Read Rongmei Naga MARK 5 Bible Online

MARK 5 - Rongmei Naga bible

MARK 5

¹Jisu khatni kaziap nunc zeihlat kaan patna Gereseni ramv khou guang the.

²Khoutei kamei hih khou rui tat pat pwkhou nthan makmei bumaengc gutmeipu tarou bamv khou rui guangna kata ariw the.

³Kamei hei theihmei nunc ta mbeihloupui bamv khowlang khou kabamv sw bammeipu khwan e. Kamei hei meic gaanv khat na rui sini pareiriang rui sini bangc ding dat ngam makna bammeipu khwan e.

⁴Kati hei kang rui khatni pareiriang rui bangclou dat dat tisini pareiriang ni, kang ni dingchaek ngam mak khwan e. Kumna meic gaanv khat na sini kata sin bow dat ngam mak khwan e.

⁵Kamei zingbangc kalaanv tarou bamv khou tei khatni luanghbut pang khou tei kaucna kaucna kata ntauh rui diangc zamhna bam khwan e.

⁶Khoutei kamei duh thangc rui Jisu ta how lana pak guangna kata kalum the.

⁷Khoutei kamei kauc ranvna sa the, “Kauh Liangmei Racguangc Nac Mpouh Jisu, nang lev anei tabui tuang sw khang naina cho? Ravguangc zanc saancna samei tuang e: ata raikasiclou rio.”

⁸Kalam thu Jisu rui kakhou, “Nthan makmei bumaengc, nang mi pu khou rui tat pat kan o,” twna sa the.

⁹Khoutei Jisu rui, “Nang zanc thow cho?” twna thanv ti khou, “Azanc thu ‘Legion’ kaw e, kalam thu aniw mpeyna e,” twna daw the.

¹⁰Khoutei kaniw ta mi ramv paengc thangc tei thouc ganclou mak khang kamei rui Jisu khou sa ranv sihna sa khwan e.

¹¹Mi khou tei chyngbut naek khou guak kangdai akhat kataek mpac tu bam khwan e.

¹²Khoutei, “Aniw ta guak pang khou tei ndiulou o, aniw kaniw khou gut ni the,” twna kaniw rui Jisu khou huaycha the.

¹³Khoutei Jisu rui nuhlou the. Kumna nthan makmei bumaengc nunc tei patna guak nunc khou tei gut the. Khoutei guak ching nei dou kakhum khou tei saeng keyna zeihlat khou tei zuanglouna dui alip luai kan the.

¹⁴Khoutei guak sianmei nunc tei rui pak tatna kaidai khou tei khatni namv guay khou tei poulou the. Kumna pat kanmei guay tei zauh khang meic mpeyna guang the.

¹⁵Khoutei kaniw Jisu daeng khou guang pwkhou ravsic pang gutmeipu tei pheybaan piuna, meic paek pat datna dungc bammei ta how pwkhou kaniw ping the.

¹⁶Ravsic gutmeipu khatni guak nunc khou tei akumhna pat kan cho twmei, howmei nunc rui kaniw khou raclou the.

¹⁷Khoutei kaniw tuang ramv khou rui tat pat kan khang kaniw Jisu khou sa the.

¹⁸Jisu hih khou gut kan ti khou ravsic gutmeipu tei rui kadaeng khou bamv ni the twna sa the.

¹⁹Tiki Jisu rui nuhlou mak khe. Kumna kakhou sa the, “Nang kai thangc tat tho kumna Poubauhmei rui nang khang heizu taanclou kanmei tei khatni nang ta nzianloumei hei nang kai kaikhunhmei nunc khou raclou ti tho.”

²⁰Khoutei kamei tatna Jisu rui kakhang taancloumei heizumei tei Dekapolis khou dinclou the. Khoutei hei tei chumei guay ngak sakh sak the.

²¹Jisu hih tuangcna dui paengc akhat thangc kaan pat dat pwkhou, meic kangdai kadaeng khou guang the. Khoutei kamei zeihlat paengc khou bam khwan e.

