Read Rongmei Naga MARK 14 Bible Online

MARK 14 - Rongmei Naga bible

MARK 14

¹Kaanpatpui Ngai khatni Khay Lou Makpui Ngai guang khang zaeng neih nei nai khou, mi kumcna pat khwan e. Khoutei amuh daihmei nunc khatni Riakdanv dinhpouc nunc rui akumhna nkamhna Jisu ta nymna swluai nuh puni cho twna phu bam khwan e.

²Kalam thu, “Mi hei nngay lungc khou thu sw nuh mak khe, meic nunc kachin karo thau pungh di the,” twna kaniw sa the.

³Jisu Bethani khou mphaanhmei Simon kai khou nap tu khang dungc bam khou ntumeipui gaanv khat, kamanv kunghmei nard thauc nthanmei loumei alabastar haan sinna guang khwan e. Kamei rui alabastar haan tei swbakna Jisu py khou bunlou the.

⁴Khoutei, mi khou tei bammei gaanvsaekc kaniw lungh puamcna kaniw khat khat khou sa the, “Tabui swna mi thauc hei mi kumcna swmaan bam tu cho?

⁵Mi hei denari[23] phay thumh suangc sini geihna zuanc lana lungcsimei nunc khang tii nuh di ki.” Kumna kaniw rui mi pui ta tei lungh puamcna luh the.

⁶Khoutei Jisu rui sa the, “Kanyng sw kan dio. Tabui swna nangniw kata sw kaguakc bam tu cho? Kamei akhou gaypui taanv taanclou tuang e.

⁷Kalam thu lungcsimei nunc thu nangniw lev bam nchamc tanh tan bam puni de, kumna nangniw rui swlou nii niipui ganv khou kaniw khang gay taanv taanclou nuh de. Tiki ai thu nangniw lev bam nchamc tanh tan bam ni tu hamh e.

⁸Kamei rui ngammei tei kamei taanclou tuang e. Tarou khou mbeihlou khang kamei rui apumc khou thauh tey kasuakclou tuang e.

⁹Kumna ai rui nangniw khou kaling siakna sa tuang e: Mi mbaanv kapwm khou gaychamv dincloupui bamv kathuic khou, kamei rui taancloumei hei racna kata ningtow bam puni.”

¹⁰Ziap ruhna kanei pang khou kazauhmei Juda Iskariot tei Jisu ta tinym khang kachuc khang amuh daihmei nunc daeng thangc tat kan the.

¹¹Kaniw hei tei chu pwkhou neihla the, kumna kakhang syan tii khang latryan swlou the. Khoutei kata tinym khang kadou chamei kamei phu thau the.

¹²Kumna Khai Lou Makpui Ngai nngay guang nungc, Kaanpatpui lauziu dow nungc, kaziap nunc rui Jisu khou, “Nang Kaanpatpui taektw tu khang aniw tabui thangc tatna chamdaanvlou o cho?” twna thanv the.

¹³Khoutei kaziap gaanv nei ta ndiulouna kaney khou sa the, “Kaidai khou hei nangney gut tho, kumna dui lai puancna tat bammeipu gaanv khat nangney ta ariw puni. Kathei lay tat tho.

¹⁴Kumna mi pu tei gutmei kai kaipouc khou tei, ‘Ai aziap nunc lev Kaanpatpui taektw tu nimei bamv kiu tabui khou tei cho twna dinhpouc rui sa e,’ twna sa tio.

¹⁵Khoutei kai kauh khou kailangv daihmei chamdaanvloumei bamv akhat nangney khou kamei rui lyanlou puni. Mi khou tei aniu khang chamdaanv tho.”

¹⁶Khoutei ziap nei tei tatna kaidai khou tei gut the, kumna kaney khou kadyloumei kahak tei ariw the. Mi khou tei Kaanpatpui taektw khang chamdaanv the.

¹⁷Kumna zingc key pwkhou Jisu kaziap nunc ta nduanghna guang the.

¹⁸Kumna kaniw dungcna tu bam khou, Jisu rui kaniw khou sa the, “Ai rui nangniw khou kaling siakna sa tuang e: Ai lev tu nchamc bammei, nangniw pang khou gaanv khat rui ata zuanc puni.”

¹⁹Khoutei kaniw lung katuakc thau the, kumna “Ai hamh e ni?” twna kaniw khat khat swna kakhou sa thau the.

²⁰Khoutei Jisu rui kaniw khou sa the, “Mi hei nangniw ruhna kanei pang khou gaanv khat, ai lev kamkuak akhat na khou num nchamcmeipu tei the.

²¹Kalam thu Meic Nac Mpouh hei kalam khou hylou tangmei tei tat bam tuang de. Tiki Meic Nac Mpouh ta zuanctupui mei tei kasan si e dav! Kamei tei puanclou lamc mak ge thei gay ni tuang e!”

