Read Rongmei Naga LUK 11 Bible Online

LUK 11 - Rongmei Naga bible

LUK 11

¹Zaeng neih khat, Jisu kabamv akhat khou huayney bam khwan e. Kumna kamei huayney tang pwkhou, kaziap gaanv khat rui, “Poubauhmei, Jahon rui kaziap nunc khang nchamloumei kumcna, aniw khang ni huayney nchamlou o,” twna Jisu khou sa the.

²Khoutei Jisu rui kaniw khou sa the, “Nangniw huayney khou mi hei kumcna ney o: ‘APu, nthanmei nang zanc ta chakhwang champouh sw diu. Nang guangcdic guang diu.

³Neih khat khang biuhmei taektw,[16] aniw khang tingmik kathuic tiilou o.

⁴Aniw khou nkhuailoumei guay ta, aniw kuakloumei kumcna, aniw khuay guay kuaklou o. Aniw ta nthiammei baanc khou tipatlou rio’ ”

⁵Khoutei Jisu rui kaniw khou sa the, “Nangniw pammei daeng thangc nangniw zipchwng tatna, ‘Champanv, ntyan dwm kathumh na tiilou o,

⁶achampanv nggin guangna kakhang titu khang maekna the,’ twna sa pwkhou,

⁷‘Ata sw katuakclou ri tho, kaikhamv mbangh tangna angana nunc ta zip nduangh bam di the. Ai thauna tii dat ngam mak khe,’ twna kainung thangc rui daw nuh e.

⁸Ai rui nangniw khou sa tuang e: mi pu tei rui kachampanv e twna thauna ntyan tei tii mak sini, kamei rui katun tancna ney bam timei zaeng rui thauna kakhang kage naimei guay tei tii puni.

⁹“Hei zaeng rui, ai rui nangniw khou sa tuang e: Ney o, nangniw khang tiilou puni; phu o, phu tow puni; kaikhamv nchow o, nangniw khang laanclou puni.

¹⁰Kalam thu neypui mei tei rui laatow e, phupui mei tei rui phu tow e; khatni kaikhamv nchowpui mei khang tei laanclou e.

¹¹“Pu nunc, nangniw khou nangniw nac rui khav ney pwkhou, khav phaan nrui tii puni dina cho?

¹²Hamh e thei, ruayduih ney pwkhou ravga tii puni dina cho?

¹³Kumna, meicsimei nangniw sini nangniw nac nunc khang gaymei puat tii thay e thei, tingkauh thangc bammei nangniw pw rui thu tabui swna kakhou neymei kathuic khang Bumaengh Nthanmei tiilou mak nina cho?”

¹⁴Jisu rui lat sa thay makmei ravsic ta nthau ganclou khwan e. Kumna ravsic tei tat pat kan pwkhou, lat sa thay makmeipu tei sa thay dat the. Khoutei meic kangdai tei ngak the.

¹⁵Tiki kaniw pang khou gaanvsaekc rui thu, “Ravsic guay tuang kapy Bilzebul[17] paan rui kamei rui ravsic nunc ta tei nthau ganc bam tuang de,” twna sa the.

¹⁶Khoutei sw-nchinmei tuang tingkauh thangc rui tii key o, twna gaanvsaekc rui kata nchanvna sa the.

¹⁷Khoutei Jisu kaniw lungning tei thay lana kaniw khou sa the, “Kalangv patna khat khat ta sw kasic khang swmei guangcdic tei mut puni, khatni kalangv patna khat khat ta sw kasic khang swmei kaikhunc tei bow puni.

¹⁸Hei tei kumcna Seitaan rui karana kata sw kasic khang sw e thei, akumhna kaguangcdic ding ngam nina cho? Ai Bilzebul paan rui ravsic nunc ta nthau ganh tuang de twna nangniw rui sapui zaeng rui, mi hei sa tuang e.

¹⁹Ai ravsic nunc ta Bilzebul paan rui nthau ganh tuang e thei, nangniw nac nunc thu thow paan rui kaniw ravsic nunc ta nthau ganh tu cho? Kaniw rui nangniw ta latzan sw puni.

