Read Rongmei Naga LUK 15 Bible Online

LUK 15 - Rongmei Naga bible

LUK 15

¹Dihkhav kakhamei nunc khatni paapcmei nunc kalat nking khang Jisu daeng khou guang bam khwan e.

²Khoutei Pharisimei nunc khatni Riakdanv dinhpouc nunc tanglumna, “Mi pu hei paapcmei nunc ta laalou e khatni kaniw lev tu nchamc bam e,” twna sa the.

³Khoutei Jisu rui mi latgiam hei sa the:

⁴“Nangniw gaanv khat tuang lauziu phay khat naimei khou rui akhat maan kan e thei, riakchakiuna chakiu ta tei tazikramv khou ganclouna, maan kanmei lauziu ta tei phu tow mak saanv phu pw lak nah cho?

⁵Kamei hei tei phu tow pwkhou, kamei neihlana kabou khou puancna,

⁶kai guang the. Kumna kapammei nunc khatni kaigei kainingmei nunc ta, ‘Aniu neihla nchamc kho; maan kanmei alauziu phu tow dat the,’ twna kaw the.

⁷Ai rui nangniw khou samei tuang e: Hei tei kumcna lungh laih khang kage maekmei ravchaptatmei riakchakiuna chakiu naimei khang tei suangc paapcmei gaanv khat rui lungh laic guang khou tingkauh thangc neihlamei mbu e.

⁸“Hamh e thei, meic pui gaanv khat katuang syankangh paek ruh naimei khou rui akhat maan kan e thei, kamei thauhmai daancna, kai geyna phu tow mak saanv phu pw lak nah cho?

⁹Kamei hei tei phu tow pwkhou, ‘Aniu neihla nchamc kho; atuang maan kanmei syan phu tow dat the,’ twna kapammei khatni kaining kaigeimei ta kaw the.

¹⁰Hei tei kumcna, ai rui nangniw khou samei tuang e: Paapcmei gaanv khat lungh laic pwkhou, Ravguangc tuang baanchara nunc neihla e.”

¹¹Kumna Jisu rui sa the, “Meic gaanv khat pu nac mpouh gaanv nei nai khwan e.

¹²Kumna alaucmeipu tei rui, ‘Apu, atuang dam tei tii tho,’ twna kapu khou sa the. Khoutei kapu rui katuang lanv tei kaney khang nzanhlou the.

¹³Mi tangv asaanh makna, alaucmeipu tei katuang naimei guay zuanc lana, duhmei kandic akhat thangc tat kan the. Mi khou tei kamei kapham lungcna katuang syan guay piu ngam the.

¹⁴Katuang naimei guay piu ngam pwkhou, mi kandic kapwm khou tei nap nkow dai nkowmei guang the. Kumna kamei tu khang maek khe.

¹⁵Kumna mi kandic tuang dilungmeipu gaanv khat daeng khou phic tu khang guang the. Khoutei guak gy khang laupuk thangc ndiulou the.

¹⁶Khoutei kamei ndaapc langvna guak taek tei sini tu niina ning pat the. Kum e tiki meic gaanv khat na rui sini kakhang tiilou mak khe.

¹⁷“Kamei kabah thay guang dat pwkhou, kamei rui sa the, ‘Apu bangc nunc tei thu tu ngam zangv ngam makna lungc bam e, tiki mi khou hei ai thu ndaapcna theic nina bam e.!

¹⁸Ai thauna apu daeng thangc tat datna, kumna sa ni the, “Apule, ai Ravguangc khou ni, nang khou ni nkhuai the.

¹⁹Ai hei nang nac mpouh twna laalou khang biuh makmei mei di the. Nang bangc akhat ta kumcna swlou pw di tho.” ’

²⁰Kumna kamei thauna kapu daeng thangc tat the. “Kata duc sih thangc kapu rui phaengc how lana, kata mpeyna nzian the. Kamei kanac ta pak riu patna, pamcna kaput the.

²¹“Khoutei kanac tei rui, ‘Apule, ai Ravguangc khou ni, nang khou ni nkhuai the. Ai hei nang nac mpouh twna kaw khang biuh makmei mei di the,’ twna sa the.

²²“Khoutei kapu rui kabangc nunc khou sa the, ‘Pheychuanh kathanc tei katumcna laa patna kakhou piulou tho. Kabaanc khou baanrwn runlou tho, kumna phaythuapc ni tuangclou tho.

²³Kameigaymei guaichic tei laa guangna dow tho. Ngay di kho!

²⁴Kalam thu mi anac mpouh hei theihmei khou rui ringc dat the; maan kanmei khou rui phu tow dat the! Kumna kaniw nngay thau the.

²⁵“Mi ganv khou tei gaanvdaihmeipu tei thu laupuk thangc bam khwan e. Kamei kakai daeng guang pwkhou, syan syan khuangh khuangh alaamh bammei khwan chu the.

²⁶Kumna kamei kabangc gaanv khat ta kawna, tabui sw bam lana cho twna thanv the.

²⁷‘Nang kainac guang dat tina, kamei gayna guang dat the twna kameigaymei guaichic tei nang pu rui dow lana the,’ twna daw the.

²⁸“Khoutei kamei kalung puamc the. Kumna kainung gut nii mak khe. Khoutei kapu patna kata nthiam the.

²⁹‘Zauclo, tingkwm heisaanmei ai bangh kumcna nang siamruai sw guangmei tuang e, neih khat na sini nang lat liam kan mak ge. Tiki nang pammei guay lev nngay nchamc tho twna ziuh launa sini tiilou zat mak ge.

³⁰Tiki nang nac pu hei rui nang tuang lanv guay mangcsangmeiluc nunc lev swmaan ngamna guang dat tiki, kameigaymei guaichic tei kakhang dowlou bu e ni!’

³¹“Khoutei kapu rui sa the, ‘Abungle, nang thu adaeng khou bam tanh tan bam tuang de. Atuang naimei guay hei nang tuang di the.

³²Tiki aniu neihlana nngay nina the, kalam thu nang kainac hei theihmei di the. Maan kanmei khou rui phu tow datmei tuang di the.’ ”