Read Rongmei Naga LUK 12 Bible Online

LUK 12 - Rongmei Naga bible

LUK 12

¹Meic aching aching guang kaduaina khat khat ta sini ni luai ni tiat khang thay makna bam khou, reymei khou Jisu rui kaziap nunc khou sa the, “Pharisimei nunc tuang khay, mi kiu gaylwnswmei khou tei rui swriak thay o.

²Ndauh pat makna gumbinlou bam nimei tuang khatni meic thay makna nkamhlou bam nimei tuang ramhkhat sini maek ge.

³Nangniw rui zingh khou salou kanmei tei kalaanv gaanh khou chu puni, kaikhamv mbanghlouna nukuanc khou suaina saloumei tei kainam khou rui kauc pat dat puni.

⁴“Achampanvthiu, ai rui nangniw khou sa tuang e: Meic pumc ta swluai lana mi tangv ramh sw dat kadai ngam lakmei nunc ta tei ping riu.

⁵Tiki thow ta ping nina cho twmei ai rui dinclou puni. Mi kiu nangniw pumc ta swluai lana maikwam khou phaiclou ngammeipu ta tei ping o.

⁶Nangniw tingkavna panguh tei paic kanei na khang zuanh mak nah cho? Tiki Ravguangc thu tingkavna akhat na ta sini amuclou mak ge.

⁷Nangniw samlu nganvna kasing phuclou bam tuang e. Ping riu. Nangniw thu tingkavna mpeyna suangc kunghmei de.

⁸“Thow pw ni kamei athei laymei e twna meic nunc hu khou sa ndauhpui mei ta tei, Meic Nac Mpouh ai rui ni kata amei e twna Ravguangc tuang baanchara guay hu khou sa ndauh puni.

⁹Thow pw ni, kamei athei laymei hamh e twna meic nunc hu khou sa ndauhpui mei ta tei, Ravguangc baanchara guay hu khou amei hamh e twna sa puni.

¹⁰Meic Nac Mpouh ruc khou sina sapui mei ta tei thu kuaklou puni de, tiki Bumaengh Nthanmei ta ramh sak makna sapui mei ta tei thu kuaklou dat mak khe.

¹¹“Nangniw ta sinagog khou, dihsinpouc nunc khatni ngamv sinmei nunc hu khou zay guang pwkhou, akumhna daw nina cho khatni tabui lat sa nina cho twmei lungh katuakc riu.

¹²Kalam thu tabui lat sa nina cho twmei mi dyng khou tei Bumaengh Nthanmei rui dinclou puni de.”

¹³Meic kangdai khou tei rui gaanv khat rui, “Dinhpouc, akai tuang lanv achaic aney khang nzanh khang achaic khou salou o,” twna Jisu khou sa the.

¹⁴Khoutei, “Meicpule, thow rui ata latzanpouc khang hamh e thei nangney khang tampy lanv nzanhlou khang kapahlou thena cho?” twna Jisu rui sa the.

¹⁵Khoutei Jisu rui kaniw khou sa the, “Nangniw agaamv agah mak khang ramhthay o. Kalam thu maansei panty hei lungcgaymei khou rui ringh tuang hamh e.”

¹⁶Kumna Jisu rui kaniw khou mi latgiam hei sa the: “Lungcgaymeipu gaanv khat lau nap gay khwan the.

¹⁷Khoutei, ‘Ai tabui sw kho cho? Nap hei lou chan ni tu hamh the,’ twna kamei kakhanh the.

¹⁸“Khoutei kamei rui sa the, ‘Asaamc guay hei ra key dat lana, daih daihmei kasiamh dat ni the, kumna mi khou tei nap bi guay khatni khiu khingh guay lou ni the.

¹⁹Kumna, “Nang khang, tingkwm mpeyna ringc biuh khang chamdaanvlou kan the. Lungh geic dat ri tho; tu tho, zangv tho, kumna neihla tho,” twna ai rui akhou sa ni the.’

