Read Rongmei Naga MARK 6 Bible Online

MARK 6 - Rongmei Naga bible

MARK 6

¹Jisu mi khou tei rui tat patna karamc kaidai khou guang the. Khoutei kaziap nunc ni kathei lay guang the.

²Kumna Sabbathneic guang pwkhou kamei rui sinagog khou nchamlou thau the. Khoutei nking bammei meic mpeyna ngakna sa the, “Mi pu hei mi guay hei tabui thangc rui laa lana cho? Kakhou tiiloumei hei akumhmei ningting lana cho? Mi kumhmei charynmei taanv kabaanc khou rui pat bammei hei!

³Mi pu hei Meri nac khatni Jakob, Josi, Juda khatni Simon chaic thing taanhmeipu tei hamhna cho? Kakainac aluh nunc ni mi khou hei aniw lungc nchamc bam tu hamhna cho?” twna sana kaniw kakhou phaysuy the.

⁴“Muhzwng ti hei kanamv nac, kakai kaikhwangmei khatni kakai kaikhunhmei hamhna chakhwang swlou mak mak ge,” twna Jisu rui kaniw khou sa the.

⁵Kumna nnaumei gaanvsaekc na ta kabaanc bouclouna tigayloumei hamhna, kamei mi khou tei charynmei taanv taanclou ngam kan mak khe.

⁶Kaniw rui lwm mak ti khou tei kamei ngak the. Kumna Jisu namv guay khou tat lianglouna nchamlou the.

⁷Kumna kamei rui ziap ruhna kanei ta tei kadaeng khou kaw guangna gaanv nei gaanv nei ndiu pat the. Nthan makmei bumaengc ta nthau ganh khang kaniw khou ngamv tiilou the.

⁸Kumna builwang na hamhna ramh baihmei—ntyan ni, khau ni, bungkam khou syan ni phungh riu;

⁹tiki phaythuapc tuangcna thiula kanei nu makna tat ro twna sa the.

¹⁰Kamei rui kaniw khou sa the, “Tabui bui bamv khou pw ni nangniw guanglou pwkhou, mi bamv khou tei rui tat pat dat mak saanv, kaibang kalaih riu.

¹¹Tiki nangniw ta laalou makmei khatni nangniw lat nkinglou makmei bamv khou tei thu, mi khou tei rui nangniw tat pat dat ni khou kaniw ruc khou sakhi khang nangniw phaypav niang kadiw keylou duc o.”

¹²Khoutei kaniw tat pat lana lungh laic nina e twna dinc the.

¹³Kumna ravsic mpeyna ta nthau ganclou the khatni nnaumei mpeyna ta thauh teylouna tigaylou the.

¹⁴Khoutei guangh Herod[9] tei Jisu pary chu the. Kalam thu Jisu zanc tat thau the. Khoutei, “Kamei hei duiluploumei Jahon tei ringcthau dat lana di the, kum lana mi kumhmei charynmei pumtan guay hei kakhou nai bam tuang the,” twna meic gaanvsaekc rui sa the.

¹⁵Tiki baihmei gaanvsaekc rui, “Kamei Elija de,” twna sa the. “Kamei muhzwng akhat re, rey nungc muczwng kumhmei akhat re,” twna baihmei rui sa the.

¹⁶Tiki hei tei Herod chu lana, “Mi hei ai kapy dangv kanmei Jahon tei ringcthau dat lana di the,” twna sa the.

¹⁷Kalam thu kamei rui asut kawmei kakainac Philip now Herodia zaeng rui Herod kamei rui Jahon ta nymna kangkai khou bangclou khwan e.

¹⁸Tabui cho tiki, Jahon rui Herod ta, “Nang kainac now ta kawmei hei nang nchumh mak ge,” twna sa bam tina e.

¹⁹Kum tina Herodia tei Jahon ta karaeng the, kumna kata swluai nii the. Tiki swluaimei chaeng maekna bam khwan e.

²⁰Kalam thu Jahon hei ravchaptatmei khatni nthanmei mei e twmei Herod thayna kata ping e. Kumna kata swluai mak khang gaekna lou bam khwan e. Herod tei Jahon lat tei chu pwkhou ramh sw la khang thay mak khe; tiki kalat nking niina nking bam khwan e.

²¹Herod rui katuang ricmei nunc, khatni meicdaihmei nunc khatni Galili tuang meicpy nunc ta kata puanhmei ngai khou napkaw pw khou, kadouchamei tingmik guang khwan e.

²²Khoutei Herodia nacpui[10] gutna alaamh the, kumna Herod khatni kamei lev dungc nchamc bammei guay ta tei tipianlou the. Kum tina guangh tei rui mi nacpui khou tei, “Nang rui kahaw hawmei ney o, ai tii puni.

²³Nang rui ney neymei, atuang guangcdic kapaek nganvna tii puni,” twna kakhou latryan swlou the

²⁴Khoutei mi nacpui tei tat patna, “Ai tabui ney kho cho?” twna kapui khou thanv the. Khoutei, “Duiluploumei Jahon py tei,” twna kapui rui sa the.

²⁵Khoutei kamei kaluak kalat guangh daeng khou guangna, “Duiluploumei Jahon py syandaih kuak khou louna ntaw dyng khou akhou tiiloumei ta ai kahaw e,” twna sa the.

²⁶Khoutei guangh tei kalung mpeyna kabiu the, tiki kalatryan khatni kamei lev dungc nchamc bammei nunc zaeng khou tei rui kamei piu mak ngam mak khe.

²⁷Kadyng khou guangh tei rui latdanv patna Jahon py laaguang khang rihmei gaanv khat ta ndiulou the. Kumna kamei kangkai thangc tatna Jahon py dangv the.

