Read Rongmei Naga MARK 1 Bible Online

MARK 1 - Rongmei Naga bible

MARK 1

¹Ravguangc Nac Mpouh[1] Jisu Khrista tuang gaychamv kahouhmei:

²“Zauclo, nang khang chaeng sw khang ai rui atuang latdiumei ta nang hu khou ndiulou e; ‘Poubauhmei guang pw the, kakhang chaeng sw tho; kakhang chaeng sw ntyng tho,’ twna gaanv khat tazikramv khou kauc bam e!” twna muhzwng Isaia rui hylou e.

⁴Mi thei tei layna Duiluploumei Jahon[2] tei tazikramv khou guangna paapc guay kuaklou khang lungh laicna duilupmei lam khou kauc ndauh bam khwan e.

⁵Khoutei Judia tuang ramv kapwm khatni Jerusalem khou rui meic naina kadaeng khou guang khwan e. Kumna kaniw paap guay kalauhna Jahon rui kaniw ta Jordan duiriang khou duiluplou bam khwan e.

⁶Jahon tei guaikuan hiw phey piu khwan e, guaih gic bungkam kamc khwan e, khatni nkav lev nwmbangc khuaic dui rui kataek sw khwan e.

⁷Khoutei, “Akhang suangc ngamv daihmeipu gaanv khat athei khou guang e, ai thu nkhum keyna katuang phaythuapc riang rih khang na sini biuhpui mei hamh e.

⁸Kamei rui nangniw ta Bumaengh Nthanmei rui luplou puni,” twna kauc ndauh bam khwan e.

⁹Mi ganv khou tei Jisu Galili tuang Nazareth khou rui guang the, kumna Jahon rui kata Jordan duiriang khou duiluplou the.

¹⁰Kamei dui khou rui ku dat rappui dyng khou tingpuk kakhak patna Bumaengh akhouhna kumcna kakhou keyloumei ta kamei how the.

¹¹Khoutei, “Nang hei ai rui nzianmei Nac Mpouh e; nang ta alung kwn the,” twna tingkauh thangc rui sa key the.

¹²Mi dyng khou tei Bumaengh tei rui kata tazikramv thangc ndiu pat the.

¹³Kamei tazikramv khou tei, Seitaan rui nchanvna zaeng riakdei bamlou khwan e; kamei nwmbangc khouringc nunc lev bamlou khwan e; khatni kauh baanchara nunc rui kasiamruai swlou khwan e.

¹⁴Jahon ta nym kanpui tangv, Jisu Galili khou Ravguangc tuang gaychamv dinc guang the.

¹⁵“Kating tangc the, kumna Ravguangc guangcdic guang the, nangniw lungh laic tho, kumna gaychamv khou lwmlou tho,” twna dinc the.

¹⁶Jisu Galili zeiclat paengc khou tat pat khou, Simon lev kakainac Andriu zeihlat khou tei chiakc phaic bammei ta how the. Kaney tei achuanh khwan e.

¹⁷Khoutei Jisu rui kaney khou, “Athei lay o, ai rui nangney ta meic nymmei achuanc tiswlou puni,” twna sa the.

¹⁸Mi dyng khou tei kaney tuang chiak guay ganclouna Jisu thei lay the.

¹⁹Kumna kamei tat pat kasuanh khath tw dat pwkhou Zebedi nac mpouh Jakob lev kakainac Jahon ta how the. Kaney tei hih khou chiakc kasiamh bam khwan e.

²⁰Mi dyng khou tei Jisu rui kaney ta kaw the. Khoutei kaney pu lev taanv phihmei nunc ta tei hih khou tei ganclou ducna Jisu thei lay tat the.

²¹Mi tangv kaniw Kapharnahum kaidai khou gut the. Kumna Sabbathneic guang pwkhou, Jisu sinagog khou gutna nchamlou the.

²²Kamei rui nchamloumei khou tei kaniw ngak the, kalam thu Riakdanv dinhpouc nunc kumh makna, ngamv naipui mei akhat swna kamei rui nchamlou the.

²³Nthan makmei bumaengc gutmei gaanv khat mi sinagog khou tei bam khwan e.

