Read Rongmei Naga LUK 16 Bible Online

LUK 16 - Rongmei Naga bible

LUK 16

¹Jisu rui kaziap nunc khou mi hei ni sa the, “Lungcgaymeipu gaanv khat nai khwan e. Katuang tamzanhmeipu tei rui katuang lanv swmaan ngam the twna kakhou poulou khwan e.

²Kum tina kamei rui mi pu ta kiu kaw guangna, ‘Ai nang lam khou chu bammei hei tabui tuang nai tina cho? Nang tamzanh bammei chakh guay tei akhou tii tho. Nang mi taanv hei taanc bam saengc nuh mak khe,’ twna sa the.

³“Tamzanhmeipu tei karana kakhou sa the, ‘Ai tabui sw kho cho? Akaipouc rui ataanv hei laa ganclou puni the. Phucdan sinna chau khang ni ngam mak khe, ney tu khang ni zak ge.

⁴Ataanv hei tap pwkhou, ata meic nunc rui kaniw kai khou laalou nuh khang ai sw nimei hei thay the.’

⁵“Kumna kamei rui kakaipouc tuang pow phunghmei guay ta tei khat khat swna kaw guang the. Reymeipu khou tei, ‘Nang akaipouc khang azuh tuan tu cho?’ twna thanv ti khou,

⁶‘Thauh tinc phay khat,’ twna sa the. Khoutei, ‘Sey, mi nang pow hyloumei chakh khou hei, dungc keyna riakngu hylou tho,’ twna tamzanhmeipu tei rui sa the.

⁷“Kamei rui baihmei gaanv khat khou tei ni, ‘Nang azuh tuan tu cho?’ twna thanv the. Khoutei, ‘Gehu nggiuh phay khat,’ twna sa the. Khoutei, ‘Sey, nang pow hyloumei chakh hei laa tho, kumna riak tachat hylou tho,’ twna kamei rui mi pu khou tei sa the.

⁸“Kalung nthan makmei tamzanhmeipu ta tei ntakna sw e twna kakaipouc rui thuanckulou kan e. Kalam thu mi mbaanv nac nunc hei kaniw taanv khou gaanhmei nac nunc suangc ntak ge.

⁹“Kumna ai rui nangniw khou samei tuang e: Mi mbaanv tuang syan lanv guay hei maan ngam kan pwkhou, nang ta tingsaeng lungc nipui bamv khou laalou khang, mi hei rui nangniw pam kasiamh o.

¹⁰“Katitna khou lwm nuhpui mei tei geihmei khou ni lwm nuhpui mei e. Katitna khou lungning nthan makpui mei tei geihmei khou ni lungning nthan mak puni.

¹¹Kumna syan lanv sinswmei khou nangniw lwm nuh makmei sw e thei, kalingmei lanv khou thu thow rui nangniw ta lwm punina cho?

¹²Meickai tuang syan lanv khou tei nang lungning nthan mak ge thei, thow rui nang tuang tei nang khang tiilou puni na cho?

¹³“Bangh akhat na sini kaipouc kanei bangc sw nuh mak ge. Kamei rui gaanv khat ta karaeng, gaanv khat ta nzian puni, khatni gaanv khat khou lunghlou, gaanv khat ta ntaamv puni. Nangniw Ravguangc lev syan bangc sw kariu nuh mak ge.”

¹⁴Syan kahawmei Pharisimei nunc mi guay hei chu lana, Jisu ta sinnui the.

¹⁵Khoutei Jisu rui kaniw khou sa the, “Nangniw hei maansei mikzaw khou thu nangniw rana nangniw ta sw nzihmei nunc e, tiki Ravguangc thu nangniw lung ta thay e. Maansei khang ning kauh sih bammei tei Ravguangc mikzaw khou thu meic karaengmei tuang de.

¹⁶“Jahon guang mak saanv Riakdanv khatni muhzwng nunc rui saloumei tei sin bam khwan e. Jahon khou rui thauna, Ravguangc guangcdic tuang gaychamv hei dinc the, kumna meic guayna mi khou hei ran gut the.

¹⁷Riakdanv khou kakiak na rowloumei tei sw maanmei suangc tingpuk kandih maanmei rui chiw e.

¹⁸“Thow pw ni kanow ta mu gancna baihmei ta kaw datmei tei lungcmaanvmei e. Khatni kagaanv rui muloumei ntumei ta kaw datpui mei tei lungcmaanvmei e.

¹⁹“Lungcgaymeipu gaanv khat kamanv kunghmei pheybaan rana piuna, tu gay zangv gay rana tuna tingmik pum mathac malacna lungc bammeipu nai khwan e.

²⁰Kazanc Lazaras kawmei lungcsimeipu kakai kairaengv mun khou nliau bam khwan e. Kapumc kapaengc asuh rana khwan e.

²¹Lungcgaymeipu tuang kuakpaeng khou rui tu kathow keyloumei na sini tu tow puni ny twna bam tuang e. Khoutei si nunc guangna katuang asuc tei aliakc the.

²²“Lungcsimeipu tei theic the, kumna baanchara nunc rui kata Abraham daeng khou phungc guanglou the. Lungcgaymeipu tei ni theic the, kumna phuplou the.

²³Kata rai bammei taruaih[21] khou rui zauc ku pwkhou, duh thangc Abraham khatni kadaeng khou bammei Lazaras ta how the.

²⁴Khoutei kamei rui kaucna sa the, ‘Apu Abraham, ata zauc nzianlouna, kabaanc zung twan dui khou ntin lana abaley ti-nchulou khang Lazaras ta ndiulou o. Mi mai khou hei ai ryanra the.’

²⁵“Khoutei Abraham rui sa the, ‘Anacle, nang thu nang panty khou nang khang gaymei rana laatowna lungc kan the, kumna Lazaras thu simei rana laatowna lungc kan the twmei ningtow o. Tiki ntaw thu kamei mi khou hei amanvna bam the, kumna nang rui ryanrana bam the.

²⁶Mi na hei hamhna, nangbiak thangc rui abiak thangc khatni abiak thangc rui nangbiak thangc aniu kak khou kaanpat kaan gut nuh makmei kakakdai nai the.’

²⁷“Khoutei kamei rui sa the, ‘Kum e thei, apule, Lazaras ta apu kai thangc ndiulou na ro.

²⁸Achana gaanv panguh nai kan e. Mi rairiumei bamv khou hei kaniw ni gut mak khang kamei rui kaniw khou dinclou kan dio.’

²⁹“Abraham rui sa the, ‘Kaniw khang Mousi ni, muhzwng nunc ni nai the. Mi nunc lat tei kaniw piu kan di tho.’

³⁰“‘Kiuc hamh e, apu Abraham, theihmei rui guang ti thei kaniw lungh laic puni de,’ twna kamei rui sa the.

³¹“Tiki Abraham rui sa the, ‘Kaniw Mousi lev muhzwng nunc lat tei piu mak ge thei, theihmei rui guang datna sa bam tisini laa bam ni tu hamh e.’ ”