Read Rongmei Naga METTHIU 9 Bible Online

METTHIU 9 - Rongmei Naga bible

METTHIU 9

¹Jisu hih tuangcna zeihlat tei kaan pat datna karamc kaidai[7] khou guang dat the.

²Khoutei meic gaanvsaekc rui kapaek theihmeipu gaanv khat ta kazy khou nzilouna Jisu daeng khou puanc guang khwan e. Jisu rui kaniw ramlum tei how la khou, kamei rui kapaek theihmeipu khou tei, “Abungle, ping dat ri tho, nang paap guay kuaklou the,” twna sa the.

³Mi khou tei, Riakdanv dinhpouc gaanvsaekc rui kaniw rana kaniw khou, “Mi pu hei Ravguangc ta ramhsak makpui lat sa e!” twna sa the.

⁴Kaniw lungning tei thay lana, Jisu rui sa the, “Tabui swna nangniw lung khou simei lungning kakhanh bam tu cho?

⁵‘Nang paap guay kuaklou the,’ twna samei chiw ni, ‘Thauna tat tho,’ twna samei chiw cho? Meic

⁶Nac Mpouh khou hei paapc kuaklou khang kandih khou ngamv nai e twmei nangniw thay khang lyanlou puni,” khoutei kamei rui kapaek theihmeipu khou tei, “Thau tho, nang tuang zybam lai thauna nang kai thangc tat tho,” twna sa the.

⁷Mi pu tei thauna kakai tat kan the.

⁸Meic kangdai tei hei tei how la khou, kaniw khou pingmei padik the, kumna mi kumhmei ngamv hei maansei nunc khou tiiloumei Racguangc ta kaniw thuanc the.

⁹Jisu mi bamv khou tei rui tat pat khou, kazanc Metthiu kawmeipu dihkhav laamei bamv khou dungc bammei ta how lana, “Athei lay o,” twna sa the. Metthiu thauna kathei lay the.

¹⁰Jisu mi pu kai[8] khou tei kaziap nunc lev nap tu bam khou, dihkhav kakhamei nunc khatni paapcmei nunc mpeyna ni guangna tu nchamc bam khwan e.

¹¹Hei tei Pharisimei nunc how lana, kaniw rui Jisu ziap nunc khou, “Tabui swna nangniw tuang kaipouc hei dihkhav kakhamei nunc khatni paapcmei nunc lev tu kariu bam tu cho?” twna sa the.

¹²Hei tei chu lana, Jisu rui sa the, “Karav gaymei nunc khang thu ravtow amuc kage maek ge, nnaumei nunc khang de.

¹³‘Ai rui kahawmei thu zauzian ta de, khaengmei ta hamh e,’ twmei kabac hei kathai tat ro. Kalam thu, ai guangmei hei ravchaptatmei nunc ta kaw khang hamh e, paapcmei nunc ta kaw khang de.”

¹⁴Mi tangv tei, Jahon ziap nunc guangna, “Aniw khatni Pharisimei nunc thu munthiangc bam ki, tabui swna nang ziap nunc thu munthiangh mak tu cho?” twna Jisu khou thanv the.

¹⁵Khoutei Jisu rui kaniw khou sa the, “Akumhna nowsuanh gin nunc tei, nowpouc bam khou latlu bam nina cho? Nowpouc ta tei kaniw khou rui laa tat kanmei ganv guang puni. Mi tangv thu kaniw munthiangc puni.

¹⁶“Meic gaanv khat na rui sini phey raan khou phey thanh khuamlou mak ge. Kalam thu phey thanh tei rui zay kaek kasic ranvlou puni.

¹⁷Ramh gic muanc raan khou ni drakha zouc thanh lou mak ge. Hei tei lou ti thei, muanh tei puak bakna drakha zouc tei maan puni, kumna muanh tei ni sw kasic puni. Tiki muanh ni drakha zouc ni maan mak khang drakha zouc thanh thu muanh kathanc khou lou tuang de.”

