Read Rongmei Naga METTHIU 4 Bible Online

METTHIU 4 - Rongmei Naga bible

METTHIU 4

¹Mi tangv ravsic rui nthiam khang, Bumaengh rui Jisu ta tazikramv khou nduangh kulou khwan e.

²Kalaanv riakdei, zingbangc riakdei munthianghmei tangv, kamei ndaapc the.

³Khoutei nthiammeipu guangna kakhou sa the, “Nang Ravguangc nac mpouh e thei, mi tauc but nunc hei ntyan guanh khang sa tio.”

⁴Jisu rui mundawna sa the, “‘Ntyan na rui meic ringh mak ge, tiki Ravguangc mwang khou rui patmei lat guay tei rui ringh khang de’ twna hylouna nai e.”

⁵Mi tangv, ravsic tei rui kata nthanmei kaidai khou nduangh gutna ravkai twan pinh khou tidinglou the.

⁶Khoutei ravsic tei rui sa the, “Nang Ravguangc nac mpouh e thei, cham key o, ‘Nang phay na sini ntauh khou kadyang kasic mak khang, kaniw rui nang ta kapuanglou khang, kamei rui katuang baanchara nunc ta ndiulou puni,’ twna hylouna nai e.”

⁷Jisu rui kakhou sa the, “‘Nang Racguangc Poubauhmei ta nchanv lak nina e,’ twna ni hylouna nai e.”

⁸Ravsic tei Jisu ta kauh nganvmei chyngbut akhat khou nduangh kuna mbaanv guangcdic guay khatni mi tuang chingkhiuhmei guay lyanlou dat re.

⁹Kumna kamei rui, “Nang nkhum laamv keyna ata kalum e thei, mi guay hei nang khang tii puni,” twna kamei rui sa the.

¹⁰Khoutei Jisu rui kakhou sa the, “Tat kan o, Seitaan! ‘Nang Racguangc Poubauhmei ta kalum nina e, katuang siamruai na sw nina e,’ twna hylouna nai e.”

¹¹Khoutei ravsic tei Jisu ta mpatlou the, kumna kauh baanchara nunc guangna kasiamruai sw the.

¹²Jahon ta nym kan the twmei chu lana, Jisu Galili thangc tat dat kan the.

¹³Kumna kamei Nazareth mpatlouna, Zebulun khatni Naphtali ramv khou, zeihlat daeng khou naimei Kapharnahum kaidai khou guang lungc kan the.

¹⁴Hei tei muhzwng Isaia rui mi hei kumcna saloumei tei guang tangh khang e:

¹⁵“Zebulun ramv khatni Naphtali ramv, Galili duipui biak thangc, Jordan paengc thangc naimei, Zentelmei nunc bamv Galili!

¹⁶Zinghmei khou bammei nunc, gaanhriw daihmei how the. Theihmei lim kandic khou bammei nunc khang gaanclou the.”

¹⁷Jisu mi ganv khou tei rui thauna, “Nangniw lungh laic tho, tingkauh guangcdic ana the,” twna dinc thau the.

¹⁸Jisu Galili zeiclat paengc khou tat guang khou, Pitar twna kawmei Simon lev kakainac Andriu zeihlat khou tei chiakc phaic bammei ta how the. Kaney tei achuanh khwan e.

¹⁹Khoutei, “Athei lay o, ai rui nangney ta meic nymmei achuanc tiswlou puni,” twna Jisu rui kaney khou sa the.

²⁰Mi dyng khou tei kaney tuang chiakc guay ganclouna Jisu thei lay the.

²¹Mi khou tei rui tat pat dat pwkhou, baihmei chana gaanv nei—Zebedi nac Jakob lev kakainac Jahon, kapu Zebedi lev hih lungc khou kaniw chiak kasiamh bammei ta Jisu how the. Kumna Jisu rui kaney ta kaw the.

²²Mi dyng khou tei hih tei lev kaney pu ta ganclouna Jisu thei lay the.

²³Jisu tei sinagog guay khou nchamlouna, guanghdic tuang gaychamv dincna, khatni meic nunc tuang suan baengmei khatni sunu naunianmei guay tigaylouna Galili ramv kapwm khou ruanlou the.

²⁴Kachamv tei Suria kapwm khou chu lik the, kumna nnaumei guay, ravpuat kazaat baih baihmei khou rui sunu suan baengmei guay, ravsic gutmei, theilanhmei, khatni kapaek theihmei guay ta kadaeng khou phungc guang the, kumna mi guay tei kamei rui tigaylou the.

²⁵Galili, Dekapolis, Jerusalem, Judia khatni Jordan paengc khou rui meic kangdai Jisu thei lay the.