Read Rongmei Naga METTHIU 3 Bible Online

METTHIU 3 - Rongmei Naga bible

METTHIU 3

¹Mi douc tei duiluploumei Jahon Judia tuang tazikramv khou guangna,

²“lungh laic tho, Ravguangc guangcdic ana the,” twna dinc the.

³“‘Poubauhmei guang pw the, kakhang chaeng sw tho, kakhang chaeng sw ntyng tho,’ twna gaanv khat tazikramv khou kauc bam e,” twna muhzwng Isaia rui saloumei tei kamei hei the.

⁴Jahon tei guaikuan hiw phey piu e, ramhgic bungkam kamc e, khatni nkav lev nwm khuaicdui rui kataek sw e.

⁵Jerusalem, Judia kapwm, khatni Jordan duiriang gaengv zaengv kapwm khou rui meic nunc kadaeng khou guang khwan e.

⁶Kaniw paap kalauhna, kaniw ta Jahon rui Jordan duiriang khou duiluplou khwan e.

⁷Pharisimei khatni Saddukimei meic mpeyna duiluplou khang guang bammei ta how la khou, Jahon rui kaniw khou sa the, “Nangniw nrui nac nunc! Guang nimei latzan khou rui pak la tho twna nangniw khou thow rui sa pwna cho?

⁸Nangniw tuang paap guay khou rui lungh laih the twmei taanv rui lyan pat ro.

⁹Aniw pu Abraham nai e guang nimei dandi khou rui duak puni de twna nangniw ning la riu. Mi ntauh guay ti hei Abraham nac nunc tiswlou nuh de.

¹⁰Ntaw ni thing bang guay bangbi khou nrih lou bam the, kumna kathai gaymei nthai makmei bang guay ta tei gai bauna mai khou phaiclou puni.

¹¹“Nangniw lungh laic the twmei ndauhna, ai rui nangniw ta dui rui luplou the. Tiki akhang suangc daihmeipu athei khou guang e; ai thu katuang phaythuapc na sini sin tat khang biuhmei hamh e. Kamei rui nangniw ta Bumaengh Nthanmei rui khatni mai rui luplou puni.

¹²Kabaanc khou nzamh sin e; kagung guay tei laudy bamv khou rui hun ganc puni. Katak guay tei saamh khou phungc guang puni; kagung guay tei amit dat makmei mai khou ntei puni.”

¹³Duilup khang, Jisu Galili khou rui Jordan khou, Jahon daeng khou guang the.

¹⁴Tiki Jahon rui kata khaamna, “Nang rui ata duiluplou khang diki, ai rui luplou khang guang tu cho?” twna sa the.

¹⁵Jisu rui mundawna sa the, “Ntaw thu nuhlou tho; mi hei kumcna ravchaptatmei taanv mung guay tei taanc nthuihlou nina di the.” Khoutei Jahon nuhlou the.

¹⁶Jisu tei duiluploupui lev, dui khou rui thau dat the. Khoutei tingkauh laanc pat the, kumna Ravguangc Bumaengc akhouhna kumcna keyna kakhou towloumei ta kamei how the.

¹⁷Khoutei tingkauh thangc rui, “Mi hei ai rui nzianmei alung kwnmei nac mpouh e,” twna khwan akhat rui sa the.