Read Rongmei Naga MARK 9 Bible Online

MARK 9 - Rongmei Naga bible

MARK 9

¹Khoutei Jisu rui kaniw khou sa the, “Ai rui nangniw khou kaling siakna sa tuang e: Ravguangc guangcdic tei ngamv daicna guangmei ta how mak saanv theic lak nimei mi khou ding bammei pang khou gaanvsaekc nai e.”

²Zaeng charuk tangv Jisu rui Pitar, Jakob, khatni Jahon ta nduanghna kaniw rana chyngbut kauhmei akhat khou ku the. Khoutei kaniw hu khou Jisu kalwn guanlih pat the.

³Khoutei katuang pheychuanh tei mphwan ti tah ta pat the. Hei tei kandih mei gaanv khat na rui sini sou mphwan ngam lakmei ram-mphwan mphwan pat the.

⁴Khoutei Elija lev Mousi Jisu ta kachuc bammei ta kaniw khou tihowlou the.

⁵Khoutei Pitar rui Jisu khou sa the, “Rabbi, aniu mi khou hei bammei gay the. Kumna zypui kai kathumh—nang khang, Mousi khang, khatni Elija khang akhat khat aniw kasiamhlou ni the.”

⁶Kalam thu kaniw ping langv lana, kamei tabui lat sa nina cho twmei sini thay dat mak khe.

⁷Khoutei muangh guam guangna kaniw ta guam bin the. Kumna “Mi hei ai rui nzianmei Nac Mpouh e, nangniw kalat chu o!” twna muangh khou tei rui sa pat the.

⁸Kadyng khou kaniw zauc kari kariang the, tiki Jisu ta hamhna baihmei ta thu kaniw how dat mak khe.

⁹Meic Nac Mpouh tei theihmei khou rui ringcthau dat kan mak saanv kaniw how kanmei tei meic gaanv khat na khou sini raclou nuh mak ge twna kaniw chyngbut thangc tei rui tat key datmei chaenglwan khou Jisu rui kaziap nunc khou kakhimlou the.

¹⁰Kakhimloumei tei kaniw ngaekna, “Theihmei khou rui ringcthaumei,” twmei kiu tabui kabac cho twna kaniw kakhanhna bam khwan e.

¹¹Kumna, “Tabui swna ‘Elija guang rey puni de,’ twna Riakdanv dinhpouc nunc rui sa bam tu cho?” twna kaziap nunc rui Jisu khou thanv the.

¹²Khoutei Jisu rui kaniw khou sa the, “Kalingna, ramh guayna chamdaanvlou khang Elija guang rey the. Kum e thei, tabui swna Meic Nac Mpouh hei mpeyna ryanramei ariw puni, kumna kata ganc pat puni twna hylou tu cho?

¹³Tiki ai rui nangniw khou sa tuang e: Elija guang kan the, kumna kalam khou hyloumei kumcna karuc khou kaniw rui swlou nii niimei tei swlou kan the.”

¹⁴Kaniw ziap nunc daeng khou tei guang dat pwkhou, meic kangdai kaniw daeng bam haengvna Riakdanv dinhpouc nunc rui kaniw ta agina bammei ta kaniw how the.

¹⁵Khoutei meic kangdai tei Jisu ta how rap pwkhou ngak the. Kumna kaniw kadaeng khou pak guangna kata kalum the.

¹⁶Khoutei Jisu rui kaniw khou, “Nangniw tabui lam khou kaniw lev agi bam tu cho?” twna thanv the.

¹⁷Khoutei meic pang khou tei rui gaanv khat rui, “Dinhpouc, lat sa thay makmei bumaengc gutmei anac mpouh ta nang daeng khou nduangh guang tuang e.

¹⁸Hei tei rui kata sin pwkhou, kata kandih khou saanv keylou the, kumna kasav patna kahuc khaic ndyangna chagangv bam raph rap the. Mi ti hei nthau ganclou khang nang ziap nunc khou sa tiki kaniw ngam mak khe,” twna sa the.

¹⁹Khoutei Jisu rui kaniw khou sa the, “He lwm makmeithiu, ai nangniw ta asaanh bam nduangh bam nina cho? Asaanh nangniw lev khaengv bam nina cho? Mi nac ta kiuc adaeng khou nduangh guang o.”

²⁰Khoutei kaniw rui kata Jisu daeng khou nduangh guang the. Jisu ta how rappui lev mi bumaengc tei rui mi nac ta tei kandih khou saanv keylou the, kumna kamei kasav patna liaulu liaulang bam the.

²¹“Kamei mi kumc bammei hei asaanh tingsaengc tha?” twna Jisu rui kapu khou thanv the. Khoutei kapu rui, “Kamei angana khou rui di the.

²²Kata swluai khang katupcna mai khou ni dui khou ni phaiclou the. Kumna ngam e thei thu, zauc nzianlouna nkhavlou na ro,” twna sa the.

²³Khoutei Jisu rui kakhou sa the, “‘Ngam e thei’ twmei kiu, lwmpui mei khang thu ngam mak tuang maek ge.”

²⁴Khoutei angana pu tei rui kaucna, “Ai lwm e, ai lwm ngam khang nkhavlou o!” twna sa the.