²²Khoutei sinagog tuang kapyswmei gaanv khat, kazanc Jairas twmeipu guangna Jisu ta how pwkhou, kaphaypav daeng khou pun nkhum laamv keyna,

²³huaycha ranv sihna, “Anac aluh launa akhat theic changh theic kan nina bam the. Kamei gay datna ringh khang nang guangna karuc khou nang baanc bouclou o,” twna sa the.

²⁴Khoutei Jisu kamei lev tat pat the. Meic kangdai ni kathei layna kata huamcna tat bam khwan e.

²⁵Khoutei tingkwm ruhna kanei zeina bammeipui,

²⁶ravtow amuc mpeyna khou kasiamhna katuang naimei guay nting ngam sini gay maihmei phaan si katynna bammeipui,

²⁷Jisu lam khou chu lana meic pang khou tei kathei thangc rui guangna katuang phey tin kahi the.

²⁸Kalam thu, “Katuang phey tin na sini kahilou ti thei ai gay dat puni,” twna kamei ning khwan e.

²⁹Khoutei kadyng khou zei tei phui kan the, kumna katuang ravpuat tei gay dat the twmei kapumc khou thay the.

³⁰Jisu kakhou rui pumtan pat kan the twmei kadyng khou thay lana meic kangdai khou tei karih patna, “Thow aphey tin kahi tu cho?” twna sa the.

³¹Khoutei kaziap nunc rui, “Meic kangdai nang ta ahyna tat bammei nang thay the, tabui swna, ‘Thow ata kahi tu cho?’ twna sa tu cho?” twna sa the.

³²Kumna kaphey tin kahimeipui ta tei zauc kari kariangna phu khwan e.

³³Khoutei pat kanmei tei thayna mi pui tei ping kadunhna guang the, kumna Jisu hu khou nkhum laamv keyna kalam guay tei kaling raclou the.

³⁴Khoutei Jisu rui kakhou sa the, “Alule, nang ramlum rui nang ta tigaylou the. Chuzaenghna tat tho, kumna nang tuang ravpuat khou rui gay nthan thiak tho.”

³⁵Jisu mi hei sa bam khou, sinagog tuang kapypu kai khou tei rui meic gaanvsaekc guangna, “Nang nacpui tei theic the, dinhpouc ta sw katuakc bam dat nangh khe.” twna sa the.

³⁶Sa bammei lat tei chulou makna[8] Jisu rui sinagog tuang kapypu khou tei, “Ping riu, lwm rap bo,” twna sa the.

³⁷Khoutei Pitar khatni Jakob lev kakainac Jahon na ta hamhna baihmei guay ta kathei lay tat khang nuhlou mak ge.

³⁸Kaniw sinagog tuang kapypu kai khou tei guang pwkhou, kapna kaucna kachin karo bammei ta Jisu how the.

³⁹Khoutei Jisu gutna kaniw khou sa the, “Tabui swna nangniw kapna kachin karo bam tu cho? Mi nac hei theih mak ge, zip bam tu de.”

⁴⁰Khoutei kaniw kata nuic the. Kumna Jisu rui kaniw ta kapaengc thangc tipat ngam lana, angana pui pu tei lev kamei nduangh guangmei nunc na ta nduanghna mi nac tei lou bammei bamv khou tei gut the.

⁴¹Mi nac baanc tei sinna Jisu rui kakhou tei, “Talitha kumi” twna sa the. Mi kabac kiu thu, “Tuna launale, ai rui nang khou sa e: Thau tho,” twna e.

⁴²Khoutei kadyng khou mi nac tei thauna tat thau the. Kamei tingkwm ruhna kaneimei nac di the. Khoutei kaniw ngak the.

⁴³Hei tei meic gaanv khat na khou sini tithay pat mak khang ranv sihna kakhimlou the. Kumna kakhang tu khang tii ti tho twna sa the.