Read Rongmei Naga MARK 10 Bible Online

MARK 10 - Rongmei Naga bible

MARK 10

¹Jisu mi bamv tei mpatlouna, Judia ramv thangc tat the. Kumna Jordan duiriang kaan pat the. Mi khou tei ni meic kangdai kadaeng khou huamc guang dat khwan the. Mi khou tei ni kamei rui kaniw khou nchamlou dat khwan e.

²Khoutei Pharisimei nunc Jisu daeng khou guangna kata nchanvna, “Meic gaanv khat rui now mumei hei Riakdanv thei layna nuh daih cho?” twna thanv the.

³Khoutei mundawna Jisu rui kaniw khou sa the,

⁴“Mousi rui nangniw khou tabui kumhna sa bu cho?” Khoutei kaniw rui sa the, “Mousi rui thu nggaanvmei rui kanow ta mulou the twmei latrik hyna nsinlouna mu ganc khang nuhlou e.”

⁵Khoutei Jisu rui kaniw khou sa the, “Nangniw lungning tanc tipui zaeng rui, kamei rui mi riak hei nangniw khang rui hylou tuang e.

⁶Tiki puakthau puaksiak khou Ravguangc rui kaney ta ntumei khatni nggaanvmei swna damclou the.

⁷Hei zaeng rui nggaanvmei rui kapui kapu ta ganclouna kanow lev kariu nina e,[18]

⁸kumna gaanv nei tei akhat sw puni. Kumna kaney tei kanei hamh the, akhat di the.

⁹Hei zaeng rui Ravguangc rui tikariulou kanmei ta tei maansei rui sw ntamv dat lak nina e.”

¹⁰Kaniw kai khou bam dat khou, Jisu khou kaziap nunc rui mi lam khou hei thanv khwan e.

¹¹Khoutei Jisu rui kaniw khou sa the, “Thow pw ni kanow ta mu ganc lana baihmei ta kaw datpui mei tei kanow ma nymna lungcmaanvmei e;

¹²khatni ntumei akhat rui kagaanv ta mu gancna baihmei now sw dat re thei kamei lungcmaanvmei e.”

¹³Kumna Jisu rui kahilou khang meic nunc rui alauc nunc ta kadaeng khou nduangh guang geic khwan e. Khoutei kaziap nunc rui kaniw ta luh khwan e.

¹⁴Jisu hei tei how lana kalung puamc the, kumna kaniw khou sa the, “Alauc nunc ta tei adaeng khou tiguang o, kaniw ta khaam riu. Ravguangc guangcdic kiu mi kumhmei nunc khang e.

¹⁵Ai rui nangniw khou kaling siakna sa tuang e: Thow pw ni Ravguangc guangcdic tei alaucna kumcna laalou mak ge thei, mi khou tei kamei gut zat ni tu hamh e.”

¹⁶Khoutei kamei rui alauc nunc ta puanc thauna kaniw kathuic khou kabaanc bouclouna suaihiamlou the.

¹⁷Mi tangv Jisu chaeng kaamv akhat khang tat pat khou, meic gaanv khat pak guangna kahu khou khuksun keyna, “Meicgaymei dinhpouc, ringcsuangmei laa khang ai tabui tuang sw nina cho?” twna thanv khwan e.

¹⁸Khoutei Jisu rui kakhou sa the, “Tabui swna ata meicgaymei kaw tu cho? Meicgaymei khat sini maek ge; Ravguangc na de gaymei.

¹⁹Riakdanv guay: ‘Meic dow lak nina e, Lungcmaanv lak nina e, Kaihouc lak nina e, Saraamhmei sakhi tii lak nina e, Meicguat lak nina e, Nang pui nang pu ta chakhwang sw nina e,’ twmei guay hei nang thay the cho!”

²⁰Khoutei, “Dinhpouc, mi guay hei ai alauc khou rui ngaek bam di the,” twna sa the.

²¹Khoutei Jisu rui kata zauc pwkhou nzian the, kumna kakhou sa the, “Nang khou ntangh mak tuang akhat nai e: Nang tuang naimei guayna zuancna lungcsimei nunc khang tii tio, tingkauh thangc nang tuang lanv nai puni; kumna guangna athei lay o.”

²²Mi lat tei chu pwkhou kazaw kamv meih mei key the, kumna kalung ryanrana tat pat kan the. Kalam thu katuang lanv mpeyna nai khwan e.

²³Khoutei zauc kari kariangna, “Lungcgaymei nunc Ravguangc guangcdic gut khang adih kungc puni cho!” twna Jisu rui kaziap nunc khou sa the.

²⁴Mi lat tei chu pwkhou, kaziap nunc tei ruph rup the. Khoutei Jisu rui kaniw khou sa dat re, “Alaucthiu, Ravguangc guangcdic gut khang chiwmei tuang hamh e!

²⁵Lungcgaymeipu rui Ravguangc guangcdic khou gutmei suangc thu guaikuan rui mpinh mai khou gutmei rui chiw e.”

²⁶Khoutei kaniw tei ngakna, “Kum e thei thow rui kanloumei laa ngam nina cho?” twna kakhou sa the.

²⁷Khoutei kaniw ta zaucna Jisu rui sa the, “Mi hei maansei khang ngam lakmei tuang bam sini Ravguangc khang thu ngam mak tuang maek ge. Ravguangc thu ngam tu rana de.”

²⁸Khoutei, “Zauclo, ramh guayna ganclouna aniw nang thei lay the,” twna Pitar rui Jisu khou sa the.