²²Kaniw tu bam khou Jisu rui ntyan dwm akhat laa thauna thuanckulouna by bak the, kumna hei tei kaniw khang tiina sa the, “Nangniw laa tho, mi hei apumc the.”

²³Kumna buangh akhat laa thauna thuanckulouna kaniw khang tii the, kumna hei tei kaniw guayna zangv the.

²⁴Khoutei Jisu rui sa the, “Mi hei azei e, meic mpeyna khang keyloumei latdyng tuang zei e.

²⁵Ai rui nangniw khou kaling siakna sa tuang e: Drakha thai dui hei thu ai zangv dat ni tu hamh the, Ravguangc guangcdic thangc rui drakha dui kathanc zangv dat khang di the.”

²⁶Khoutei kaniw lu akhat suanlou lana Olive Chyng thangc tat pat kan the.

²⁷Khoutei Jisu rui kaniw khou sa the, “Nangniw meic guayna ata mpatlou puni, kalam thu, ‘Ai rui lauziu gaenghmeipu ta bai luai puni, kumna lauziu guay tei pak ntamv puni,’ twna hylouna nai e.

²⁸Tiki ata tiringcthauloupui tangv ai Galili thangc nangniw suangc tat hu puni.”

²⁹Khoutei Pitar rui Jisu khou sa the, “Meic guayna nang ta mpatlou sini ai thu mpatlou ni tu hamh e.”

³⁰Khoutei Jisu rui kakhou sa the, “Ai rui nang khou kaling siakna sa tuang e: Aseic zingbangc nruay khuangc kanei makmei hu khou nang amei e twmei nuh mak liang kathumh puni.”

³¹Khoutei Pitar rui sa ranvna sa dat re, “Ai nang lev theiclou ni tuang nai pu sini ai nang ta mpat lak ge.” Baihmei ziap guay tei ni hei tei kumcna sa the.

³²Gethsemani twna kawmei bamv akhat khou kaniw guang the. Khoutei Jisu rui kaziap nunc khou sa the, “Ai huayney bam saanv nangniw mi khou hei dungc bam khwan o.”

³³Khoutei kamei Pitar, Jakob khatni Jahon ta nduanghna tat pat the. Kamei pingmei khatni lungh ryanramei padik thau the.

³⁴Kumna kamei rui kaniw khou sa the, “Alung ryanramei rui ai theic ni kumc the. Nangniw mi khou hei ntak nrakna nkhwan bam khwan o.”

³⁵Kumna kamei hu thangc tat kasuanh khath tw gutna kandih khou pun nkhum laamv keyna nuh e thei mi ganv tei kakhou rui tat ri kan khang huayney the.

³⁶Kamei rui sa the, “Abba, aPu, ramh guayna nang khang thu ngam mak tuang maek ge; mi buangc hei akhou rui laa ganclou kan o; tiki ai ningmei hamh e, nang ningmei de.”

³⁷Jisu pat dat pwkhou kaniw zip bam khwan the. Khoutei kamei rui Pitar khou sa the, “Simon, nang zip bam di nah cho? Nang ganvdak akhat na sini rak ngam mak khe nah cho?

³⁸Nangniw nthiammei khou keylou mak khang zip makna huayney bam o. Lungh rui thu kahaw the, tiki pumh thu suan the.”

³⁹Kamei tat pat datna, mi lat kahak tei sana huayney dat the.

⁴⁰Kumna kamei pat dat pwkhou, kaniw zip bam dat muay khwan the. Kaniw zip niimei rui rak ngam mak khe, kumna kaniw kakhou tabui lat sa daw nina cho thay mak khe.

⁴¹Kumna liang thumhmei swna kaniw daeng khou guang dat khou Jisu rui kaniw khou sa the, “Ntaw nganv nangniw zipna zaengsw bam tu cho? Biuc the! Kaganv tei guang the! Meic Nac mpouh ta paapcmei nunc baanc khou tiilou the.

⁴²Thau tho, tat di kho! Ata zuanctu nimeipu tei guang the!”

⁴³Mi hei sa bammei dyng khou, amuh daihmei nunc, Riakdanv dinhpouc nunc khatni gaanvthaih nunc rui ndiu guangmei, baengsaeng khatni thing dangv sinmei, meic kangdai ta nduanghna ziap ruhna kanei pang khou kazauhmei Juda tei guang the.

⁴⁴“Ai rui kaput nimeipu tei kamei kiu the. Kumna nangniw kata nymna duak mak khang swna zay tat la tho,” twna kata zuanctumeipu tei rui kaniw khou limclou the.

⁴⁵Khoutei kaniw guang tanghpui lev kaluak kalat Juda tei Jisu daeng khou guangna, “Rabbi” twna sana kata kaput the.

⁴⁶Kumna kaniw rui kata nym the.

⁴⁷Mi khou tei ding bammei gaanv khat rui baengsaeng sat patna tingkuh bangc ta dow the, kumna kanu siap ganc the.

