Read Rongmei Naga MARK 4 Bible Online

MARK 4 - Rongmei Naga bible

MARK 4

¹Jisu Galili zeiclat paengc khou nchamlou thau dat khwan e. Khoutei meic kangdai kadaeng khou huamc guang tina kamei hih khou gutna dungckey the. Kamei dui lungc khou, kumna meic kangdai tei dui paengc khou bamv the.

²Khoutei kamei rui latgiam zayna kaniw khou lat mpeyna nchamlou khwan e. Kamei rui kaniw khou kumna sa the:

³“Nking o! Meic gaanv khatpu napphwn nrou khang tat pat the.

⁴Kamei rui nrou pat khou asaekc chaengluang khou keylou the, kumna nruayna nunc guangna hei tei tu kan the.

⁵Asaekc rui taniang katitnamei taulaengc ruc khou keylou the. Taniang katitna tina hei tei katumcna thau pat the,

⁶tiki neih tanc pat pwkhou kamaan maek tina hei tei phauc luai kan the.

⁷Asaekc rui sauh bang ding khou keylou the, kumna sauh bang nunc tei daic thauna mi ta tei zyn luai kan the. Kumna hei tei kathai nthai mak khe.

⁸Asaekc rui kandih gaymei khou keylou the. Mi guay tei kak patna daic thau the, kumna kathai nthai the: asaekc rui kathw tamruc, asaekc rui riakcharuk, asaekc rui phay khat nthai the.”

⁹Khoutei Jisu rui sa the, “Chu khang nukuanc naimei guay chu la tho!”

¹⁰Jisu karana bam khou kadaeng khou bammei nunc khatni kaziap ruhna kanei tei rui mi latgiam lam khou tei thanv the.

¹¹Khoutei kamei rui kaniw khou sa the, “Ravguangc guangcdic tuang meic thay makmei tei nangniw khou dinclou the, tiki mpaeng thangcmei nunc khang thu latgiam khou rana salou the.

¹²Kalam thu, kaniw zaucna zaucna how mak khang khatni chuna chuna kabah thay mak khang e. Kum mak ge thei kaniw lungh laic guang datna kaniw ta kuaklou dat kan punina e.”

¹³Khoutei Jisu rui kaniw khou sa the, “Nangniw mi latgiam kabac hei thay mak nah cho? Kum e thei akumhna nangniw latgiam guay kabac hei thay ngam nina cho?

¹⁴Napphwn nroumeipu tei rui lat nrou the.

¹⁵Lat tei nroupui bamv khou meic gaanvsaekc thu chaengluang khou keyloumei thw kumhmei tuang e. Kaniw rui lat tei chupui lev kaluak kalat Seitaan guangna kaniw khou nrouloumei lat tei laa ganc kan the.

¹⁶Hei tei kumcna taulaengc ruc khou keyloumei nunc kiu mi hei e: Lat tei chu pwkhou kaniw kaluak kalat neihlana laalou the.

¹⁷Kaniw khou kamaan maek ge, tiki matak khat thu khaengvlou the. Kumna lat zaeng khou tei rui ryanramei hamh e thei rairiumei guang pwkhou kaniw bow nuangc kan the.

¹⁸Baihmei sauh bang ding khou keyloumei nunc kiu mi hei e: Kaniw lat tei chu the,

¹⁹tiki mi kandic tuang ramlung khang kapaamvmei, syan kahawmei khatni baih baihmei ta kahawmei rui lat ta tei zyn luai the. Kumna hei tei kathai nthai mak khe.

²⁰Kandih gaymei khou nrouloumei kiu mi hei e: Kaniw lat tei chu lana laalou the kumna kathw tamruc, riakcharuk khatni phay nthai the.”

²¹Khoutei Jisu rui kaniw khou sa the, “Nangniw thauhmai laa guangmei tei kahyang khou dungclou khang hamhna giupaekc bangc khou hamh e thei laeng bangc khou lou khang di nah cho?

²²Kalam thu nkamhlou bammei guay tei ndauh pat khang e, khatni gumbinlou bammei guay tei laanc pat khang e.

²³Chu khang nukuanc naipui mei tei chu kan diu!”

²⁴Khoutei Jisu rui kaniw khou sa the, “Nangniw chumei tei zauc chuy la tho. Nangniw rui ndatloumei dath tei nangniw khang ndatlou dat puni, kumna haap sini haaplou puni.

²⁵Kalam thu naipui mei khang tei tiilou puni; khatni maekpui mei khou tei rui kakhou naimei na tei sini kakhou rui laa tat kan puni.”

²⁶Khoutei Jisu rui sa the, “Tingkauh guangcdic kiu mi hei kumh tuang e: Gaanv khatpu rui kalaupuk khou napphwn nroulou the.

²⁷Zingbangc kalaanv kamei zip kan khou ni rak bam khou ni kabwan tei thau patna daic thau the. Hei tei akumhna daic thau cho twmei kamei thay mak ge.

²⁸Kandih rui reyliang khou kanuy, mi tangv kaguy tipat the. Kumna kaguy khou tei nap thu minc pat the.

²⁹Nap tei minc pat rappui lev kamei baengkhuai sinna tay the. Kalam thu taypui ganv tangc the.”

³⁰Jisu rui sa the, “Ravguangc guangcdic hei tabui lev kida kho cho, hamh e thei mi khang hei tabui latgiam sinsw kho cho?

³¹Mi hei gannaeng thw kumhmei tuang e: Lingc keypui ganv khou thu kandih nam ruc khou nthyam liangmei thw swna lingclou the.

³²Tiki hei tei lingc keylouna thaupui ganv khou thu, gan bang pang khou daic liangmei bang sw dat the. Kachy tadi tadi baanc patna mi phwam khou tei nruayna nunc kabou dwan the.”

³³Mi kumhmei latgiam mpeyna rui Jisu rui kaniw khou, kaniw rui chulou diw saanv lat dinc the.

³⁴Latgiam kazauh makna kaniw khou sa mak ge, tiki kaniw rana bam datpui ganv khou, kamei rui mi guay tuang kabac guay tei kaziap nunc khou dinclou dat khwan e.

³⁵Mi tangv tei tingzyn key pwkhou Jisu rui kaziap nunc khou, “Aniu zeihlat kaan pat di kho,” twna sa the.

³⁶Kumna meic kangdai ta tei ganclouna Jisu dungc bammei hic khou ziap nunc tei gutna kaniw rui kata nduangh tat the. Mi khou tei hih baih baihmei ni nai khwan e.

³⁷Khoutei puanzingh tanhmei guangna dui luat rui hih khou tei guang kapyang the. Kumna hih tei dui rui padik ni kumc the.

³⁸Khoutei Jisu thu hihmai thangc pyban mbanna zip bam khwan e. Khoutei kaniw rui kata nchyang thauna, “Dinhpouc, aniu theic ngam nina bammei ti hei nang thu kadanmei tuang maek nah cho?” twna sa the.

³⁹Khoutei kamei thauna puanzingh ta tei luhna, “Reih rei o! Rimh rim o!” twna zeihlat khou tei sa the. Khoutei puanzingh tei nthaekc kan the khatni nchwng rimh rim kan the.

⁴⁰Khoutei kamei rui kaniw khou sa the, “Nangniw tabui swna heidi ping bam tu cho? Akumh tina nangniw khou lwmmei maekna cho?”

⁴¹Khoutei kaniw ping dai ping the, kumna kaniw khat khat khou, “Mi pu hei akumhpui mei lana cho! Puanzingh khatni duipui rui nganvna kalat piu mei hei” twna sa the.