²⁹Mundawna Jisu rui sa the, “Ai rui nangniw khou kaling siakna sa tuang e: Thow pw ni akhang rui khatni gaychamv khang rui kakai kalau, kachaic kakainac, kapui kapu, khatni kanac ta gancloupui mei tei,

³⁰mi panty khou ni rairiumei lev kazauhna kai lau, kachaic kakainac, kapui kapu, khatni kanac kadam phay khatni guang nimei panty khou ringcsuangmei laa puni.

³¹Tiki ntaw reymei sw bammei nunc hei nkhamhmei sw puni, khatni ntaw nkhamhmei sw bammei nunc hei reymei sw puni.”

³²Mi tangv, kaniw Jerusalem thangc tat nganghmei chaenglwan khou Jisu rui kaniw suangc tat huna tat kan khwan e. Khoutei kaniw tabui tuang cho twna ning the khatni kathei lay tatmei nunc tei ping the. Khoutei ruhna kanei ta tei nduangh ranc patna kakhou pat punimei tei kaniw khou raclouna sa the,

³³“Zauclo, aniu Jerusalem thangc ngangh puni the. Kumna Meic Nac Mpouh ta amuh daihmei nunc khatni Riakdanv dinhpouc nunc khou tii pat puni, kumna kaniw rui kakhou theic biuhpui khuay nkhamlouna Zentelmei nunc khou tii pat puni.

³⁴Kaniw rui kata sinnui puni, kakhou nteih nsuklou puni, kata bai puni kumna swluai puni; tiki zaeng neih thumh tangv kamei ringcthau dat puni.”

³⁵Khoutei Zebedi nac mpouh nei-Jahon lev Jakob Jisu daeng khou guangna sa the, “Dinhpouc, aney rui nang khou ney niimei hei taanclou pu tu kahaw e.”

³⁶Khoutei Jisu rui kaney khou, “Mi kiu tabui cho?” twna thanv the.

³⁷Khoutei kaney rui sa the, “Nang hymdaic pwkhou, aney gaanv khat rui nang tuang baanzat khou khatni gaanv khat rui nang tuang baandaw khou dungc nuh khang aney khou tiilou o.”

³⁸Jisu rui kaney khou sa the, “Nangney tabui tuang ney bam tu cho twmei nangney thay mak ge. Ai zangv nimei buangc hei nangney zangv diw nah cho khatni ata lup nimei khou hei nangney lup diw nah cho?”

³⁹“Aney diw e,” twna kaney rui daw the. Khoutei Jisu rui kaney khou sa the, “Ai zangv nimei buangc tei nangney ni zangv puni khatni ata lup nimei khou tei nangney ta ni lup puni.

⁴⁰Tiki atuang baanzat baandaw khou dungh khang thu ai rui tii nina hamh e. Mi bamv hei thu chamdaanvlou tangpui mei khang tei di the.”

⁴¹Kaziap ruh tei hei tei chu pwkhou Jakob lev Jahon ta kaniw lungh puamc the.

⁴²Khoutei kaniw ta kaw guangna Jisu rui kaniw khou sa the, “Zentelmei nunc tuang dihsinpouc nunc tei meic nunc ruc khou kaipouc sw e khatni kaniw tuang meicdaihmei nunc tei meic nunc ruc khou ngamv sin e twmei nangniw thay e.

⁴³Tiki nangniw lungc khou thu hei tei kumc nina hamh e. Nangniw pang khou thowkumhmei meicdaihmei sw nii e thei kamei meic guayna siamruaimei sw nina e,

⁴⁴khatni thowkumhmei kapy sw nii e thei, meic guayna bangc sw nina e.

⁴⁵Kalam thu Meic Nac Mpouh nganvna meic nunc rui kasiamruai swlou khang guang tu hamh e, tiki siamruai sw khang khatni meic mpeyna ta thuaklou khang kapanty tii pat khang guang tuang de.”

⁴⁶Khoutei kaniw Jeriko khou guang the. Kumna kamei Jeriko khou rui kaziap nunc khatni meic kangdai lev tat pat khou, mik tiatna ney tu bammei Timai nac mpouh Bartimai chaeng daeng khou dungc bam khwan e.

⁴⁷Hei tei Nazarethmei Jisu e twmei kamei chu lana, “David Nac Mpouh Jisu, ata zauc nzianlou o!” twna kauc thau the.

⁴⁸Khoutei, “Rey rei o,” twna meic mpeyna rui kata luh the. Tiki, “David Nac Mpouh, ata zauc nzianlou o!” twna kauc ranv hay hay thau the.

⁴⁹Khoutei Jisu ding the, kumna, “Kata kaw guang o,” twna sa the. Khoutei, “Thau tho! Neihla tho! Kamei nang ta kaw bam the!” twna sana kaniw rui mik tiatmeipu ta tei kaw the.

⁵⁰Khoutei kaphey ganc keylouna ding palup thauna Jisu daeng khou guang the.

⁵¹Khoutei Jisu rui kakhou, “Ai rui nang khang tabui tuang swloumei ta kahawna cho?” twna sa the. “Rabbi, amik how dat nii e,” twna mik tiatmeipu tei rui Jisu khou sa the.

⁵²Khoutei Jisu rui kakhou sa the, “Tat tho, nang ramlum rui nang ta tigaylou the.” Khoutei kadyng khou kamik how dat the, kumna Jisu thei lay tat the.