Read Rongmei Naga MARK 15 Bible Online

MARK 15 - Rongmei Naga bible

MARK 15

¹Tinggaanc pat rappui lev amuh daihmei nunc tei gaanvthaih nunc, Riakdanv dinhpouc nunc khatni peimei guay lev kaphianh kariu the, kumna kaniw rui Jisu ta karakcna zay tatna Pilat khou tiilou the.

²Khoutei, “Nang Jihudimei guangc cho?” twna Pilat rui Jisu khou thanv the. “Ngguay, nang rui samei tei the,” twna Jisu rui mundaw the.

³Khoutei amuh daihmei nunc tei rui kakhuay mpeyna nkhamlouna sa the.

⁴Kum tina Pilat rui kakhou sa dat re, “Nang daw khang maek khe nah cho? Nang khuay hei zu kaniw rui nkhamlou bammei hei zauc lo!”

⁵Tiki Jisu lat baihmei daw katwan mak khe. Khoutei Pilat tei ngak the.

⁶Mi ngai khou tei meic nunc rui ney neymei kangkai khou bammei gaanv khat ta mpat pat raph rap bam khwan e.

⁷Guanghdic ruc khou rihthauna meicdowmei, kangkai khou bangclou bammei nunc pang khou kazanc Barabbas twna kawmeipu bam khwan e.

⁸Kumna meic kangdai tei tat kuna kaniw khou swlou raph rap bammei tei swlou khang Pilat khou sa the.

⁹Khoutei Pilat rui mundawna, “Ai rui nangniw khang Jihudimei guangc ti hei mpatloumei ta nangniw kahaw bu cho?” twna sa the.

¹⁰Kalam thu amuh daihmei nunc tei rui kata howtina tii kumei tuang e twmei kamei thay khwan e.

¹¹Tiki Barabbas ta ti-mpatlou khang amuh daihmei nunc tei rui meic nunc ta kathouhlou the.

¹²“Kum e thei, nangniw rui Jihudimei guangc twna kawmeipu ti hei ai rui tabui sw o twna cho?” twna Pilat rui kaniw khou thanv the.

¹³Khoutei, “Kata kros khou thaengcluai nina de!” twna kaniw rui kauc the.

¹⁴“Tabui zaeng cho? Kamei tabui tuang simei taanclou thena cho?” twna Pilat rui kaniw khou sa the. Tiki ranv hay hayna, “Kata kros khou swluai nina de!” twna kaniw rui kauc the.

¹⁵Khoutei Pilat rui meic nunc ta tei tipianlou nii lana Barabbas ta mpatlou the, kumna Jisu ta tikathamv kasiclouna kros khou thaengcluai khang tii pat the.

¹⁶Mi khou tei rui Jisu ta rihmei nunc rui Pretorium[25] khou zay gutna rihmei kang kapwm ta kaw kaduai the.

¹⁷Khoutei kaniw rui kakhou haengcmumhmei phey hwamlouna khatni sauh luai pykhim kasiatcna kakhou runlou the.

¹⁸Kumna, “dwan gay o, Jihudimei guangc,” twna sa the.

¹⁹Kumna kaniw guay tei rui kapy khou ntou bungc rui kagit the khatni kakhou nteih nsuklou the, kumna tangkhungh keyna kalum the.

²⁰Mi kumcna kaniw rui kata sinnui tang lana, haengcmumhmei phey tei laa pat lana katuang phey piulou dat the. Kumna kata kros khou thaengcluai khang zay pat the.

²¹Khoutei Alekzandar lev Rupa pu, kazanc Simon twna kawmeipu, karamc Kurini thangc rui nggin guangmeipu ta ariw lana, Jisu tuang kros puanh khang kaniw rui kata nym the.

²²Kaniw rui Jisu ta Golgotha (mi kabac thu Pyrou bamv twna e) twmei bamv khou nduangh guang the.

²³Khoutei mir loumei drakha zouc kaniw rui kakhang tii the, tiki kamei hei tei zangv mak ge.

²⁴Khoutei kaniw rui kata kros khou thaengcluai the, kumna katuang pheybaan guay tei kaniw san zaucna nzanh the.

²⁵Kaniw rui kata kros khou thaengcloumei tei laukhwan ganvdak chakiu khou e.

