Read Rongmei Naga MARK 16 Bible Online

MARK 16 - Rongmei Naga bible

MARK 16

¹Sabbathneic tei luai pwkhou, Magadaleni Meri, Jakob pui Meri khatni Solomi kaniw tei tatna Jisu khou teylou khang namh gaymei thauc liu the.

²Kumna neidak tuang reymei nungc, zaic sihna, neih pat khou, tarou khou tei kaniw guang the.

³Khoutei, “Tarou kaimun tauc tei thow rui aniu khang thui patlou nina cho?” twna kaniw sa bam khwan e.

⁴Tiki kaniw zauc pwkhou, hei tei luangc patlou bammei ta kaniw how the. Mi tauc tei daic sih khwan e.

⁵Kumna tarou lungc khou tei gut pwkhou chabwan gaanv khat pheychuanh mphwanmei piuna baanzat biak thangc dungc bammei ta kaniw how the. Khoutei kaniw kaluang the.

⁶Khoutei kamei rui kaniw khou sa the, “Ping riu, kros khou thaengcluai kanmei Nazarethmei Jisu ta nangniw phu bam tuang e. Kata tiringcthaulou kan the. Kamei mi khou hei bam mak khe. Kata nziloumei bamv hei zauc tho.

⁷Tiki nangniw tat tho, kumna kaziap nunc khatni Pitar khou, ‘Kamei Galili thangc nangniw hu tat kasuakc kan the, kamei rui nangniw khou saloumei tei kumcna, nangniw kata mi khou tei how puni the,’ twna salou ti tho.”

⁸Kaniw ping kadunhna pat lana, tarou khou tei rui pak kan the. Kaniw meic gaanv khat na khou sini lat khat na sini salou mak ge. Kalam thu kaniw ping the.

⁹Neidak tuang reymei nungc, khwanzingh kamei ringcthau lana, kakhou rui ravsic chanei nthau gancloumei pui Magadaleni Meri khou lyanlou rey the.[28]

¹⁰Kamei tat lana kapna huay bammei Jisu thei laymei nunc khou dinclou the.

¹¹Jisu ringc bam de, kumna mi pui tei rui how the twmei kaniw chu the, tiki kaniw lwm mak khe.

¹²Mi tangv hei kaniw pang khou rui namv thangc tat bammei gaanv nei khou Jisu rui kalwn baihmei khou lyanlou the.

¹³Khoutei kaney hanc guang datna bam duhmei nunc khou tei poulou the. Tiki kaniw lwm mak khwan e.

¹⁴Mi tangv ziap ruhna khat tei nap tu khang dungc bam khou kata lyanlou the, kumna kaniw rui lwm makmei khatni kaniw lung tanhmei khang tei rui Jisu rui kaniw ta luh the. Kalam thu kamei ringcthau datmei tangv kata howmei nunc ta tei kaniw lwm mak khe.

¹⁵Khoutei kamei rui kaniw khou sa the, “Nangniw mbaanv kapwm khou tatna gaychamv hei meic kathuicna khou dinclou o.

¹⁶Lwmlouna duiluppui mei ta tei kanlou puni, tiki lwmlou makpui mei ta tei thu kanlou mak ge.

¹⁷Lwmloumei nunc khou tei mi sw-nchinmei guay hei tiilou puni: Azanc khou kaniw ravsic nunc ta nthau ganc puni; kaniw lat thanh sa puni;

¹⁸kaniw nrui sin thau sini khatni mei theic nuhpui hu kaniw zangv sini, hei tei rui kaniw ta kabiu lak ge; nnaumei nunc khou kaniw baanc bouclou pwkhou gay dat puni.”

¹⁹Kumna kamei kaniw khou kadylou tang pwkhou, Poubauhmei Jisu ta, tingkauh thangc laa thau kan the. Kumna kamei Ravguangc tuang baanzat thangc dungc kan the.

²⁰Mi tangv tei kaniw tat patna kabamv kathuic khou chamv tei dinc the. Kumna Poubauhmei rui kaniw ta taanc nduanghlou the khatni kaniw khou tiiloumei sw-nchinpui taanv rui kaniw lat tei kaling e twmei lyanlou the.