Read Rongmei Naga MARK 12 Bible Online

MARK 12 - Rongmei Naga bible

MARK 12

¹Khoutei Jisu rui latgiam zayna kaniw khou sa thau the: “Meic gaanv khatpu drakha lau lingclouna karaengv raengclou the, drakha dui sunhpui khunc kasiamhlou the, khatni lauphaan kai swlou the. Kumna hei tei lau nngemei nunc khou saanvlouna tat kan the.

²Kathai minhpui ganv guang pwkhou, kathai laa khang kabangc gaanv khat ta lau nngemei nunc khou tei ndiu guang the.

³Khoutei kaniw rui kata nymna bai lana kabaanc raeng thouc hanc dat the.

⁴Khoutei kamei baihmei bangc gaanv khat ta ni kaniw khou ndiulou dat re. Khoutei kaniw rui kapy sw nzamhlou the khatni sw zaklou the.

⁵Baihmei bangc akhat ta ni kamei rui ndiu guang dat re. Kumna mi ta tei kaniw rui swluai the. Baihmei mpeyna ta kamei rui ndiu guang e; tiki gaanvsaekc ta bai the, gaanvsaekc ta swluai the.

⁶Ndiulou dat khang gaanv khat nai he. Mi kiu kamei nzianmei nac mpouh e. ‘Anac mpouh ta thu kaniw chakhwang swlou pungh di the,’ twna sana kata nkhamh liang khou kaniw khou ndiu guang the.

⁷Tiki mi lau nngemei nunc tei kaniw pang khou mi kumcna sa the, ‘Mi hei katuang tampy luak nimeipu the; guang tho, aniu kata swluai di kho, kumna katuang hei aniu khang laa di kho.’

⁸Kumna kaniw rui kata nymna swluai the, kumna kata drakha lau paengc thangc ganc pat the.

⁹“Drakha lau pouc tei rui tabui sw puni bo? Kamei guangna lau nngemei nunc ta tei swluai puni, kumna drakha lau tei meic baihmei khang tii dat puni.

¹⁰Nangniw mi kumcna hylou bammei hei pah mak he nah cho? ‘Kai swmei nunc rui ganc patmei tauc rui, kaikwnpy tauc sw the.

¹¹Mi hei Poubauhmei taanv e; mi hei aniu ramninglou khou kadath dat tuang e.’ ”

¹²Khoutei Jisu ta nym khang kaniw kachaeng phu the. Kalam thu mi latgiam hei kaniw ta sa bam tu e twmei kaniw thay khwan e. Tiki kaniw meic nunc ta ping khwan e, kumna kaniw kata ganclouna tat kan the.

¹³Kalat khou rui nym khang twna kaniw rui Pharisimei khatni Herodmei gaanvsaekc ta Jisu daeng khou ndiu guang the.

¹⁴Kaniw guangna Jisu khou sa the, “Dinhpouc, nang hei maansei ta rouh tuang maekna latling sameipu e; kalam thu nang maansei ta zaw khu zaw ru zauh mak ge, kumna Ravguangc tuang chwn tei kaling dinc e twmei aniw thay e. Kumna Kaisar khang dihkhav tiimei hei Riakdanv thei layna nchumh ni nchumh mak cho? Mi hei aniw tii nina ny, tii lak nina cho?”

¹⁵Khoutei Jisu rui kaniw tuang rouc tei thay lana kaniw khou sa the, “Tabui swna nangniw ata nchanv bam tu cho? Denari[20] akhat laaguang o, zauc kho.”

¹⁶Kaniw rui hei tei laaguang the. Khoutei Jisu rui kaniw khou sa the, “Mi hei thow maengc cho, khatni thow tuang e twna hylou bu cho?” Khoutei, “Kaisar tuang,” twna kaniw rui daw the.

¹⁷Khoutei Jisu rui kaniw khou sa the, “Kaisar tuang tei Kaisar khang tii tio, Ravguangc tuang tei Ravguangc khang tii tio.” Khoutei kaniw ngak the.

¹⁸Theihmei ringcthau dat mak khe twna samei Saddukimei nunc Jisu daeng khou guangna thanvna kumna sa the,

¹⁹“Dinhpouc, thowkumhmei chana gaanv khat kanac maekna kanow ta ganclouna theic kan e thei, kakainac rui kachaic now ta kakhauh dat lana kachaic kikta tinailou nina e twna Mousi rui aniw khang hylou e.

²⁰Chana gaanv chanei nai khwan e. Kumna gaanvthaihmeipu tei kanow kawna kanac maekna theic kan the.

²¹Khoutei kaneimeipu tei rui kata kakhauhna kanac maekna theic muay kan the. Kathumhmeipu tei ni, hei tei kumc muay the.

²²Mi kumna gaanv chanei tei kaniw nac maek khe. Nkhamh khou ntumei tei ni theic the.

²³Ringcthau datpui nungc kiu kaniw ringcthau pwkhou mi pui tei thow now sw nina cho? Kalam thu kaniw gaanv chanei rui kata kaw the.”