²⁰Tiki ai rui ravsic nunc ta nthau ganhmei hei Ravguangc pumtan paan rui e. Mi hei Ravguangc guangcdic nangniw khou guang tangc tina the.

²¹“Kapumc tanhmeipu rui rihpwan rihna piu nthuihna kakai tei gaek bam pwkhou, katuang lanv guay tei giuga dat mak khe.

²²Tiki kakhang suangc tanhmeipu guangna kata ngam pwkhou, kamei kapumtan sw bammei katuang ricpwan ricna guay tei asut kan puni khatni kamei rui asut guangloumei guay tei ni laa kan puni.

²³“Athei lay makmei nunc tei ata zauczihmei nunc e, khatni ai gaengc guang bammei khou hei nkhavlou makmei nunc tei hac ganhmei nunc e.

²⁴“Simei bumaengc meic gaanv khat khou rui tat pat lana, zaeng swloupui bamv khang ramvkaengv khou phu tat the; tiki phu tow mak khe. Khoutei, ‘Ai ganclou kanmei akai thangc tei hanc guang dat ni the,’ twna kamei ning the.

²⁵Kumna kamei guang dat pwkhou, kai tei gey nthan thiakh thiakna tanvna lou chuy rih rilou bammei ta how the.

²⁶Kumna kamei tat lana kakhang suangc simei bumaengc chanei ta kaw lana mi khou tei lungc the. Khoutei mi pu tuang nkhamhmei lwnlung tei reymei khang suangc si diangc the.”

²⁷Jisu mi hei sa bam khou, “Nang ta puancloumei pui tei khatni nang ta puanc noucloumei pui tei sangaymei pui e,” twna meic pang khou rui ntumei gaanv khat rui kauc the.

²⁸Tiki Jisu rui mundawna, “Sangay dianghpui mei kiu thu, Ravguangc lat hei chuna piupui mei tei de,” twna sa the.

²⁹Meic kangdai geic guang tipui ganv khou, Jisu rui sa the, “Ntaw kin khou lungc bammei nunc hei meicsimei nunc e. Sw-nchinmei taanclou khang kaniw rui sa e, tiki Jona khou swlou kanmei tei hamhna, baihmei swlou ni tu hamh e.

³⁰Kalam thu Jona tei Ninevemei khang sw-nchinmei tuang sw kanmei kumcna, Meic Nac Mpouh hei ni mi meikin khang hei sw-nchinmei tuang sw puni.

³¹Mi meikin ti hei latzan swpui ganv khou Dihba thangcmei Liammavpui thauna, mi meikin hei nkhuai e twna sa puni. Kalam thu ningtyngmei Solomon lat nking khang kamei kandih tin thangc rui guang khwan e; kumna ntaw mi khou bammeipu hei Solomon suangc daihmei e.

³²Mi meikin ti hei latzan swpui nungc kiu, Ninevemei nunc thauna mi meikin hei nkhuai e twna sa puni. Kalam thu Jona rui latdinc pwkhou kaniw lungh laic kan the, kumna ntaw mi khou bammeipu hei Jona khang suangc daihmei e.

³³“Meic gaanv khat na sini thauhmai daanc lana nkamhlou mak ge, hamh e thei nggiuh rui gumbinlou mak ge.[18] Tiki gutmei guay gaanhmei tei how khang kahyang khou dungclou e.

³⁴Mik hei meic pumc tuang maibungc e. Nang mik gay ti thei nang pumc kapwm gaanc kah ka e, tiki nang mik si ti thei nang pumc zingh zing e.

³⁵Hei zaeng rui nang lung khou naimei gaanhmei tei zingh mak khang sw o.

³⁶Hei zaeng rui, nang pumc khou zinghmei bamv maekna kapwmna gaanc kah ka e thei, thauhmai riw rui nang ta tigaancloumei kumcna, nang pumc kapwm gaanc puni.”