¹⁸Jisu mi lat hei sa bam khou, sinagog tuang kapy swmei gaanv khat guangna, Jisu hu khou khuksun keyna, “Anac aluhpui ntaw na hei theic nina bam the. Nang guangna karuc khou nang baanc kabouclou o. Kum ti thei kamei ringc dat puni de,” twna sa the.

¹⁹Khoutei Jisu ding thauna kathei lay tat the, kumna kaziap guay ni lay tat the.

²⁰Khoutei, tingkwm ruhna kanei zeina bammeipui gaanv khat Jisu thei khou guangna katuang phey tin kahi the.

²¹Kalam thu, “Katuang phey tei kahilou rap ti thei, ai gay dat rap puni de,” twna kamei ning the.

²²Khoutei Jisu kathei karih pat pwkhou kata how lana, “Alucle, nang ramlum rui nang ta tigaylou the,” twna sa the. Mi dyng khou tei mi pui tei gay dat kan the.

²³Jisu sinagog tuang kapypu kai khou tei gut pwkhou, alim muanmei nunc khatni meic kangdai kachin karo bammei ta how lana,

²⁴“Nangniw tat pat kan o. Mi nac hei theih mak ge; zip bam tu de,” twna sa the. Khoutei kaniw kata nuic the.

²⁵Meic nunc ta tei mpaeng thangc tipat lana, kamei kainung khou gutna mi nac baanc tei zay the. Khoutei mi nac tei thau the.

²⁶Mi chamv hei, mi ramv kapwm khou tei chu lik kan the.

²⁷Jisu mi khou tei rui tat pat dat khou, mik tiatmei gaanv nei kathei lay tatna, “Aney ta zauc nzianlou o, he David nac mpouh!” twna kauc the.

²⁸Jisu kainung gut pwkhou, mik tiatmeipu nei tei kadaeng khou guang the. Khoutei Jisu rui, “Ai rui nangney ta tigaylou ngam puni de twmei nangney lwm dai?” twna Jisu rui thanv the. “Ngguay, Poubauhmei,” twna kaney rui daw the.

²⁹Khoutei kabaanc rui kaney mik khou kahilouna, “Nangney rui lwmmei thei layna how dat tho,” twna sa the.

³⁰Khoutei kaney mik rak pat the. “Mi hei meic gaanv khat na khou sini tithay nuh mak ge,” twna Jisu rui kaney khou kadylou the.

³¹Tiki kaney tat pat lana mi ramv kapwm khou tei Jisu chamv dinc liklou the.

³²Mi pu nei tei tat dat kan khou, ravsic gutmei, lat sa thay makmeipu gaanv khat ta Jisu daeng khou nduangh guang khwan e.

³³Kumna ravsic ta tei nthau ganclou pwkhou, lat sa thay mak bammeipu tei sa dat the. Meic kangdai tei ngakna “Isarael khou mi kumhmei hei pat zat mak he,” twna sa the.

³⁴Tiki, “ravsic guay kaipouc ngamv khou rui kamei rui ravsic nunc ta nthau pat tu de,” twna Pharisimei nunc rui sa the.

³⁵Jisu kaidai guay khatni namv guay khou tat liklou khwan e. Kamei kaniw tuang sinagog guay khou nchamlouna, guanghdic tuang gaychamv dinclou khwan e, khatni ravpuat phunghmei khatni nnaumei nunc ta tigaylou khwan e.

³⁶Kamei rui meic kangdai ta tei how pwkhou kaniw ta ningngam mak khe, kalam thu gaengcloumei maekmei lauziu nunc kumcna kaniw lak the khatni ramh sw la khang thay mak khe.

³⁷Khoutei kamei rui kaziap nunc khou sa the, “Lau tay khang thu geic the, tiki tay nimei mei thu rau the.

³⁸Hei zaeng rui, lau taymei nunc laupuk khou ndiulou khang laupouc khou ney o.”