Read Rongmei Naga MARK 11 Bible Online

MARK 11 - Rongmei Naga bible

MARK 11

¹Kaniw Jerusalem ana guangna, Olive Chyng phay khou naimei Bethphage lev Bethani khou guang khou Jisu rui kaziap gaanv nei ta ndiulouna,

²kaney khou sa the, “Nangney hu khou naimei namv khou hei tat ro, kumna mi khou tei gut pwkhou meic gaanv khat na sini tuangclou makmei kuanniam launa bangclou bammei ta nangney ariw puni. Hei tei ricna laaguang o.

³‘Tabui khang nangney mi hei ric bam tu cho?’ twna thowkumhmei rui thanv pw e thei, ‘Kaipouc[19] khang mi hei kage naina e, kumna mi hei ndiu guanglou dat nuangc puni de,’ twna sa tio.”

⁴Khoutei kaney tat the, kumna kuanniam launa akhat chaengmun daeng khou bangclouna chaeng khou bammei ta ariw the. Kumna hei tei kaney ric the.

⁵Mi khou tei ding bammei gaanvsaekc rui, “Mi kuanniam launa hei ricna nangney tabui sw bam tu cho?” twna sa the.

⁶Khoutei Jisu rui kadyloumei tei kumcna kaniw khou daw the. Kumna kaney ta mpatlou the.

⁷Kaney rui kuanniam tei Jisu daeng khou nduangh guang the. Mi ruc khou tei kaniw rui kaniw tuang phey bamclou the, kumna Jisu mi khou tei dungc the.

⁸Khoutei chaeng khou meic mpeyna rui kaniw tuang phey bamclou the khatni baihmei guay rui thing nwang downa bamclou the.

⁹Khoutei kathei kahu khou tat bammei meic kangdai tei rui, “Hosanna! Poubauhmei zanc khou guangmeipu hei kahym daic diu!

¹⁰Guang nimei aniu pu David tuang guangcdic hei kahym daic diu! Kauh Liangmei khou, Hosanna!” twna kauc the.

¹¹Jisu Jerusalem khou gutna Ravkai khou gut the. Kamei ramh guayna ta zauc kari karianglouna tingzyn nyan key ti thena kaziap ruhna kanei ta nduanghna Bethani thangc tat kan the.

¹²Nthuanh thauna kaniw Bethani khou rui tat pat dat khou Jisu ndaapc the.

¹³Khoutei kanuy phwam gaymei tadut bang akhat duh thangc how lana mi khou tei kathai nai pungh e twna kamei guang the. Tiki guang tangc pwkhou kathai maek khe, kanuy na bam khwan the. Kalam thu hei tei tadut thai nthaipui ganv hamh khwan e.

¹⁴Khoutei, “Nang thai meic gaanv khat na rui sini tu dat zat mak kan di tho,” twna Jisu rui mi khou tei salou kan the. Hei tei kaziap nunc chu the.

¹⁵Kumna kaniw Jerusalem khou guangna Ravkai lungc gutna, Ravkai khou puat zuanc bammei nunc khatni liu bammei nunc ta nthau ganc thau the. Syan akhiakmei nunc tuang paeng guay khatni aphyna zuanhmei nunc tuang paeng guay thui kadat kadaengvlou the.

¹⁶Kumna meic gaanv khat na ta sini puat phungcna ravkai kaimav tei titat ruan mak khwan e.

¹⁷Khoutei kamei rui kaniw khou nchamlouna sa the, “‘Akai ti hei zaatc guayna kalumpui kai twna kaw puni’ twna hylou mak nah cho? Tiki nangniw rui mi ti hei kwamtumei nunc kai tiswlou the.”

¹⁸Amuh daihmei nunc khatni Riakdanv dinhpouc nunc hei tei chu lana akumhna kata swluai kho cho twmei phu the. Kalam thu meic kangdai tei rui kamei rui nchamloumei khou tei lungh gut bam tina kaniw kata ping khwan e.

¹⁹Kumna tingzyn key pwkhou, kaniw kaidai khou tei rui tat pat dat the.

²⁰Kumna kaniw laukhwan khwanzingh tat ruan pat dat pwkhou, tadut bang tei kamaan theic tangc bammei ta kaniw how the.

²¹Khoutei Pitar rui ningtow lana Jisu khou, “Rabbi, zauclo, nang rui sianglou kanmei tadut bang tei theic bam the,” twna sa the.

²²Khoutei mundawna Jisu rui kaniw khou sa the, “Ravguangc khou lwm o.

²³Ai rui nangniw khou kaling siakna sa tuang e: Thow pw ni mi chyngbut ti hei, ‘Nang thauna duipui khou gut ro,’ twna sana kalung khou lwm simei tuang maekna kamei samei tei kumcna pat puni de twmei lwm e thei, kamei rui samei tei kakhang taanclou puni.

²⁴“Hei zaeng rui ai rui nangniw khou sa tuang e: tabui pw ni nangniw rui huayney khou neymei guay tei nangniw laatow the twna lwm o. Kum e thei hei tei nangniw khang tiilou puni.

²⁵Nangniw huayney khang ding bampui ganv khou thowkumhmei ruc khou nangniw lungh nuancloumei tuang nai e thei, hei tei kuaklou o, kum e thei tingkauh thangc bammei nangniw Pu rui ni nangniw tuang twan lyammei guay kuaklou puni.

²⁶(Nangniw kuaklou mak ge thei, tingkauh thangc bammei nangniw Pu rui ni nangniw tuang twan lyammei guay kuaklou lak ge.)”b

²⁷Khoutei kaniw Jerusalem khou guang dat the. Kumna Jisu Ravkai khou tat bam khou amuh daihmei nunc, Riakdanv dinhpouc nunc khatni gaanvthaih nunc kadaeng khou guangna,

²⁸“Tabui ngamv khou rui nang mi guay hei taanc bam tu cho, hamh e thei mi guay hei taanh khang nang khou thow rui ngamv tiilou pwna cho?” twna kakhou sa the.

²⁹“Ai nangniw khou lat akhat thanv puni, hei tei akhou dawlou e thei mi guay hei ai tabui ngamv khou rui taanc bam tu cho twmei nangniw khou salou puni.

³⁰Mi kiu thu: Jahon rui duilupmei tei thow rui ngamv tiilou tina cho? Ravguangc rui ni, maansei rui cho? Nangniw akhou dawlou o.”

³¹Khoutei kaniw rana kaphianhna, “‘Ravguangc rui e’ twna sa ti thei, ‘Kum e thei tabui swna nangniw kakhou lwm mak tu cho?’ twna kamei rui sa puni.

³²‘Maansei khou rui de,’ twna aniu sa ti thei...” (Kaniw meic nunc ta ping khwan e; kalam thu Jahon hei muhzwng changh e twna meic guayna rui laa e.)

³³Kumna, “Aniw thay mak ge,” twna kaniw rui Jisu khou sa the. Khoutei Jisu rui kaniw khou sa the, “Mi guay hei tabui ngamv khou rui ai taanc bam tu cho twmei ai ni nangniw khou salou ni tu hamh e.”