Read Rongmei Naga MARK 7 Bible Online

MARK 7 - Rongmei Naga bible

MARK 7

¹Khoutei Pharisimei nunc khatni Jerusalem thangc rui guangmei Riakdanv dinhpouc gaanvsaekc Jisu daeng khou guang kaduai the.

²Khoutei kaziap gaanvsaekc kaniw baanc sw nthan makna, twmei thu khiu makna ntyan tu bammei ta kaniw how the.

³(Kalam thu pupouh riak sinna Pharisimei nunc khatni Jihudimei guay thu kaniw baanc kariak thei layna khiu mak ge thei ramh tu mak ge.

⁴Kaniw kaithyan thangc rui guangna dui low nthan makna ramh tu mak ge.[13] Mi kumna kaniw sin bammei baih baihmei riak—buangh, lai, khatni kuanri kam-kuak[14] khiumei tuang ni mpeyna nai e.)

⁵Kumna Pharisimei khatni Riakdanv dinhpouc nunc tei rui Jisu khou, “Tabui swna nang ziap nunc pupouh riak tat makna nthan makmei baanc rui ntyan tu tu cho?” twna thanv the.

⁶Khoutei Jisu rui kaniw khou sa the, “Gaylwn swmei nangniw lam khou Isaia rui cha rapna dinc kasuakcloumei, mi hei kumcna hylou the: ‘Mi mei nunc hei kaniw chy rui ata chakhwang sw e; tiki kaniw lung thu akhou rui duc the;

⁷Nsa kaniw ata kalum e, maansei tuang latdyn ta riakdyn kumcna nchamlou the.’

⁸“Nangniw Ravguangc tuang latdanv ta ganclouna maansei tuang pupouh riak ta sin the.”

⁹Jisu rui sa the, “Nangniw pupouh riak ngaek khang rui Ravguangc tuang latdanv ta thei kaneilou the.

¹⁰Kalam thu Mousi rui, ‘Nang pui nang pu ta chakhwang sw nina e; kapui kapu ruc khou latsic sapui mei ta tei swluai nina e,’ twna sa e.

¹¹Tiki nangniw rui, ‘Meic gaanv khat rui kapui hamh e thei kapu khou: Nang ta makuat nimei tuang tei korban di the (mi kiu thu Ravguangc khang katloumei puat twna e) twna salou kan e thei,

¹²kamei kapui kapu ta makuat nimei thouc kuak the,’ twna sa e.

¹³Mi kumcna nangniw tuang dinc kadai kadai keymei pupouh riak tei rui Ravguangc lat ta kak the. Kumna mi hei kumhmei mpeyna nangniw taanc e.”

¹⁴Khoutei Jisu rui meic kangdai ta tei kadaeng khou kaw guang datna kaniw khou sa the, “Nangniw guayna mi hei nking o, kumna kabah thay o:

¹⁵Maansei ta kapaengc thangc rui gutmei puat rui sw mphuam mak ge; tiki kalungc khou rui patmei tei rui kata sw mphuam tuang de.” (

¹⁶“Chu khang nukuanc naipui mei tei rui chu kan di tho!”)[15]

¹⁷Jisu meic kangdai khou tei rui tat pat lana kainung khou gut bam pwkhou, mi latgiam kabac tei kaziap nunc rui thanv the.

¹⁸Khoutei kamei rui kaniw khou sa the, “Nangniw ni kabah laa thay makna cho? Kapaengc thangc rui maansei lungc khou gutmei puat tei rui thu kata sw mphuam mak ge.

¹⁹Kalam thu hei tei kalungning khou gut tu hamh e, kabung khou gutna pat dat kanmei tuang de twmei nangniw thay mak nah cho?” (Mi hei rui taektw guay nthan de twna sa tuang e.)

²⁰Jisu rui sa the, “Maansei gaanv khat ta sw mphuammei hei kalung khou rui patmei tei rui de.

²¹Kalam thu simei lungning, lungcmaanvmei, kaihouhmei, meicdowmei,

²²nowsowmei, agaamvmei, kheihsimei, meicguatmei, nthahmei, mamavmei, meickai ta sakasicmei, daihriw swmei, mpangmei,

²³mi guay hei, kalungc thangc rui, maansei lungning khou rui pat re; kalungc thangc rui patna maansei ta sw mphuam e.”

²⁴Jisu thauna mi khou tei rui tat pat lana Tur ramv thangc tat the. Khoutei kamei kai akhat khou gut the, kumna kamei mi khou tei bam e twmei meic gaanv khat na si thay kan tu laa nii mak khwan e. Tiki kamei nkamh ngam mak khe.

²⁵Khoutei kanacpui nthan makmei bumaengc gutna bammei meicpui gaanv khat Jisu lam khou chu lana, kaluak kalat guangna kaphay daeng khou pun nkhum laamv key the.

²⁶Mi pui tei Grik lat samei Sirophonikiamei e. Kumna kanacpui khou rui ravsic ta tei nthau ganclou khang kamei rui Jisu khou sa the.

²⁷Khoutei Jisu rui kakhou sa the. “Alauc nunc ta titu nggu rey ni he; alauc nunc tu nimei tyan tei laana, silauna nunc khang phaicloumei nchumh mak ge.”

²⁸Khoutei mi pui tei rui mundawna sa the, “Ngguay, Poubauhmei, alauc nunc rui tu kathow keyloumei tei si nunc ni kuak paeng bangc khou khuaic tu dyng e cho.”

²⁹Jisu rui kakhou sa the, “Mi lat hei nang rui sapui zaeng rui, tat tho, ravsic tei nang nacpui khou rui tat pat kan the.”

³⁰Khoutei kakai khou guang dat pwkhou kanacpui tei kalaeng khou zipna zaengsw bammei ta how the. Kanacpui khou rui ravsic tat pat kan bam khwan the.

³¹Jisu Tur ramv khou rui tat pat datna, Sidon tat ruan keyna Galili zeiclat khatni Dekapolis ramv khou key the.

³²Khoutei kanu ndy, kabaley luam twmei gaanv khat ta meic gaanvsaekc rui Jisu daeng khou nduangh guangna mi pu khou tei kabaanc kabouclou khang huaycha the.

³³Khoutei mi pu ta tei meic pang khou rui karana ta nduangh langc patna Jisu rui kanu kai kanei khou kabaanc zung gitlou the khatni kateic nsukna kabaley khou kahilou the.

³⁴Kumna tingkauh thangc zauc kuna thiusaengc zay the; kumna kakhou “Ephratha” twna sa the. Mi kabac thu, “Laanc pat tho!” twna e.

³⁵Kadyng khou kanukuanc laanc pat the khatni karakclou bammei kabaley ric pat the. Kumna kamei lat sa nthanna sa dat the.

³⁶Hei tei meic gaanv khat na khou sini raclou nuh mak ge twna Jisu rui kaniw khou kakhimlou the. Tiki kamei rui kakhim ranvlou tihay dinc ranv hay hay the.

³⁷Khoutei kaniw ngakna sa the, “Kamei ravpuat guayna tigaylou dyng the, nu ndymei ta tichu the, lat sa thay makmei ta tisa the.”