Read Rongmei Naga MARK 3 Bible Online

MARK 3 - Rongmei Naga bible

MARK 3

¹Jisu sinagog ku dat khwan e. Mi khou tei kabaanc akhat theihmeipu gaanv khat bam khwan e.

²Kaniw Jisu khuay nym khang kamei rui mi pu ta tei Sabbathneic tigaylou puni ny twna kaniw zauc bam khwan e.

³Khoutei Jisu rui kabaanc theihmeipu khou tei, “Nang thauna hu khou guang o,” twna sa the.

⁴Khoutei kamei rui kaniw khou tei sa the, “Riakdanv thei layna Sabbathneic sw gayloumei nchumh ni sw kasicloumei nchumh cho, sw ringcloumei nchumh ni, sw theicloumei nchumh cho?” Khoutei kaniw lat daw mak khe.

⁵Khoutei Jisu kaniw ta kalung puamcna zauc kari haengvna zauc the. Kaniw lung tanhmei khou tei kalung mpeyna kabiu the. Kumna kamei rui mi pu khou tei, “Nang baanc ntyng pat ro,” twna sa the. Khoutei kamei kabaanc ntyng pat the, kumna kabaanc tei gay dat the.

⁶Khoutei Pharisimei nunc tei tat pat lana kata swluai khang Herodmei nunc lev kaluak kalat kaphianh the.

⁷Khoutei Jisu kaziap nunc lev zeihlat thangc ley tat kan the. Khoutei meic kangdai kathei lay guang khwan e: Kaniw tei Galili khou rui, Judia khou rui,

⁸Jerusalem khou rui, Idumia ramv khou rui, Jordan neihpat ramv khou rui, Tur lev Sidon gaengv zaengv khou rui, Jisu rui taanc kanmei guay tei chuna guangmei nunc e.

⁹Khoutei meic kangdai tei rui kata hic bin ni kumc guang ti thena kakhang hih akhat chamdaanvlou khang kaziap nunc khou sa the.

¹⁰Kalam thu kamei rui meic mpeyna ta tigaylou the, kum tina ravpuat naimei guay tei kata kahi khang ran gut the.

¹¹Nthan makmei bumaengc nunc rui kata how pwkhou kahu khou pun nkhum laamv keyna, “Nang hei Ravguangc Nac Mpouh e,” twna kaucna sa raph rap khwan e.

¹²Khoutei kaniw rui kata dinc ndauh nuh mak ge twna tancna latdanv tiilou the.

¹³Khoutei Jisu chyngbut khou kuna kamei rui kahawmei nunc ta kadaeng khou guang khang kaw the. Khoutei kaniw tat patna kadaeng khou guang the.

¹⁴Kumna kamei rui ziap ruhna kanei kasiamh the. Kaniw tei kadaeng khou bam khang kumna chamv dinh khang ndiu pat khang,

¹⁵khatni ravsic nunc ta nthau ganh khang ngamv tiilou khang e.

¹⁶Mi nunc kiu thu: Kamei rui Pitar twmei zancphuakh tiiloumei Simon;

¹⁷Zebedi nac mpouh Jakob khatni kakainac Jahon (kamei rui kaney khou Boanerges twmei zancphuakh hei tiilou e— mi kabac thu ganh nac mpouh nei twna e);

¹⁸Andriu; Philip; Bartholomiu; Metthiu; Thomas; Alphia nac mpouh Jakob; Thaddia; Simon Kanania;

¹⁹khatni Jisu ta zuanctumei Juda Iskariot.

²⁰Mi tangv Jisu kai khou guang dat the. Mi khou tei meic kangdai guang dat tina tu zangvpui ganv khang sini maek khe.

²¹Hei tei chu lana kamei mba the twna sana kakai mei nunc kata nym khang guang the.

²²Jerusalem thangc rui keymei Riakdanv dinhpouc nunc rui, “Kakhou Bilzebul[6] gut the, kum tina ravsic kaipouc pumtan rui kamei ravsic nunc ta nthau ganc bam tuang e,” twna sa the.

²³Khoutei Jisu rui kaniw ta kadaeng khou kaw guangna latgiam zayna kaniw khou sa the, “Akumhna Seitaan rui Seitaan ta nthau pat ngam nina cho?

²⁴Guanghdic akhat tei kalangv patna khat khat ta sw key khang sw e thei, mi guangcdic tei ding ngam mak ge.

²⁵Kaikhunh akhat tei kalangv patna khat khat ta sw key khang sw e thei mi kaikhunc tei ding ngam mak ge.

²⁶Seitaan rui Seitaan ta sw key khang sw e thei, kamei ding ngam ni tu hamh the; kakhang luaimei di the.

²⁷“Kapumc tanhmeipu kai biu ni tw e thei, tanhmeipu ta tei karakclou rey makna thu kakai gut ngam mak ge; karakclou pwkhou rui kakai biu nina de.

²⁸“Ai rui nangniw khou kaling siakna sa tuang e: Maansei nac nunc rui taancloumei paap guay khatni Ravguangc ruc khou simei lat saloumei[7] heizumei tei kuaklou puni de;

²⁹tiki Bumaengh Nthanmei ta thouhsw makna saloupui mei ta tei thu kuaklou dat zat ni tu hamh the. Kalam thu tingsaeng tuang paap nai the.”

³⁰Kalam thu kaniw rui, “Kakhou simei bumaengc gut the,” twna sa bam tina e.

³¹Khoutei Jisu pui khatni kakainac nunc guangna kaizaengc khou dingna kata kawlou khang meic ndiulou khwan e.

³²Khoutei meic kangdai kadaeng dungc huamc bam khwan e. Kumna kaniw rui kakhou, “Nang pui lev nang kainac nunc kaizaengc khou nang ta ariw niina nkhwan bam e,” twna sa the.

³³Jisu rui mundawna kaniw khou sa the, “Thow tei apui cho? Thow tei achaic akainac cho?”

³⁴Khoutei kadaeng dungc haengv bammei nunc ta tei zauc kari haengvna kamei rui sa the, “Zauclo, mi hei apui khatni achaic akainac nunc the!

³⁵Ravguangc rui ningmei taanhpui mei tei achana the, atanpui the, khatni apui the.”