Read Rongmei Naga LUK 17 Bible Online

LUK 17 - Rongmei Naga bible

LUK 17

¹Jisu rui kaziap nunc khou sa the, “Nthiammei hei thu guang mak nuh makna guang punina di the; tiki kakhou rui nthiammei tiguangmei nunc tei sansi e dav!

²Mi meic nthyammei nunc khou rui gaanv khat ta sini paapc khou tikeyloupui mei swmei suangc mu kaguang khou napriak tauc nleilouna duipui khou phaicloumei rui kakhang gay tap be. Hei zaeng rui,

³nangniw ramhthay o. “Nang chana paapc khou keylou e thei, kata luh tio; kumna kamei lungh laic dat re thei, kuaklou tio.

⁴Kamei rui zaeng neih khat khou nang ruc khou nkhuailou liang chanei pw e thei, kumna guangna luan chaneina, ‘Ai lungh laic the,’ twna sa pw e thei kata kuaklou nina e.”

⁵Khoutei, “Aniw khou lwmmei ti-mbulou o,” twna latdiutatmei nunc rui sa the.

⁶Khoutei Poubauhmei rui sa the, “Nangniw khou gannaeng thw di na sini lwmmei nai e thei, mi bang ti hei, ‘Nang, nang maan phuk patna duipui khou thau o,’ twna sa ti thei hei tei nang lat piu puni de.

⁷“Nangniw bangc khat rui lau suak tat lana hamh e thei lauziu gaengc tat lana guang dat pwkhou, ‘Guang tho, tu zangv khang dungckey tho,’ twna sa nimei thow naina cho?

⁸Mi phaan tei, ‘Nap gan kasiamh tho, siangiat giatna ai tu tang zangv tang mak saanv asiamruai sw o, mi tangv rui nang tu o,’ twna sa pw lak nah cho?

⁹Kata taanc o twna samei guay tei taanhmei khang rui kakaipouc tei rui kabangc ta tei thuanckulou nina cho?

¹⁰Hei tei kumcna, nangniw ni nangniw ta taanc o twna samei guay tei taanc tang pwkhou, ‘Aniw hei luih makmei bangc nunc dyng e, aniw thouc tei na aniw taanh tuang dyng e,’ twna sa o.”

¹¹Jisu Jerusalem thangc keymei chaenglwan khou Galili lev Samaria ramvrei ramv khou tat pat the.

¹²Kamei namv akhat khou gut pwkhou, mphaanhmei gaanv ruh kata ariw the. Kaniw duh thangc dingna,

¹³Kauc ranvna, “Kaipouc, aniw ta zauc nzianlou o!” twna kauc the.

¹⁴Kaniw ta how pwkhou, “Tat tho, nangniw ta amuh nunc khou lyan tat tho,” twna Jisu rui kaniw khou sa the. Kaniw tei tat bammei chaenglwan khou rui nthan[22] dat the.

¹⁵Kaniw pang khou gaanv khat, kamei gay dat the twmei how pwkhou, hanc guang datna, kauc ranvna Ravguangc ta thuanc the.

¹⁶Kamei Jisu phaypav khou nkhum keyna kata thuanckulou the. Mi pu tei Samariamei e.

¹⁷Khoutei Jisu rui sa the, “Gaanv ruh ta tigaylou kan tu hamh nah cho? Baihmei chakiu thu tabui thangc tat kan tha?

¹⁸Mi zaatc baihmeipu na hei hamhna gaanv khat na sini guangna Ravguangc ta thuancku dat mak khah?”

¹⁹Khoutei Jisu rui kakhou sa the, “Thauna tat tho, nang ramlum rui nang ta tigaylou the.”

²⁰Ravguangc guangcdic tabui ganv khou guang puni cho twna Pharisimei nunc rui thanv ti khou, Jisu rui kumna daw the, “Ravguangc guangcdic thu how takhaanh khaanna guang ni tu hamh e,

²¹khatni ‘Mi khou hei nai the,’ hamh e thei, ‘Mi thangc tei nai the,’ twna sa ni tu hamh e. Kalam thu, zauclo, Ravguangc guangcdic thu nangniw lungc khou[23] nai the.”

²²Khoutei Jisu rui kaziap nunc khou tei sa the, “Meic Nac Mpouh tuang tingmik ta tei nangniw how niimei ganv guang puni; tiki hei tei nangniw how ngam lak ge.

²³‘Kamei mi thangc tei bam the!’ hamh e thei ‘Kamei mi khou hei bam the!’ twna meic nunc rui nangniw khou sa puni. Nangniw kaniw thei lay tat riu.

²⁴Kalam thu Meic Nac Mpouh hei Katingmik nungc kiu thu, tingpalik pwkhou, tingpuk tin akhat khou rui katin akhat thangc gaanc tanghmei tei kumc puni de.

²⁵Tiki kamei ryanra ryanriumei mpeyna khatni mi meikin rui kata ganc patloumei ariw rey puni he.

²⁶“Meic Nac Mpouh guang nimei ganv khou kiu thu, Nouha ganv khou kumc puni.

²⁷Nouha hih khou gut nimei tingmik tangh mak saanv, meic nunc tei tuna, zangvna, nowkawna, khatni micna bam khwan e. Khoutei duidai tei guangna kaniw guay ta tei swmaan ngam kan the.

²⁸“Lot ganv khou ni hei tei kumc muay khwan e. Meic nunc tei tuna, zangvna, liuna, zuancna, lingcna khatni kai swna lungc bam khwan e.

²⁹Tiki Lot Sodom khou rui tat pat kanpui nungc tei, mai khatni maipu tingpuk thangc rui riu keyna kaniw guayna ta swmaan kan the.

³⁰“Meic Nac Mpouh ta ndauh pat nimei nungc kiu ni hei tei kumc puni.

³¹Mi nungc kiu kainam khou bammei nunc tei, kainung khou naimei puat laa khang key dat la ri tho. Hei tei kumcna, laupuk khou bammei nunc ni guang dat la ri tho.

³²Lot now ta teic ningtow o!

³³Thow pw ni karingcpaan kan khang swpui mei tei, hei tei swmaan puni; thow pw ni karingcpaan maanloupui mei tei ringhpaan maan mak puni.

³⁴Ai rui nangniw khou sa tuang e, mi nungc zingbangc kiu, meic gaanv nei laeng khou zip bammei khou, gaanv khat ta laa tat puni, gaanv khat ta lou duc puni.

³⁵Meicpui gaanv nei nap riak bammei khou, gaanv khat ta laa tat puni, gaanv khat ta lou duc puni.”

³⁶Meic gaanv nei lau khou taanv taanc bam puni; khoutei gaanv khat ta laa tat puni, gaanv khat ta lou duc puni.[24]

³⁷“Poubauhmei, tabui thangc cho?” twna kaniw rui thanv the. Khoutei, “Theihmei pumc naimei bamv khou tei mouphou guang kaduai puni de,” twna Jisu rui daw the.