²⁴Khoutei Jisu rui kaniw khou sa the, “Nangniw thay maanv the, mi hei nthanmei latrik khou hylou bammei tei khatni Ravguangc ngamv tei thay makpui zaeng rui hamh nah cho?

²⁵Kalam thu theihmei khou rui ringcthau dat pwkhou, now kawmei khatni mihmei nai dat mak khe. Kaniw tingkauh thangc bammei baanchara nunc kumc puni the.

²⁶Theihmei nunc ringcthau datmei lam khou thu, Mousi tuang latrik zy khou, thing phwam lam khou hyloumei tei nangniw pah mak he nah cho? ‘Ai hei Abraham Racguangc e, Isak Racguangc e, khatni Jakob Racguangc e,’ twna Ravguangc rui Mousi khou sa e twmei hylou mak nah cho?

²⁷Kamei hei theihmei nunc tuang Racguangc hamh e, ringc bammei nunc tuang de. Nangniw mpeyna nkhuai the.”

²⁸Khoutei Riakdanv dinhpouc gaanv khat guang the, kumna kaniw agi bammei tei kamei chu the. Jisu rui Saddukimei nunc khou daw chuyna daw bammei tei chu lana kamei rui Jisu khou, “Latdanv guayna pang khou tabui tei daic liangmei cho?” twna thanv the.

²⁹Jisu rui mundawna sa the, “Daic liangmei kiu thu: ‘Nking o, he Isaraelmei, Kaipouc kiu thu aniu Poubauhmei Ravguangc na hei de.[21]

³⁰Kumna Poubauhmei nang Racguangc ta nang lung kapwm rui, nang ringcpaan kapwm rui, nang lungning kapwm rui khatni nang pumtan kapwm rui nzian nina e,’ twmei hei e.

³¹Kaneimei rui: ‘Nang tuang kaining kaigeimei ta nang rui nang ta nzianmei kumcna nzian nina e,’ twmei hei e. Mi khang suangc daihmei latdanv baihmei maek khe.”

³²Khoutei Riakdanv dinhpouc tei rui Jisu khou sa the, “‘Dinhpouc, Ravguangc akhat na de, kamei hamhna baihmei maek ge.

³³Kata lungh kapwm rui, lungning kapwm rui khatni pumtan kapwm rui nzianmei, khatni katuang kaining kaigeimei ta karana kata nzianmei kumcna nzianmei twmei hei kapumc kapwm rawna katmei khatni khaengmei guay suangc mbu taph tapmei e.’ twna nang samei hei nchumh the.”

³⁴Mi pu tei ningtyngna daw e twmei how la khou, “Nang Ravguangc guangcdic khou rui duh mak khe,” twna Jisu rui kakhou sa the. Mi tangv thu meic gaanv khat na sini kakhou lat thanv dat bauh mak khe.

³⁵Ravkai khou nchamlou bam khou Jisu rui mi kumcna thanv the, “Khrista hei David Nac Mpouh e twna akumhna Riakdanv dinhpouc nunc rui sa tu cho?

³⁶Bumaengh Nthanmei paan rui David rui sa e: ‘Nang ta zauczihmei nunc ta nang phaypav bangc khou lou mak saanv, nang abaanzat thangc dungc bam o, twna Ringhpouc rui apoucbauhmei khou sa e.’

³⁷“David rui kata ‘Poubauhmei’ twna kaw e, kum e thei akumhna Khrista hei kanac nina cho?” Meic kangdai tei neihlana kalat nking the.

³⁸Kumna kamei rui nchamlou bam khou Jisu rui sa the, “Pheychuanh piuna ruan tat bam niimei, charuangc la khou kalumlou pwmei ta kahawmei, sinagog khou bamvdaih dungc niimei, khwm ngay bamv khou chakhwang bamv khou dungc niimei, maypui nunc kai kwam tumei, kum lana gaylwn swna karavsuai saenghmei Riakdanv dinhpouc nunc khou tei rui suriak thay o.

⁴⁰Kaniw rui kadou chamei laana amaypui nunc kai khou rui kwam laa the kumlana ravsuai rui saengcna suaic the. Kaniw ruc khou keylou nimei latzan hei nrit diangc puni.”

⁴¹Jisu syan kouc daeng khou dungcna meic nunc rui syan kouc khou syankangh phaiclou bammei ta zauc bam khwan e. Lungcgaymei mpeyna rui mpey peyna phaiclou bam khwan e.

⁴²Khoutei lungcsimei maypui gaanv khat guangna matiak kanei, twmei thu pai akhat phaiclou khwan e.

⁴³Khoutei kaziap nunc ta kadaeng khou kaw guangna kaniw khou sa the, “Ai rui nangniw khou kaling siakna sa tuang e: mi syan kouc khou phaiclou bammei pang khou, mi lungcsimei maypui tuang hei geic liang e.

⁴⁴Kalam thu baihmei guay tei thu mpeyna naimei khou rui tii tuang de, tiki mi pui hei thu karam lungcsi khou naimei kapwm, kamei tu nimei phaan tii tuang e.”