⁴⁸Khoutei Jisu rui kaniw khou sa the, “Kwamtupui mei ta nym ni kumcna nangniw baengsaeng khatni thing dangv sinna ata nym khang guang tu cho?

⁴⁹Ai tingmik pum nchamlouna nangniw lev Ravkai khou bam tuang de, tiki nangniw ata nym mak ge. Tiki hylou bammei tei guang tangc ni tina the.”

⁵⁰Khoutei ziap nunc tei kata ganclouna pak tat ngam kan the.

⁵¹Chabwan gaanv khat pumtang phey na baanvna Jisu thei lay tat bam khwan e. Kaniw rui mi pu ta tei nym the.

⁵²Khoutei kamei kaphey ganclouna pumtang pak kan the.

⁵³Khoutei kaniw rui Jisu ta tingkuh kai khou zay guang the. Kumna mi khou tei amuh daihmei nunc, gaanvthaih nunc khatni Riakdanv dinhpouc nunc guang kaduai the.

⁵⁴Khoutei Pitar thei hiauh hiauna kathei layna tingkuh kai kaimav nganv lay guang tangc the. Mi khou tei rigaanvmei nunc lev dungc nchamcna kamei ni mai nggaan bam khwan e.

⁵⁵Khoutei amuh daihmei nunc khatni peikumei guay tei rui Jisu ta swluai khang kakhuay phungc guang nuhpui mei phu khwan e. Tiki phu tow mak khe.

⁵⁶Meic mpeyna rui saraamhmei khuay azuh guang sa e, tiki kaniw tuang lat tei nchamc mak khe.

⁵⁷Khoutei meic gaanvsaekc ding thauna saraamcna kakhou khuay nkhamlouna sa the,

⁵⁸“‘Ai rui mi baanh rui kasiamhmei ravkai hei swmaanna, baanh rui kasiamh makmei, baihmei ravkai ai rui zaeng neih thumh khou sw thaulou dat puni’ twna kamei rui sa the.”

⁵⁹Kum e tiki, kaniw tuang lat tei ni nchamc mak khe.

⁶⁰Meic guay hu khou tingkuh tei ding thauna Jisu khou lat thanvna sa the, “Meic nunc hei rui nang ruc khou sa bammei khou hei nang daw khang maek khe nah cho?”

⁶¹Tiki kamei lat sa mak khe, lat khat sini daw mak khe. Khoutei tingkuh tei rui sa the, “Nang hei Hymdaihmeipu Nac Mpouh Khrista kiu cho?”

⁶²Khoutei Jisu rui sa the, “Ai kiu the, Meic Nac Mpouh hei Ngamparimeipu baanzat thangc dungc bammei khatni muangh khou keymei ta nangniw how puni.”

⁶³Khoutei tingkuh tei katuang phey siatna sa the, “Aniu kamwang khou rui chu the. Mi khang suangc mbumei tabui kage nai hena cho?

⁶⁴Kamei Ravguangc ta ramh sak makpui lat samei hei nangniw chu the. Nangniw akumhna ning tu cho?” Khoutei, “Kamei theic biuc the,” twna meic guayna rui sa the.

⁶⁵Khoutei meic gaanvsaekc rui nteih nsuklou thau the, khatni kazaw gumlouna kaniw baanc rui sowna, “Thow rui cho, dinc o” twna sa the. Rigaanvmei nunc rui kata kaphina zay tat kan the.

⁶⁶Pitar tei kaimav khou tei bam khou, tingkuh tuang bangcpui gaanv khat guangna,

⁶⁷Kamei mai nggaan bammei ta how lana kata zaucna, “Nang ni Nazarethmei Jisu thei laymei e,” twna sa the.

⁶⁸Tiki kamei rui nuh makna, “Ai kata thay mak ge; nang sa bammei hei tabui cho ai kabah thay mak ge,” twna sa the. Kumna kamei kapaengc thangc tat pat kan the.

⁶⁹Banghpui tei rui Pitar ta how lana, kadaeng khou ding bammei nunc khou, “Mi pu hei ni kathei laymei akhat de,” twna sa dat muay the.

⁷⁰Khoutei ni kamei kiuc hamh e twna sa dat muay the. Kanakmei tangv, kadaeng khou ding bammei nunc tei rui, “Nang kaniw pang khou kazauhmei changh de, nang Galilimei de,” twna Pitar khou sa the.

⁷¹Khoutei kamei rui, “Nangniw sa bammeipu ta kiu ai thay mak ge,” twna syangdyng dingna sa the.

⁷²Mi dyng khou tei nruay khuangc luan kaneimei khuangc the.[24] Khoutei, “Nruay khuangc luan kanei makmei hu khou nang amei hamh e twna sa luan kathumh puni,” twna kakhou Jisu rui saloumei lat tei kamei ningtow the. Khoutei kamei kalung bak keyna kap the.