Read Rongmei Naga MARK 2 Bible Online

MARK 2 - Rongmei Naga bible

MARK 2

¹Zaeng ramhbiuc dou tangv, Jisu Kapharnahum khou guang bam dat khou, kamei kai khou bam e twmei chu the.

²Mi khou tei meic mpeyna guang kaduaina, kaimun paengc khou tei sini chan mak khe. Mi khou tei Jisu rui meic nunc khou tei lat dinc bam khwan e.

³Khoutei kapaek theihmei gaanv khat ta gaanv padeih rui puancna Jisu daeng khou guang khwan e.

⁴Meic geic langv tina Jisu daeng khou puanc guang tangc ngam mak la thena, Jisu bammei kaanv khou kai nam ra phouna kaniw rui mi pu ta tei kamei zip bammei kazy mbam tei mpat key the.

⁵Khoutei Jisu kaniw ramlum tei how la khou, “Abungle, nang paap guay kuaklou the,” twna kapaek theihmeipu khou tei sa the.

⁶Mi khou tei Riakdanv dinhpouc gaanvsaekc dungc bam khwan e. Kumna kaniw rui kaniw lungning khou mi kumcna kakhanh bam khwan e:

⁷“Mi pu hei tabui zaeng rui mi kumna sa tu cho? Kamei hei Ravguangc ta thouhsw makpui tuang di the. Ravguangc na hamhna thow rui paapc kuaklou ngam nina cho?”

⁸Mi kumna kaniw kakhanh bammei tei Jisu kalungning khou thay lana kaniw khou sa the, “Tabui zaeng rui nangniw mi kumna kakhanh bam tu cho?

⁹Kapaek theihmeipu khou hei, ‘Nang paap guay kuaklou the,’ twna samei chiw ni, ‘Nang tuang zy laa thauna tat tho,’ twna samei chiw cho?

¹⁰Meic Nac Mpouh hei paapc guay kuaklou khang kandih khou kangamv nai e twmei nangniw thay khang, (kamei rui kapaek theihmeipu khou tei sa the)

¹¹ai rui nang khou sa e: Thau tho, nang zy laa thauna nang kai thangc tat tho.”

¹²Khoutei kamei thauna katuang zy laa thauna meic guayna hu khou tei tat pat kan the. Kum tina kaniw guay ngakna, “Mi kumhmei hei aniw how zat mak he!” twna sana Ravguangc hym thuanc the.

¹³Jisu zeihlat paengc khou tei tat pat dat khou meic kangdai kadaeng khou guang khwan e, kumna kamei rui kaniw khou nchamlou bam khwan e.

¹⁴Khoutei kamei tat pat khou Alphia nac mpouh Levi dihkhav laamei kai khou dungc bammei ta how lana, “Athei lay o,” twna kakhou sa the. Khoutei kamei thauna Jisu thei lay the.

¹⁵Jisu Levi kai khou[5] nap tu khang dungc bam khou dihkhav kakhamei khatni paapcmei meic mpeyna Jisu khatni kaziap nunc lev dungc kariu bam khwan e. Kalam thu kathei laymei mpeyna khwan e.

¹⁶Riakdanv dinhpouc Pharisimei nunc rui Jisu paapcmei nunc khatni dihkhav kakhamei nunc lev tu nchamc bammei ta how lana, “Tabui swna kamei dihkhav kakhamei nunc khatni paapcmei nunc lev tu nchamc bam tu cho?” twna kaziap nunc khou sa the.

¹⁷Hei tei chu lana Jisu rui kaniw khou sa the, “Kapumc gaymei nunc khang ravtow amuc kage maek ge; nnaumei nunc khang de. Ai guangmei thu ravchaptatmei nunc ta kaw khang hamh e; paapcmei nunc ta kaw khang de.”

¹⁸Kaganv akhat khou Jahon tuang ziap nunc khatni Pharisimei nunc munthiangc bam khwan e. Khoutei meic gaanvsaekc guangna Jisu khou sa the, “Jahon ziap nunc khatni Pharisimei ziap nunc thu munthiangc bam ki tabui swna nang ziap nunc thu munthiangh makna bam tu cho?”

¹⁹Khoutei Jisu rui kaniw khou sa the, “Nowpouc bam khou nowpouc pam nunc tei munthiangc bam ngam di nah cho? Nowpouc tei bam saanv thu kaniw munthiangc ngam ni tu hamh e.

²⁰Nowpouc ta tei kaniw khou rui laa tat kanmei ganv guang puni, mi nungc kiu kaniw munthiangc puni.

²¹“Meic gaanv khat na sini sou makmei phey thanh, phey raan khou khuamlou mak ge. Kalam thu phey thanh tei rui zay pwkhou kaek kasic ranv puni.

²²Meic gaanv khat na sini ramh gic muanc raan khou drakha zouc thanh lou mak ge. Kalam thu drakha zouc tei rui mi muanc tei phungc bak puni. Kumna drakha zouc tei ni muanh tei ni maan puni. Drakha zouc thanh thu muanh kathanc khou lou tuang de.”

²³Sabbathneic akhat khou Jisu laupuk khou tat ruan pat khwan e. Kumna kaniw tat bam khou kaziap nunc nap guy chunc thau the.

²⁴Khoutei Pharisimei nunc rui, “Zauclo, Riakdanv thei layna Sabbathneic taanc nupui taanv tabui swna kaniw taanc bam tu cho?” twna Jisu khou sa the.

²⁵Khoutei Jisu rui kaniw khou sa the, “David khatni kamei nunc tei tu khang maekna ndaapcna bampui ganv khou David rui tabui sw kan tu cho twmei nangniw pac zat mak he nah cho?

²⁶Abiathar rui tingkuh sw bampui ganv khou David tei Ravguangc kai khou gutna amuh nunc na hamhna meic baihmei tu numei Ravguangc khang katloumei tyan tei kamei tu khwan e, kumna kathei laymei nunc khang ni tii khwan e.”

²⁷Kumna Jisu rui kaniw khou sa the, “Sabbathneic hei maansei khang swlou tuang de, maansei hei Sabbathneic khang damclou tu hamh e.

²⁸Hei zaeng rui, Meic Nac Mpouh hei Sabbathneic tuang kaipouc ni e.”