Read Rongmei Naga METTHIU 5 Bible Online

METTHIU 5 - Rongmei Naga bible

METTHIU 5

¹Jisu rui meic kangdai ta tei how lana, luanghbut khou ku the, kumna kamei dungckey kan pwkhou, kaziap nunc kadaeng khou guang the.

²Khoutei kamei rui kaniw khou nchamlouna sa the:

³“Bumaengh khou lungcsimei nunc tei zaenggaymei nunc e; tingkauh guangcdic hei kaniw khang e.

⁴Zaengsi bammei nunc tei zaenggaymei nunc e; kaniw ta swmlou puni.

⁵Lungh niamhmei nunc tei zaenggaymei nunc e; kandih hei kaniw laa puni.

⁶Ravchap tat khang ndaapc tari bammei nunc tei zaenggaymei nunc e; kaniw ta tipianlou puni.

⁷Zauzianthaymei nunc tei zaenggaymei nunc e; kaniw ta zauc-nzianlou puni.

⁸Lungh nthanmei nunc tei zaenggaymei nunc e; kaniw Ravguangc ta how puni.

⁹Chaguatpouc nunc tei zaenggaymei nunc e, kaniw Ravguangc nac sw puni.

¹⁰Ravchaptatmei khang rui raimei khaengv bammei nunc tei zaenggaymei nunc e; tingkauh guangcdic hei kaniw khang e.

¹¹“Azaeng rui luh kasicloumei, rai riumei khatni simei nkham ndamloumei ariwmei nunc tei zanggaymei nunc e.

¹²Neihla o khatni zaenggay o, kalam thu tingkauh thangc nangniw swan daic e. Nangniw hu khou lungclou kanmei muhzwng nunc ta ni hei tei kumcna sw kanmei tuang e.

¹³“Nangniw hei kandihmei khang ntey e. Tiki ntey tei nsamv kan e thei, akumhna mi ta tei tibumc dat nina cho? Hei tei ganclouna phay rui ni bin khang hamhna ramh baihmei khat na khang sini gaeng dat mak khe.

¹⁴“Nangniw mbaanv khang gaanhmei e. chyngbut ruc khou naimei kaidai tei nkamh ngam mak ge.

¹⁵Meic nunc rui maibungc daanclouna nggiuh rui gumbinlou mak ge tiki kahyang ruc khou louna kainung kapwm tigaanclou e.

¹⁶Hei tei kumcna, nangniw riw meic nunc hu khou tigaanc o. Kum pwkhou nangniw tuang gaymei taanv tei kaniw how lana tingkauh thangc bammei nangniw Pu hym tidaih khang e.

¹⁷“Ai hei Riakdanv khatni muhzwng nunc rui saloumei tei swmaan khang guang tuang e twna ning riu; hei tei swmaan khang ai guang tu hamh e, ti-nthuihlou khang de.

¹⁸Ai rui nangniw khou kaling siakna sa tuang e: Riakdanv khou hyloumei kapwmna tei tiguang tangc nthuih mak saanv,[1] mi khou tei hyloumei kahiak launa sini, tingpuk kandih maan mak saanv, maan ni tu hamh e.

¹⁹Riakdanv tuang nthyam liangmei latdanv akhat tei sini ngaek makpui mei khatni ngaek mak khang nchamloupui mei ta tei tingkauh guangcdic khou nthyam liangpui mei kaw puni, tiki mi latdanv guay tei piuna khatni nchamlouna bampui mei ta tei tingkauh guangcdic khou meicdaihmei kaw puni.

²⁰Hei zaeng rui, ai rui nangniw khou sa tuang e: nangniw tuang ravchaptatmei tei Pharisimei nunc khatni Riakdanv dinhpouc nunc tuang suangc mbu mak ge thei, nangniw tingkauh guangcdic khat sini gut ni tu hamh e.

²¹“‘Meicdow lak nina e, meicdowmei ruc khou latzan nai e,’ twna reydouc pupouh nunc khou salou kanmei tei nangniw thay the.

²²Tiki ai rui nangniw khou sa tuang e, kachana ruc khou lungh puamhpui mei[2] ruc khou latzan nai e. Kachana ta ‘Raka’ twna kawpui mei ta tei pei khou zay guang puni, khatni ‘Nang mpangmei’ twna sapui mei tei maikwam key puni.

²³Hei zaeng rui, nang tuang puatkat katlou khang nang ravchabamv khou guang bam khou, nang chana rui nang ruc khou lungh nuancloupui tuang naimei tei ningtow e thei,

²⁴nang tuang puatkat tei ravchabamv mav khou tei lou duc lana nang chana daeng thangc tatna kamei lev guatc sw rey o; mi tangv rui nang tuang puatkat tei guang kat dat ro.