²⁴Kumna kamei rui kaucna sa the, “Nazarethmei Jisu, nang aniw lev tabui tuang sw khang naina cho? Nang aniw ta swmaan khang guang tu cho? Ravguangc tuang Nthanmeipu, nang thow cho twmei ai thay e.”

²⁵Khoutei Jisu rui kata luhna, “Reih rei bam o, nang kakhou rui tat pat kan tho!” twna sa the.

²⁶Khoutei nthan makmei bumaengc tei, mi pu ta tei titheilanc keylouna, kauc ranvna kauclouna kakhou rui tat pat kan the.

²⁷Khoutei meic nunc tei ngak the, kumna kaniw kaphianhna mi kumcna sa the: “Mi hei tabui tuang cho? Riakdyn thanh! Kamei rui ngamv kazauhna nthan makmei bumaengc ruc khou nganvna latdanv tii e, kumna kaniw piu e!”

²⁸Kumna asaanh mak khou kachamv tei Galili gaengv zaengv kapwm khou zin lik kan the.

²⁹Kaniw sinagog khou tei rui patna Jisu Jakob lev Jahon ta nduanghna nzut phutna Simon lev Andriu kai thangc tat the.

³⁰Khoutei Simon now pui ravmancna zip bam khwan e, kumna Jisu guang tanghpui lev mi pui lam tei salou the.

³¹Jisu kadaeng khou guangna kabaanc sinna kata zay thau the. Khoutei kamei ravmanc bammei tei kakhou rui tat kan the. Kumna kamei rui kaniw tuang siamruai sw the.

³²Neih keyna zingc key pwkhou nnaumei nunc khatni ravsic gutmei nunc ta Jisu daeng khou laaguang the.

³³Kumna mi kaidai mei guay tei rui kaimun khou guang bam padik the.

³⁴Khoutei kamei rui ravpuat kazaat baic baicna nnaumei mpeyna ta tigaylou the, khatni ravsic mpeyna ta nthau ganclou the. Kamei rui ravsic nunc ta tei lat sa khang nuhlou mak ge, kalam thu kaniw kata thay e.

³⁵Jisu laukhwan khwanzingh tinggaanc riu mak khou rui thauna rimh rimpui bamv thangc tat patna huayney the.

³⁶Khoutei Simon khatni kapammei nunc rui Jisu ta suic tatna kata ariw pwkhou,

³⁷“Meic guayna nang ta phu bam e,” twna kakhou sa the.

³⁸Khoutei kamei rui kaniw khou sa the, “Aniu baih baihmei kaigeimei kaidai guay khou ni ai chamv dinh khang tat kho. Kalam thu mi khang rui ai guang tuang e.”

³⁹Kumna kamei kaniw tuang sinagog guay khou chamv dinclouna khatni ravsic alay ganclouna Galili ramv kapwm khou tatlou the.

⁴⁰Mphaanhmei gaanv khat Jisu daeng khou guangna khuksun keyna zaenghuayna, “Nang rui ata sw nthanlou[3] ni tw e thei, nang ata sw nthanlou ngam de,” twna sa the.

⁴¹Khoutei Jisu kalung khou nzianmei padik the,[4] Kumna kabaanc haamv patna kata kahina sa the, “Ai nuh the, nang nthan tho.”

⁴²Mi dyng khou tei mphaanhmei ravpuat tei kakhou rui tat pat kan the.

⁴³Khoutei Jisu rui kakhou chariakhpui lat salou lana kadyng khou thouc ganc kan the.

⁴⁴“Nang meic gaanv khat na khou sini mi hei raclou nuh mak ge, tiki nang ta amuh khou lyan tat tho, kumna nang nthan the twmei kaniw khou lyan khang Mousi tuang latdanv thei layna puatkat kat tho,” twna kadylou the.

⁴⁵Tiki kamei tat patna rac lik sikh sik thau the. Kumna mi chamv tei zin lik thau the. Kum tina kamei kaidai khou ndauhna gut dat ngam mak khena kaidai paengc thangc meic maekpui bamv khou bam the. Kumna kabamv kathuic khou rui meic nunc kadaeng khou guang bam khwan e.