²⁶Kakhou nkhamloumei khuay: “Jihudimei Guangc” twmei tei karuc khou hylou the.

²⁷Kumna kwamtumei gaanv nei ta ni kaniw rui Jisu tuang baanzat baandaw thangc mi khou tei thaengc nchamclou the.

²⁸(Kumna kata nkhuai mbamei pang khou kasing phuc kariulou the, twna nthanmei latrik khou hyloumei tei tipat nthuihlou the.)[26]

²⁹Mi khou tei tat kalw bammei nunc kata matevna, kaniw py kangana, “Ravkai ra keyna zaeng neih thumh khou sw thau dat nimeipu,

³⁰kros khou rui keyna nang rana nang ta kan damc bu cho!” twna sa the.

³¹Hei tei kumcna, amuh daihmei nunc khatni Riakdanv dinhpouc nunc tei ni sinnuina khat khat khou sa the, “Meickai ta thu kamei kanlou lana, karana kata thu kan ngam mak khe!

³²Aniw howna lwm khang, Isaraelmei guangc Khrista kiu kros khou rui key tho!” Kamei lev kros khou thaengc nchamc bammei nei tei rui ni kata sinnui the.

³³Kalaanv ganvdak ruhna kanei khou mi kandic kapwm tei zingc guangna tingzyn ganvdak kathumh nganv zingc the.

³⁴Mi ganvdak khou tei Jisu rui kauc ranvna, “Eloi, Eloi, Lama Sabakthani?” twna kauc pat the. Mi kabac kiu thu, “ARacguangc, ARacguangc, tabui swna nang ata mpatlou tu cho?” twna e.

³⁵Kadaeng khou ding bammei gaanvsaekc rui hei tei chu lana, “Zauclo, kamei Elija ta kaw bam e!” twna sa the.

³⁶Khoutei gaanv khat drakha zouc khianghmei khou langhpanv kumhmei akhat ntin lana ntou zwan twan khou louna pak guangna Jisu khang tii the. Khoutei, “Nkhwan o, kata laa key khang Elija kiu guang puni ny zauc kho!” twna sa the.

³⁷Tiki Jisu tei kauc ranvna kauc patlouna kabuc tut kan the.

³⁸Khoutei Ravkai tuang khamvthingh phey tei kapy ruc thangc rui kandih ana nganv, kanei khang siat kaek kan the.

³⁹Kadaeng khou ding bammei rihpypu tei, mi kumcna kabuc tut kanmei[27] ta tei how lana, “Kalingna kamei hei Ravguangc Nac Mpouh lana di the!” twna sa the.

⁴⁰Khoutei, ntumei nunc ni duh thangc rui phaengc bam khwan e. Mi nunc pang khou kiu, Magadaleni Meri, Jakob alaucmei lev Josi pui Meri khatni Solomi kazauh khwan e.

⁴¹Mi nunc hei kamei Galili khou bammei douc rui kathei lay tatna kasiamruai sw bammei nunc e. Kathei Jerusalem khou lay nganghmei pui nunc mpeyna ni mi khou tei kazauh the.

⁴²Tingzyn key pwkhou, (hei tei chamdaanvmei tingmik twmei thu nthuanh thauna Sabbathneic nimei tingmik tina,)

⁴³pei khou chakhwang sw bammeipu khatni Ravguangc guangcdic ta agwnna bammeipu Arimathiamei Josep guangna, baucna Pilat daeng thangc tatna Jisu pumc tei ney the.

⁴⁴Khoutei Jisu tei theic the twmei chu la khou, Pilat tei ngak the. Kumna rihpy ta tei kawna Jisu tei theihmei kanak the ny twmei thanv the.

⁴⁵Kumna rihpy khou tei rui thay nthan lana kapumc tei Josep khou tiilou the.

⁴⁶Pheynuaihna mphwanmei liuna, kapumc tei laa keyna, mi phey tei rui kazihlou the. Kumna ntauh khou langcloumei tarou lang khou lou the. Mi tarou kaimun tei ntauh rui luangc thingclou the.

⁴⁷Kata mbeihlou kanmei bamv tei Magadaleni Meri lev Josi pui Meri how khwan e.