²⁸Kapy tei syandaih kuak khou puanc guangna tunacpui khou tei tiilou the. Kumna kamei rui kapui khou tiilou the.

²⁹Khoutei Jahon ziap nunc rui mi chamv tei chu lana guangna kaphouc tei laana tarou khou mbeihlou the.

³⁰Khoutei latdiutatmei nunc tei Jisu daeng khou guang kaduai dat the. Kumna kaniw rui taanclou kanmei khatni nchamlou kanmei guay kakhou raclou the.

³¹Kum tina, meic mpeyna guangmei guang, tatmei tat twna meic padik bam tipui zaeng rui tu zangvpui ganv khang sini maek khe. Khoutei Jisu rui kaziap nunc khou, “Meic maekpui bamv thangc tat pat lana matak khat nthaekc tat kho,” twna sa the.

³²Kumna kaniw rana meic maekpui bamv thangc hih tuangcna tat the.

³³Tiki kaniw tat kanmei ta tei meic mpeyna how the, kumna hei tei kaniw e twmei kaniw thay the. Khoutei kaidai guay khou rui meic nunc pak guangna kaniw suangc mi bamv khou tei guang bam hu the.

³⁴Kumna Jisu hih khou rui tat pat pwkhou, meic kangdai ta tei how the. Khoutei kamei kaniw ta ningngam mak khe. Kalam thu kaniw tei gaengcloumei maekmei lauziu nunc kumc the. Khoutei kamei rui lat mpeyna kaniw khou nchamlou the.

³⁵Kumna neih khyam key pwkhou kaziap nunc kadaeng khou guangna sa the, “Mi hei meic lungh makpui bamv de. Kumna ntaw thu tingzyn di the.

³⁶Kum thena mi gaengv zaengv khou naimei namv nunc khatni kaidai nunc khou hei tatna kaniw tu nuhmei puat liu tu tat kan khang kaniw ta ndiulou ti tho.”

³⁷Khoutei Jisu rui, “Kaniw tu khang nangniw rui tii tio,” twna sa the. Khoutei, “Aniw tatna denari[11] phay nei tuang ntyan liuna kaniw ta titu tio twna cho?” twna kaniw rui daw the.

³⁸Khoutei, “Nangniw khou ntyan dwm azuh nai cho? Tatna zauc o,” twna Jisu rui sa the. Khoutei kaniw thay la khou, “Ntyan dwm panguh lev khav kanei nai e,” twna sa the.

³⁹“Kum e thei, meic nunc ta tei kakang kakang swna mphuaih ndiakcmei ruc khou tidungc tho,” twna Jisu rui kaniw khou sa the.

⁴⁰Khoutei kaniw meic phay khat tuang khatni riakngu tuang kang kang, karian karian swna tidungc key the.

⁴¹Kumna Jisu rui ntyan dwm panguh lev khav kanei tei laana tingkauh thangc zauc kuna suaihiam neylouna ntyan dwm guay tei by baklou the, kumna nzanh khang kaziap nunc khou tiilou the. Khav kanei tei ni kamei rui kaniw khang nzanhlou the.

⁴²Kaniw meic guayna tu ngguna tu the.

⁴³Kumna kaniw rui tu nsaekcloumei tyan khatni khav tei nggiuh ruhna kanei padikna khuam guang khwan e.

⁴⁴Mi ntyan tumei tei nggaanvmei ching panguh khwan e.

⁴⁵Mi tangv meic kangdai ta tei kamei ndiu ganc bam kanmei dak khou kaziap nunc tei hih tuangcna Bethsaida thangc kaan pat hu khang Jisu rui ndiulou the.

⁴⁶Kamei kaniw ta ramnavloupui tangv, huayney khang chyngbut thangc tat the.

⁴⁷Zingbangc key pwkhou, hih tei zeihlat chung khou bam khwan e. Mi khou tei Jisu karana ramkiang khou bam khwan e.

⁴⁸Khoutei mpwan kaniw hu biak rui aliu riu guang tina, kaniw hih hwan ryanra bammei ta how lana, Jisu laukhwan khwanpaengc kaniw daeng nzwanna[12] dui ruc khou tat guang khwan e. Kamei kaniw ta tat kaan ni kumc guang khou,

⁴⁹kamei dui ruc khou tat bammei ta kaniw how lana hei tei mbuhrav di the twna ningna kauc thau the.

⁵⁰Hei tei kaniw meic guayna how the, kumna ping the. Mi dyng khou tei Jisu rui, “Nangniw diw si nangh e, ai de. Ping riu,” twna sa the.

⁵¹Kumna kamei kaniw daeng khou guangna hih khou tei ku the. Khoutei mpwan tei nchwng kan the. Mi khou tei kaniw khang ngak the.

⁵²Kalam thu ntyan dwm panguh tuang kabac tei kaniw thay mak khe; kaniw lungning ndy the.

⁵³Kaniw kaan patna, Gennesaret ramv khou guang the, kumna dui khuangc khou hih bangclou the.

⁵⁴Kaniw hih khou tei rui tat pat rappui lev Jisu e twmei kaniw thay lana,

⁵⁵meic nunc tei mi ramv kapwm khou tei pak liklouna, kamei mi khou tei bam e twmei chu chumei bamv khou nnaumei nunc ta puanc guang geic the.

⁵⁶Namv khou, kaidai khou, lau khou, kamei guangloupui bamv bamv khou nnaumei nunc ta kaithyan bamv khou louna kaniw katuang pheychuanh tin na sini kahi khang zaenghuay the. Kumna kahitowmei guay gay dat the.