²⁵“Thowkumhmei rui nang ruc khou latzankai khou lat phungclou e thei, latzankai ku tangh mak khou katumcna kamei lev guatc sw dat ro. Hamh e thei, nang ta latzanpouc khou tiilouna, latzanpouc rui khangtan khou tiilouna nang ta kangkai khou gut lou puni.

²⁶Ai rui nang khou kaling siakna sa tuang e: Nkhamhmei syankangh paek tei nganvna tii ti mak saanv nang mi khou tei rui pat dat ni tu hamh the.

²⁷“‘Lungcmaanv lak nina e’ twna samei tei nangniw thay the.

²⁸Tiki ai rui nangniw khou sa e: Ntumei akhat ta nthahmei mikzaw rui zauhpui mei tei kalung khou mi pui tei lev lungcmaanv tang the.

²⁹Hei zaeng rui, nang tuang nzat mik rui nang ta paapc tisw e thei, hei tei lat ganc o. Nang pumc kapwm tei maikwam khou phaicloumei suangc nang pumc nanw akhat maan kanmei tei rui nang khang gay e.

³⁰Nang tuang nzat baanc rui nang ta paapc tisw e thei, hei tei dan ganc o. Nang pumc kapwm maikwam tatmei suangc nang pumc nanw maanmei tei rui nang khang gay e.

³¹“‘Thow pw ni nowtaan e thei, nowtaanmei latrik hyna kanow khang tii nina e,’ twna ni sa e.

³²Tiki ai rui nangniw khou sa e: Lungcmaanvpui zaeng rui hamhna, nowtaanpui mei tei kanow ta lungcmaanv khang tiswlou e; kumna taanloumeipui ta tei kaw datmeipu tei ni lungcmaanvmei e.

³³“‘Nang saraamcna latryan sw lak nina e, nang rui Poubauhmei khou swlou kanmei latryan tei ngaek nina e,’ twna reydouc pupouh nunc khou salou kanmei tei nangniw thay the.

³⁴Tiki ai rui nangniw khou sa e: Nangniw syangdyng ding lak nina e. Tingkauh ta zay saancna ni ding riu, mi hei Ravguangc bamv e;

³⁵kandih ta ni zay saancna ding riu, mi hei kaphayba bamv e; Jerusalem ta ni zay saancna ding lak nina e, mi hei Guangh Daihmei tuang kaidai e.

³⁶Nang py ta zay saancna ni syangdyng ding lak nina e, nang rui nang sam lu akhat na ta sini sw mphwan ni sw mphwan ngam mak, sw miw ni sw miw ngam mak ge.

³⁷‘Kum ni’ tw e thei ‘kum ni’ twna taan o; ‘kum lak ge’ tw e thei ‘kum lak ge’ twna taan o. Mi khou rui twanmei guay tei simeipu khou rui e.

³⁸“‘Mik akhat khang mik akhat, huh akhat khang huh akhat’ twna samei tei nangniw thay the.

³⁹Tiki ai rui nangniw khou sa e: Meicsimei ta akhangv riu. Nang biangc nzat biak kaphi pw e thei, mbai biak ni nzuhlou tio.

⁴⁰Nang ta latzankai khou phungc kuna nang tuang thiula asut khang sw pw e thei, kakhang nang tuang phey ni tii tio.

⁴¹Nang ta mail akhat tat khang nym zay pw e thei, kamei lev mail kanei tatlou tio.

⁴²Nang khou ney pw e thei tii tio, pou khang ney pw e thei tipoulou tio.

⁴³“‘Nang tuang kaining kaigeimei ta nzian nina e, nang ta zauczihmei ta karaeng nina e,’ twna samei tei nangniw thay the.

⁴⁴Tiki ai rui nangniw khou sa e: Nang ta zauczihmei ta nzian nina e khatni nang ta sw kasicpui mei khang tei huayneylou nina e.

⁴⁵Mi hei kumcna nangniw tingkauh thangc bammei nangniw Pu nac nunc sw khang e. Kalam thu kamei thu meicsimei khou ni, meicgaymei khou ni katuang neicmik tisouclou e, ravchaptatmei khou ni, ravchap tat makmei khou ni ting tiriulou e.

⁴⁶Nangniw ta nzianmei ta na nangniw nzian e thei, nangniw khang tabui swan naina cho? Dihkhav kakhamei nunc sini kaniw ta nzianmei ta thu nzian muay de.

⁴⁷Nangniw pam ta na nangniw zaw gaanc riu e thei, meic baihmei suangc nangniw tabui mbu tuang naina cho? Zentelmei nunc ni hei tei thu sw muay de.

⁴⁸Tingkauh thangc bammei nangniw Pu nthuihmei kumcna nangniw ni nthuih nina e.”