Read Rongmei Naga METTHIU 6 Bible Online

METTHIU 6 - Rongmei Naga bible

METTHIU 6

¹“Nangniw tuang ravchaptatmei taanv tei meic nunc rui how khang rui taanc lyan mak khang ramhthay o. Mi kumcna taanc e thei, tingkauh thangc bammei nangniw Pu khou rui nangniw swan laatow ni tu hamh e.

²“Lungcsimei nunc khang nang rui tii patpui ganv khou, gaylwn swmei nunc rui meic nunc rui thuanclou pw khang rui sinagog khou khatni chaengdai khou sw lyanmei tei kumcna nang sw riu. Ai rui nangniw khou kaling siakna sa tuang e: kaniw tuang swan kaniw laa tang the.

³Nang rui lungcsimei khang tiipui ganv khou, nang tuang nzat baanc rui tiimei tei mbai baanc ta tithay riu;

⁴nang rui tiimei tei meic baihmei khou tithay khang hamh e. Kum pwkhou, meic thay makna taanhmei tei thaymei nang Pu rui nang khang swan tii puni.

⁵“Nangniw huayneypui ganv khou, gaylwnswmei nunc tei kumh riu; kalam thu kaniw tei meic nunc rui how khang sinagog khou khatni meic geihmei chaengdai kwn kwn khou dingna huayney nii e. Ai rui nangniw khou kaling siakna sa tuang e: Kaniw tei kaniw tuang swan laa tang the.

⁶Tiki nang huayneypui ganv khou, nang kai lungc khou gutna kaikhamv mbanghlouna, mik rui how makmei nang Pu khou huayney o. Kum pwkhou, meic thay makna taanhmei ta howmei nang Pu rui tiilou puni.

⁷“Kumna nangniw huayney khou, Zentelmei nunc rui kabah maekmei lat kaluaih kaluaihna suaic bammei tei kumcna sw riu;

⁸kalam thu nangniw ney mak khou rui nangniw khang kage naimei tei nangniw Pu rui thay rey bam tuang de.

⁹“Hei zaeng rui, mi hei kumcna huayney o: ‘Tingkauh thangc bammei aniw Pu, nang zanc nthanmei sw diu;

¹⁰Nang guangcdic guang diu, tingkauh thangc kumc kandih khou ni, Nang ningmei sw diu.

¹¹Aniw khang neih khat khang biuhmei taektw aseic[3] tiilou o.

¹²Aniw rui aniw khou nkhuailoumei nunc khuay kuakloumei kumcna, aniw khuay kuaklou o.

¹³Aniw ta nthiammei khou zaylou rio, tiki simeipu khou rui gaeklou o.’[4]

¹⁴“Kalam thu meic nunc rui nangniw khou nkhuailoumei tei nangniw rui kuaklou e thei, tingkauh thangc bammei nangniw Pu rui ni nangniw khuay kuaklou puni.

¹⁵Tiki nangniw rui meic nunc khuay kuaklou mak ge thei, nangniw Pu rui ni nangniw khuay kuaklou lak ge.

¹⁶“Nangniw munthiangh khou, gaylwn swmei nunc kumcna nchung suipui lwn sw riu. Kalam thu kaniw munthiangc e twmei meic nunc thay kan diu khang kaniw sw e. Ai rui nangniw khou kaling siakna sa tuang e: Kaniw thu kaniw tuang swan laa tang the.

¹⁷Tiki nang munthiangh khou, nang py thauh tey o khatni nang zaw phi o.

¹⁸Kum pwkhou, nang munthiangc e twmei meic nunc khou lyan makna, tiki mik rui how makmei tingkauh thangc bammei, meic thay makna taanhmei guay howmei nang Pu rui nang taanv thai tiilou puni.

¹⁹“Nangniw nthumc rui, sauhmei rui, khatni kaihouhmei rui sw maanpui bamv mi kandic khou hei nangniw khang lanv ry riu.

²⁰Tiki nthumc rui, sauhmei rui, khatni kaihouhmei rui swmaan dat makpui bamv tingkauh thangc nangniw khang lanv ry o.

²¹Kalam thu nang tuang lanv naipui bamv khou tei nang lung ni nai puni.

²²“Mik hei meic pumc tuang thaucmai e. Nang mik gay ti thei nang pumc kapwm gaanc kah ka puni.

²³Tiki nang mik si ti thei nang pumc kapwm zingh zing puni. Hei tei kumcna nang khou naimei gaanhmei tei zingc e thei nang pumc tei adih zingc puni tha!

²⁴“Meic gaanv khat na sini kaipouc kanei bangc sw nuh mak ge. Kamei rui gaanv khat ta nzian e thei, gaanv khat ta karaeng puni. Hamh e thei gaanv khat ta kungc e thei, gaanv khat ta ntaamv puni. Nangniw syan lev Ravguangc bangc sw kariu nuh mak ge.

²⁵“Hei zaeng rui nangniw khou sapui tuang e: Nangniw ringh khang tu zangv khang rui khatni nangniw pumc khang nsuay mbaanv khang rui lungh katuakc bam riu. Ringhmei hei taektw khang suangc nthuk mak nah cho khatni meic pumc hei pheybaan khang suangc nthuk mak nah cho?

²⁶Kauh samhmei nruayna nunc ta tei zauc o. Kaniw nap lingh mak ge, lau tay mak ge, saamh naina ni lou mak ge; tiki tingkauh thangc bammei nangniw Pu rui kaniw ta titu nggu bam e. Nangniw thu nruayna khang suangc kunghmei hamh nah cho?

²⁷Thow tei lungh katuakcmei rui kapanty chowbuk akhat na sini tisaengc[5] ngammei naina cho?

²⁸“Tabui swna nangniw pheybaan khang lungh katuakc bam tu cho? Ramvpuk khou thau bammei mwnpwang guay ta tei kakhanh zauc o. Kaniw phey langh taanh mak ge.

²⁹Tiki ai rui nangniw khou samei tuang e: Lungcgay chingkhiuhmei Guangh Solomon sini mi pwang tei kumcna karuh tangc kan mak ge.

³⁰Aseic na thaulouna nthuanh mai khou phaiclou kan nimei bang ta sini Ravguangc rui mi kumcna karuhlou e thei, he lwmmei nthyammei thiu, mi khang tei suangc nangniw ta thu mbuna karuhlou pw lak nah cho?

³¹“Hei zaeng rui, ‘Aniu tabui tu nina cho?’, ‘Tabui zangv nina cho?’, hamh e thei ‘Tabui nsuay mbaanv nina cho?’ twna lungh katuakc bam riu.

³²Zentelmei rui mi guay ti hei phu e. Mi guay hei nangniw khang kage nai e twmei tingkauh thangc bammei nangniw Pu rui thay e.

³³Tiki Ravguangc guangcdic khatni katuang ravchaptatmei tei phu rey o, kum e thei mi guay hei ni nangniw khang tii puni.

³⁴Hei zaeng rui nthuanh khang rui lungh kadan riu; kalam thu nthuanh rui nthuanh khang kadan puni. Tingmik akhat tuang kadanmei tei mi tingmik khang tei biuc the.”