Naga bible

METTHIU 28

¹Sabbathneic tangv, neidak tuang reymei nungc khwanpaengc pat pwkhou Magadaleni Meri lev baihmei Meri tarou zauh khang tat the.

²Khoutei baengla daih zay the, kalam thu Poubauhmei tuang baanchara tingkauh thangc rui keyna ntauh tei luangc patlouna, mi ruc khou tei dungc the.

³Kazaw tingpalikmei riw kumc e khatni kapheybaan gunh kumc mphwan e.

⁴Rigaanvmei nunc tei kata pingna kadunh the khatni theic key the.

⁵Khoutei baanchara tei rui mi pui nei khou tei sa the, “Ping riu, kros khou thaengc luai kanmei Jisu ta tei nangney phu bam tuang e twmei ai thay e.

⁶Kamei mi khou hei bam mak khe, kamei rui saloumei kumcna kamei ringcthau kan the. Kata nziloupui bamv hei guang zauc o.

⁷Nangniw katumcna tat lana, ‘Kata tiringcthau kan the, kamei Galili thangc nangniw suangc tat hu kan puni the. Mi khou tei nangniw kata how puni the,’ twna kaziap nunc khou tei salou ti tho. Mi hei ai rui nangney khou kadyloumei tuang the.”

⁸Pingmei khatni neihlamei rui padikna, kaziap nunc khou dinclou khang kaney katumcna tarou bamv khou tei rui pak tat kan the.

⁹Zauclo, Jisu kaney ta ariwna, “Nangney khou chuzaenghmei nai diu,” twna sa the. Khoutei kaney kadaeng khou guangna kaphay sinna kalum the.

¹⁰Khoutei Jisu rui kaney khou sa the, “Ping riu; nangney tatna achana nunc ta tei Galili thangc guang tho twna salou o. Mi khou tei kaniw ata ariw puni the.”

¹¹Mi pui nei tei kaney tat nipui chaeng tat kan khou, rigaanvmei nunc gaanvsaekc kaidai khou gutna pat kanmei guayna tei amuh daihmei nunc khou salou the.

¹²Amuh daihmei nunc tei gaanvthaih nunc lev kaphianh lana syan rihmei nunc khou tei tiina,

¹³“‘Aniw zip kan khou zingbangc kaziap nunc guangna kata houc tat kan the,’ twna meic nunc khou sa o.

¹⁴Mi hei guanghkhyn rui chu pwsini, nangniw ping khang maek ge, aniw rui kata thu sa thimlou kan ni de,” twna sa the.

¹⁵Rigaanvmei nunc tei syan tei laa lana kaniw ta sa o twmei tei kumcna kaniw sa the, kumna mi pary hei Jihudimei pang khou ntaw nganvna mi hei kumcna rac bam e.

¹⁶Ziap ruhna khat tei Jisu rui kaniw ta guang o twna saloumei bamv Galili khou naimei chyngbut thangc tei tat the.

¹⁷Kata how pwkhou kaniw kata kalum the; tiki gaanvsaekc rui thu lwmsi the.

¹⁸Khoutei Jisu guangna kaniw khou sa the, “Tingpuk khatni kandih kapwm ruc khou ngamv akhou tiilou the.

¹⁹Hei zaeng rui, nangniw tatna zaatc kapwmna ta aziap kasiamh o: kaniw ta Pu, Nah Mpouh, khatni Bumaengh Nthanmei zanc khou duiluplou o;

²⁰ai rui nangniw khou tiilou kanmei latdanv guay tei piu khang kaniw khou nchamlou o. Kumna zauclo, kandih zuk luaimei nganv ai nangniw ta kaganv kathuic bam nduangh bam puni.”