²⁰“Tiki Ravguangc rui kakhou sa the, ‘Mpangmei! Aseic zingbangc hei nang panty laa puni the. Nang rui nang khang chamdaanvloumei guay tei thow khang cho?’

²¹“Kakhang thu khuam padiklou la ki, Ravguangc khang thu lungcsi bammei nunc tei mi hei kumc puni.”

²²Khoutei Jisu rui kaziap nunc khou sa the, “Nangniw ringh khang tabui tu nina cho, hamh e thei nangniw pumc khang tabui tuang nsuay mbaanv nina cho twna lungh katuakc nangh e.

²³Nangniw pumc ringhmei hei taektw suangc nthuk ge, khatni nangniw pumc hei pheybaan suangc nthuk ge.

²⁴Agaekc guay ta tei kakhanh zauh o: Kaniw lau taanh mak ge, kaniw saamh ni maek ge, tiki Ravguangc rui kaniw ta makuatlou bam de. Nangniw thu nruayna guay khang suangc adih kungc kanmei nunc cho?

²⁵Nangniw thow tei lungh katuakcmei paan rui kapanty chowbuk akhat na sini tisaengc mbu[19] ngammei naina cho?

²⁶Mi kumhmei na hei sini nangniw sw ngam mak ge thei, tabui swna baihmei guay khang tei thu lungh katuakc bam tu cho?

²⁷“Lili pwang guay ti hei kakhanh zauc o. Kaniw taanv taanh mak ge, langh ni ruaih mak ge. Tiki Solomon sini karam lunggai karin khou nganvna hei tei kumcna karuh tangc kan mak ge.

²⁸Aseic na ringclou lana, nthuanh mai khou phaiclou kan nimei bang ta sini, Ravguangc rui mi kumcna karuhlou e thei, he lwmmei nthyammeithiu, nangniw ta thu tabui swna karuhlou mak nina cho?

²⁹Kumna nangniw tabui tuang tu nina cho khatni tabui tuang zangv nina cho twna phu bam nangh e; mi khang rui lungh ryanra nangh e.

³⁰Kandihmei maansei guay rui mi khang hei phu e, tiki mi guay hei nangniw khang kage nai e twmei nangniw Pu rui thay bam tuang de.

³¹Tiki Ravguangc guangcdic tei phu o, kum e thei mi guay hei ni nangniw khang tiilou puni.

³²“Ping riu, nangniw lauziu pang nthyammeithiu, kalam thu nangniw khang guanghdic tiiloumei hei nangniw Pu rui kahawmei e.

³³Nangniw tuang naimei guay tei zuancna lungcsimei nunc khang tii tio. Kumna sw nchamv dat makmei, kaihouhmei nai dat makmei khatni nthumc rui sw kasic dat makmei tingkauh thangc, nangniw tuang syankhau rylou o.

³⁴Kalam thu nangniw tuang lanv naipui bamv khou tei nangniw lung ni nai puni.

³⁵“Nangniw sianlangv langvna, maibungc nchoulouna bam o.

³⁶Nowsuanh ngai khou tat kanmei kaniw kaipouc tei guang datna kaikhamv nchow pwkhou laanc rap khang nkhwan bammei nunc tei kumncna nkhwan bam o.

³⁷Kaniw nkhwan bam khou kakaipouc guang ariwmei bangc nunc tei sangaymei nunc e. Ai rui nangniw khou kaling siakna sa tuang e: Kamei rui kaniw ta tu zangv khang tidungc keylouna, kamei rui siangiat giatna, kaniw siamruai swlou puni.

³⁸Kaipouc zipchwng pw ni, khwanpaengc pw ni guang pwkhou nkhwan bammei bangc nunc tei sangaymei e.

³⁹Kaihouhmei tei tabui ganv khou guang puni cho twmei kai kaipouc tei thay khwan e thei, kakai tei tihouc ni tu hamh e twmei nangniw thay e.