²⁵Meic kangdai pak karwng guangmei ta Jisu how lana, “Lat sa thay makmei khatni nu ndymei bumaengc, ai rui nang khou latdanv tii e: Nang kakhou rui tat pat kan tho! Nang kakhou gut dat nuh mak khe!” twna nthan makmei bumaengc ta tei kamei rui luh the.

²⁶Khoutei tikauc rah ndyna titheilanc kasic karouc keylou lana tat pat kan the. Kamei tei theihmei kumc the, kum tina meic mpeyna rui kamei theic the twna sa the.

²⁷Tiki Jisu rui kabaanc sinna kata zay thau the, kumna kamei thau dungc the.

²⁸Jisu kainung khou gut pwkhou kaziap nunc rui kakhou nkunna, “Tabui sw tina aniw mi ti hei nthau ganc ngam mak tu cho?” twna thanv the.

²⁹Khoutei Jisu rui kaniw khou sa the, “Mi kumhmei hei thu huayneymei paan na rui hamhna nthau ganc ngam mak ge.”

³⁰Kaniw mi khou tei rui tat pat lana Galili tat ruan pat khwan e. Hei tei meic nunc ta tithay nii mak khwan e.

³¹Kalam thu, “Meic Nac Mpouh ta meic nunc baanc khou tii pat puni, kumna kaniw rui kata swluai puni, tiki zaeng neih thumh tangv kamei ringcthau dat puni,” twmei kamei rui kaziap nunc khou dinclou bam khwan e.

³²Tiki kaniw mi lat hei kabah thay mak khwan e. Kum khwan sini kakhou thanv khang ni ping khwan e.

³³Mi tangv kaniw Kapharnahum khou guang the. Kumna kaniw kainung khou bam khou, Jisu rui kaziap nunc khou, “Nangniw chaeng khou kaphianh tat bammei tei tabui lam cho?” twna thanv the.

³⁴Khoutei kaniw lat daw mak khe, kalam thu kaniw pang khou thow tei daic liangmei cho twna kaniw chaeng khou kaphianh tat bam khwan e.

³⁵Khoutei dungc keyna Jisu rui gaanv ruhna kanei ta tei kaw guangna kaniw khou sa the, “Thow pw ni daic liangmei sw nii e thei, kamei nthyam liangmei sw nina e khatni meic guayna siamruaimei sw nina e.”

³⁶Khoutei alaucna gaanv khat ta laa guangna kaniw chung khou tidinglou the, kumna mi nac ta tei puancna Jisu rui kaniw khou sa the,

³⁷“Thow pw ni mi kumhmei alauc akhat ti hei azanc khou laaloumei kamei tei ata laalou tu e; thow pw ni ata laaloumei tei ata laalou tu hamh e, ata ndiu guangmeipu ta laalou tu e.”

³⁸Khoutei Jahon rui Jisu khou sa the, “Dinhpouc, meic gaanv khat nang zanc khou rui ravsic nunc ta nthau ganc bammei ta aniw howna hei tei sw riu twna aniw rui kata sa the, kalam thu kamei aniu thei laymei hamh e.”

³⁹Tiki Jisu rui sa the, “Kata khaam ti nangh e, kalam thu azanc khou rui charynmei taanv taanhmei gaanv khat na sini ata sa kasic nuangc rap ngam ni tu hamh e.

⁴⁰Kalam thu aniu ta howmu makpui mei tei aniu biak lianghmei de.

⁴¹Thow pw ni nangniw Khrista mei e twpui zaeng rui nangniw ta dui chu buangc na sini tizangvlou e thei, ai rui nangniw khou kaling siakna sa tuang e: katuang swan khat sini maan dat mak khe.”

⁴²“Thow pw ni lwmmei nthyammei alauc gaanv khat ta tiphaysuyloupui mei ta tei thu kaguang khou napriak tauc daihmei aleilouna duipui khou phaicloumei rui kakhang gaymei de.

⁴³Nang baanc rui nang ta tiphaysuy khang sw e thei, hei tei dan ganc o. Baanh kanei naina amit dat makmei maikwam thangc tatmei suangc baanh akhat maekna ringhmei khou gutmei rui nang khang gaeng e.

⁴⁴Mi khou tei ‘kaniw tuang nthanv guay tei theic dat mak khe, khatni kaniw tuang mai tei amit dat mak khe.’[16]

⁴⁵Khatni nang phay rui nang ta tiphaysuy e thei, hei tei dan ganc o. Phay kanei naina maikwam khou phaicloumei suangc phay akhat maekna ringhmei khou gut kanmei rui nang khang gay e.

⁴⁶Mi khou tei ‘kaniw tuang nthanv guay tei theic dat mak khe, khatni kaniw tuang mai tei amit dat mak khe.’[17]

⁴⁷“Nang mik rui nang ta tiphaysuy khang sw e thei, hei tei lat ganc o. Nang mik kanei naina maikwam khou phaicloumei suangc, mik akhat maekna Ravguangc guangcdic khou gut kanmei rui nang khang gay e.

⁴⁸Maikwam khou tei kaniw tuang nthanv theic dat mak khe, mai ni amit dat mak khe.

⁴⁹“Ravcha ta ntey rui sw nthanmei kumcna meic katana ta mai rui sw nthan puni.

⁵⁰“Ntey hei gay e; tiki ntey hei bumc taan e thei, mi ti hei akumhna tibumc dat nina cho? “Nangniw ntey kumc o, kumna nangniw khat khat kak khou chuzaenghna lungc o.”