Read Rongmei Naga MARK 13 Bible Online

MARK 13 - Rongmei Naga bible

MARK 13

¹Jisu Ravkai khou rui tat pat dat khou, kaziap gaanv khat rui kakhou sa the, “Dinhpouc, zauclo, mi kumhmei tauc guay ramgai khatni mi kumhmei kai guay ramdai hei!”

²Khoutei Jisu rui kaniw khou sa the, “Mi kai daihmei guay ti hei nangniw how bo? Mi khou hei ntauh akhat ruc khou ntauh akhat nsaplou bam dat ni tu hamh the. Pangv key makna gancloumei nai dat lak khe.”

³Jisu chyngbut khou Ravkai ta dungc achowna karana bam khou, Pitar, Jakob, Jahon khatni Andriu rui mi kumna thanv the,

⁴“Mi kiu tabui ganv khou puni cho? Mi guay kiu guang tangc puni the twmei thay nuhmei madanhmei tuang tabui nai cho? Aniw khou dinclou o.”

⁵Khoutei Jisu rui kaniw khou sa the, “Meic gaanv khat na rui sini nangniw ta zay mbiangh mak khang suriak thay o.

⁶Meic mpeyna azanc khou guangna, ‘Ai hei Khrista the,’ twna sana meic mpeyna ta zay mbiangh puni.

⁷Rih adowpui khwan khatni rih adow bampui chamv mpeyna chu thau pwkhou nangniw kaluang riu. Hei tei pat mak nuh makna pat puni the. Tiki hei tei kandih luai nimei thu hamh e.

⁸Kalam thu zaatc akhat rui zaatc akhat ta khatni guanghdic akhat rui guanghdic akhat ta zauczih thau puni. Kabamv mpeyna khou baengla zay puni, nap nkow puni. Mi hei narui thaumei e.

⁹“Nangniw rana nangniw khang suriak thay o: Nangniw ta latzan kai khou zaylou puni khatni sinagog khou bai puni. Azaeng rui nangniw dihsinpouc nunc khatni guangh nunc hu khou kaniw khou sakhi tii khang ding puni.

¹⁰Kumna gaychamv hei zaatc guayna khou dinc liklou rey puni.

¹¹Kumna kaniw rui nangniw ta nymna latzan kai khou zay guang pwkhou tabui lat sa nina cho twna lungh ryanra rey bam nangh e. Kadyng kadyng khou tiiloumei tei nangniw sa o. Kalam thu sa nimei hei nangniw hamh e, Bumaengh Nthanmei rui sa puni de.

¹²Chana rui chana ta khatni pu rui nah ta swluai khang tii pat puni. Khatni nah nunc rui kapui kapu ta nuhmu thauna tiswluai puni.

¹³Kumna nangniw ta azanc zaeng rui meic guayna rui karaeng puni. Tiki khaengv suakpui mei ta tei kanlou puni.

¹⁴“Tiki swkamut kamai nipui tuang sw mphuammei puat tei nai bam lak nipui bamv khou ding bammei ta how pwkhou, (pahpui mei tei rui kabah thay kan di tho), Judia khou bammei nunc chyngram thangc pak tat kan diu,

¹⁵kainam khou bam nanghpui mei tei ni kakai kainung khou naimei puat laa khang key dat mak kan diu,

¹⁶laupuk khou bam nanghpui mei tei ni pheybaan laa dat khang guang dat mak kan diu.

¹⁷Mi ganv khou tei kapumc nrit bam nanghmei khatni angana puanc nouc bam nanghmei pui nunc tei kasan simei e dav!

¹⁸Mi hei tingsei khou patlou mak khang nangniw huayney o.

¹⁹Kalam thu mi ganv lungc khou kiu, Ravguangc rui mbaanv damclou rap khou rui pat zat kan makmei khatni pat dat lak nimei ramrianra ryanra puni.

²⁰Kumna Poubauhmei rui mi ganv dak tei tiduilou mak khwan e thei, meic gaanv khat na sini duak ngam lak ge. Tiki kamei rui kapahloumei nunc khang rui kamei rui mi ganv dak tei tiduilou the.

²¹“Mi ganv khou kiu, thowkumhmei rui, ‘Zauclo, mi khou hei Khrista bam the’, hamh e thei ‘mi thangc tei bam the’ twna sa pwsini nangniw lwm riu.

²²Nuh e thei, kapahloumei nunc ta zay mbiangh khang guatmei Khrista khatni guatmei muhzwng nunc guangna sw-nchinmei khatni charynmei taanv mpeyna taanc puni.

²³Tiki nangniw suriak thay la tho! Ramh guayna nangniw khou sa kasuakclou kan the.

²⁴“Tiki ryanra ryanriumei tangv tei, neihmik zingc puni, bw ni kariw gaanh mak puni,

²⁵tingpuk thangc rui gaanchuangcna guay taek key puni, kumna tingpuk khou nai bammei pumtan guay ti hei kanuk puni.

²⁶Mi khou kiu, Meic Nac Mpouh katik kahym daicna keymei ta kaniw how puni.

²⁷Mi khou kiu kamei rui baanchara guay ta kandih tin tou padeih khou ndiu patna tingpuk kandih tin tou thangc rui kamei rui kapahloumei guay ta khuam guang puni.

²⁸“Tadut bang khou rui mi hei thay o: Twmei thu tadut chy guay tei kazik kasatna kanwang pat re thei laylum ana the twmei nangniw thay the.

²⁹Hei tei kumcna, mi guay hei pat pw e thei, kamei chaengmun daeng khou bam the[22] twmei thay tho.

³⁰Ai rui nangniw khou kaling siakna sa tuang e: Mi guay hei pat mak saanv thu, mi zuk hei luai ni tu hamh e.

³¹Tingpuk kandih thu maan kan ni de, tiki alat thu maan dat lak khe.

³²“Mi tingmik khatni kaganv tei thu meic gaanv khat na sini thay mak ge; Pu na hamhna tingkauh thangc bammei kauh baanchara guay ni, Nah Mpouh ni thay mak ge.

³³Suriak thay o, ntak nrak bam o. Mi ganv tei tabui nungc guang puni cho twmei nangniw thay mak ge.

³⁴Mi hei gaanv khat pu rui kakai tei kabangc nunc khou nsinlouna, kaniw kathuic khang taanv nsinlouna, chaengmun nkhwanmei ta chamdaanvna nkhwan bam khang kadylouna nggin tat kanmei kumh tuang e.

³⁵Hei zaeng rui, nangniw chamdaanv bam o; kalam thu kai kaipouc guang nimei tei zingbangc ny, zipchwng ny, nruay khuangh khou ny, hamh e thei khwanzingh ny nangniw thay mak ge.

³⁶Mi kumh mak ge thei, nangniw zip bam khou thay mak liangna guang nangc timc e.

³⁷Ai rui nangniw khou samei hei meic guayna khou sa tuang e: Nangniw nkhwanna bam o.”