⁴⁰Hei tei kumcna, nangniw ni chamdaanv bam o, kalam thu nangniw ning makmei ganv khou Meic Nac Mpouh guang puni.”

⁴¹Khoutei Pitar rui, “Poubauhmei, mi latgiam hei aniw khang sa tu ni, meic guayna khang sa tu cho?” twna thanv the.

⁴²Khoutei Poubauhmei rui daw the, “Kaipouc gaanv khat rui katuang tamthiwmeipu khou kabangc guay khang kaganv chana tu zangv khang kaniw dam nzanhlou bam khang nsinlou pwkhou, thow tei ningtyngmei bangc sw puni cho?

⁴³Kakaipouc tei guang dat pwkhou kamei rui kadyloumei kumcna taanc bammei bangc tei sangaymei bangc e.

⁴⁴Ai rui nangniw khou kaling siakna sa tuang e: Kaipouc tei rui kabaanc khou katuang naimei guay nsinlou puni.

⁴⁵Tiki, ‘Akaipouc guang dat riu ni tu hamh e,’ twna mi bangcpu tei ningna kabangc guay ta tei—ntumei ta ni, nggaanvmei ta ni baina, tw mba zangv mbana bam khou;

⁴⁶kamei ning makmei ganv khou kakaipouc tei guang nangc e thei, kata tei dan puat paruatlou puni,[20] kumna lwm makmei nunc bamv khou lou puni.

⁴⁷“Kaipouc rui ningmei tei thay, tiki chamdaanv mak, hamh e thei kamei ningmei tei taanh mak twmei bangc ta tei thu bai ranvna bai puni.

⁴⁸Tiki thay makna bai biuc rappui taanv taancloupui mei ta tei thu bai rau maih puni. Kumna tiilou geih kanmei nunc khou tei laa dat geic puni khatni nsinlou geic kanmei khou tei ney dat geic puni.

⁴⁹“Ai hei kandih khou mai phaiclou khang guang tuang e. Mi hei ntoulou bam khwan e thei gay ni tuang the twna ning e.

⁵⁰Ata lup nimei tuang akhat nai e, hei tei luai kan mak saanv alung ryanra e.

⁵¹Ai guangmei hei kandih khou maneicmei phungc guang khang e twna nangniw ningna cho? Tiki ai rui nangniw khou sa tuang e, kiuc hamh e, kalangv tipat khang de.

⁵²Ntaw khou rui thauna gaanv panguh naimei kaikhunc khou tei meic guayna ntamv puni. Gaanv thumh lev gaanv nei ntamv puni khatni gaanv nei lev gaanv thumh ntamv puni.

⁵³Kapu lev kanac mpouh, kanac mpouh lev kapu; kapui lev kanac aluh, kanac aluh nunc lev kapui; Kaneic lev kamauc khatni kamauc lev kaneic ntamv puni.”

⁵⁴Jisu rui meic kangdai khou tei sa the, “Neihkey biak thangc muangh kumei ta how e thei, ‘tingdai riu puni the,’ twna nangniw sa e. Kumna riu changh e.

⁵⁵Dihba pwan aliu ngangh ti thei, ‘neih tanc puni the,’ twna nangniw sa e. Kumna tanc changh e.

⁵⁶Gaylwnswmeithiu! Nangniw tingpuk kandih zaw zauc pat thay e thei, akumhna ntaw pat bammei ti hei thu zauc pat thay makna cho?

⁵⁷“Tabui swna nangniw si gay kakhanh thay makna cho?

⁵⁸Thowkumhmei rui nang ruc khou lat phungclou e thei, latzanpouc bamv tangh mak khou nangney guatc sw dat ro. Hamh e thei, kamei rui nang ta latzanpouc khou zaylou kan e thei, latzanpouc rui kangkai sinmeipu khou tiilou puni, kumna kamei rui nang ta kangkai khou bangclou puni.

⁵⁹Mi khou kiu thu paic akhat na sini tii ntangh ti mak saanv tipat dat ngam pw lak khe.”