³⁷Jisu lat sa tang pwkhou, Pharisimeipu gaanv khat rui kata nap tu nchamclou khang kaw the. Kumna kamei guangna dungckey khwan the.

³⁸Nap tu ni khou Jisu kabaanc khiu makmei ta Pharisimeipu tei howna ngak the.

³⁹Khoutei Poubauhmei Jisu rui kakhou sa the, “Pharisimei nangniw nkuakc khatni buangh guay thu kapaengc thaamc nthan chuy the, tiki nangniw lungc khou thu agaamvmei khatni simei rui padik ge.

⁴⁰Mpangmei nunc! Kapaengc kasiamhloumeipu tei rui kalungc ni kasiamhlou tu hamh nah cho?

⁴¹Nangniw tuang nkuakc khatni buangh lungc khou naimei guay tei tu zangv khang maekmei nunc khang tii tio. Kum e thei ramh guayna nangniw khang nthan puni.

⁴²“Pharisimei nunc, nangniw sansi e dav! Kalam thu kadam ruh tuang thu riangtu, maruai, gannuy paannu tuang nganvna tii lana nchumhna taanhmei khatni Ravguangc ta nzianmei khou thu ntaamv the. Nangniw kadam ruh tuang tiimei tei ni, nchumhna taanhmei lev Ravguangc ta nzianmei tei ni nchamcna ngaek ni tuang e.

⁴³“Pharisimei nunc, nangniw sansi e dav! Kalam thu nangniw Sinagog khou bamvdaih dungc nii e khatni charuangc khou meic nunc rui kalumloumei ta laa nii e.

⁴⁴Nangniw hei sansi e dav! Kalam thu nangniw hei, tarou e twmei thay lamc makna karuc khou meic nunc kaluih tat bammei tarou nunc tei kumc e.”

⁴⁵Khoutei, “Dinhpouc, nang mi kumcna sa bammei hei rui aniw zaw ni sw kasic the,” twna Riakdanv dinhpouc gaanv khat rui sa the.

⁴⁶Khoutei Jisu rui kakhou sa the, “Riakdanv dinhpouc nunc nangniw ni sansi e dav! Kalam thu nangniw rui meic nunc ta kaniw phungc tat lakmei puatphung tiphungclouna, hei tei nangniw baanc zung akhat na rui sini kahilou mak ge.

⁴⁷“Nangniw sansi e dav! Kalam thu nangniw pupouc nunc rui swluai kanmei muhzwng nunc tuang tarou guay tei nangniw kasiamh e.

⁴⁸Hei zaeng rui, nangniw hei, nangniw pupouc nunc rui taanc kanmei tei thaymei nunc khatni kaniw taanv ta kazuanloumei nunc e. Muhzwng nunc ta kaniw swluai the, nangniw rui kaniw tuang tarou kasiamh the.

⁴⁹Hei zaeng rui, ‘Ai rui kaniw khou muhzwng nunc khatni latdiutatmei nunc ndiulou puni, kumna kaniw rui kaniw gaanvsaekc ta swluai puni khatni gaanvsaekc ta rai puni,’ twna Ravguangc Ningting rui sa the.

⁵⁰Mi hei mbaanv damclou khou rui keylou kanmei muhzwng guay tuang zei manv tei mi meikin khou keylou khang e—

⁵¹Abel khou rui thauna, ravchabamv lev Nthanmei bamv kak khou swluai kanmei Zekaria nganv tuang zei manv tei keylou khang e. Ngguay, ai rui nangniw khou sa tuang e: Mi guay tuang hei mi meikin ruc khou keylou puni the.

⁵²“Riakdanv dinhpouc nunc, nangniw sansi e dav! Kalam thu thay nimei tuang khamvtaan tei nangniw laa kan the. Nangniw ni gut mak ge, gut nimei nunc ta ni nangniw rui sw khamv e.”

⁵³Jisu mi khou tei rui tat pat dat pwkhou, Riakdanv dinhpouc nunc khatni Pharisimei nunc kaniw reic thau the, kumna kalat khou rui kata nym khang nrikna kakhou lat mpeyna thanv the.