Read Rongmei Naga LUK 18 Bible Online

LUK 18 - Rongmei Naga bible

LUK 18

¹Liat lakpui tuang maekna, huayney tanh tan bam o twmei nchamlou khang Jisu rui kaziap nunc khou mi latgiam hei salou khwan e.

²Kumna sa the, “Kaidai akhat khou Ravguangc ta ni ping mak, maansei ta ni chakhwang sw mak twmei latzanpouc gaanv khat nai khwan e.

³Mi kaidai khou tei maypui gaanv khat ni nai khwan e. Kumna mi pui tei kadaeng khou guangna, ‘Ata zauczihmeipu ruc khou latzan swlou o,’ twna sa bam khwan e.

⁴Matak khat thu kamei nuhlou mak ge. Tiki nkhamh khou karana kakhou sa the, ‘Ai hei Ravguangc ta ni ping mak, maansei ta ni chakhwang sw mak tw bam khwan sini,

⁵mi pui hei rui mi kumcna ata sw katuakc bam e thei, ai liat pw lak khe; kum thena ai kakhang latzan kiu swlou ni the.’ ”

⁶Poubauhmei rui sa the, “Ravchaptat makmei latzanpouc tei rui samei tei nking o.

⁷Kumna zingbangc kalaanv kakhou kaucna bammei kamei rui kapahloumei nunc khang hei, Ravguangc rui nchumhmei latzan swlou pw lak nah cho? Kaniw kauc kanak bam kan di ho tw puni nah cho?

⁸Ai rui nangniw khou sa tuang e, kamei katumcna kaniw khang latzan swlou puni. Kum e tiki, Meic Nac Mpouh guang pwkhou, lwmmei ta kamei kandih khou ariw puni daih cho?”

⁹Ravchaptatmei e twna kaniw rana kaniw ta lwmgayna meickai ta malamei nunc khou Jisu rui mi latgiam hei sa the:

¹⁰Meic gaanv nei—Pharisimeipu lev dihkhav kakhameipu huayney khang ravkai khou guang khwan e.

¹¹“Pharisimeipu tei karana ding langcna[25] huayneyna sa the: ‘He Ravguangc, ai nang ta thuancku e, kalam thu ai thu meic baihmei, meicguatmei nunc, meicsimei nunc, lungcmaanvmei nunc, khatni mi dihkhav kakhameipu hei kumhmei ni hamh e.

¹²Ai neidak akhat lungc khou munthiangc kanei e khatni ai mphangmei guay tuang kadam ruh tuang akhat tii e.’

¹³“Tiki dihkhav kakhameipu tei duh thangc dingna, tingkauh thangc zauc sini zauc thau ngam makna, kangaengv hiwna, ‘He Ravguangc, paapcmei ata zauc nzianlou o,’ twna sa the.

¹⁴“Ai rui nangniw khou samei tuang e, Pharisimeipu tei hamhna dihkhav kakhameipu tei kakhuay guay kuaklou tina kakai tat kan the. Kalam thu karana kata tikauhpui mei guay ta tei ti ana keylou puni khatni niamhpui mei ta tei tidaiclou puni.”

¹⁵Kamei rui kahilou khang meic nunc rui alauc nunc ta ni Jisu daeng khou nduangh guang khwan e; tiki hei tei how lana ziap nunc tei rui kaniw ta luh the.

¹⁶Tiki Jisu rui alauc nunc ta tei kawna sa the, “Alauc nunc ta tei adaeng khou tiguang o, kaniw ta khaam riu, kalam thu Ravguangc guangcdic hei mi kumhmei nunc khang e.

¹⁷Ai rui nangniw khou kaling siakna sa tuang e, thow pw ni Ravguangc guangcdic tei alauc kumcna laalou mak ge thei, kamei mi khou tei tabui nungc na sini gut ngam lak ge.”

¹⁸Jihudimei tuang kapypu gaanv khat rui, “Meicgaymei dinhpouc, ringcsuangmei laa khang ai tabui sw nina cho?” twna Jisu khou thanv khwan e.

¹⁹Khoutei Jisu rui kakhou sa the, “Tabui swna nang ata meicgaymei kaw tu cho? Ravguangc na hamhna meicgaymei maek ge.

²⁰‘Lungcmaanv lak nina e, meicdow lak nina e, kaihouc lak nina e, saraamhmei sakhi sw lak nina e, nang pui nang pu ta chakhwang sw nina e,’ twmei latdanv guay hei nang thay the cho.”

²¹“Mi guay hei thu ai alauc douc rui piu guang tuang di the,” twna kamei rui sa the.

²²Hei tei chu lana, Jisu rui kakhou sa the, “Nang khou ntangh makmei akhat nai he. Nang tuang naimei guay zuancna lungcsimei nunc khang tii tio; kum e thei nang khang tingkauh thangc lanv nai puni. Kum lana guangna athei lay o.”

²³Hei tei chu pwkhou, kalung mpeyna ryanra the; kalam thu kamei mpeyna lungcgaymeipu e.

²⁴Hei tei how lana Jisu rui sa the, “Lungcgaymei rui Ravguangc guangcdic gut khang adih kungc kan tu cho!

²⁵Lungcgaymei rui Ravguangc guangcdic gutmei suangc guaikuan rui mpinhmai khou gutmei rui chiw e.”

²⁶“Kum e thei, thow rui kanloumei laa ngam nina cho?” twna hei tei chumei guay rui sa the.

²⁷Khoutei, “Maansei khang ngam makmei tei Ravguangc khang thu ngam mak tuang maek ge,” twna Jisu rui daw the.

²⁸“Aniw ramh guayna ganclouna nang thei lay the,” twna Pitar rui Jisu khou sa the.

²⁹Khoutei Jisu rui kaniw khou sa the, “Ai rui nangniw khou kaling siakna sa tuang e: Ravguangc guangcdic khang rui kakai, kanow kanac nunc, kachaic kakainac nunc, khatni kapui kapu ta gancloupui mei tei,

³⁰ntaw mi khang tei suangc geicna laa dat puni khatni thei thangc ringcsuangmei laa puni.”

³¹Jisu rui ziap ruhna kanei ta tei nduangh ranc patna, kaniw khou sa the, “Aniu Jerusalem thangc ngangh puni the, kumna muhzwng nunc rui Meic Nac Mpouh lam khou hyloumei guayna tei tiguang tangc puni the.

³²Kata zaatc baihmei khou tii patlou puni the. Kaniw rui kata sinnui puni, tizak puni, kakhou nteih nsuklou puni, bai puni, kumna swluai puni;

³³tiki zaeng neih thumhpui nungc ringcthau dat puni.”

³⁴Ziap nunc tei mi guay hei akhat na sini kabah thay mak ge. Mi kabac tei kaniw khou rui nkamhlou kan tina, sa bammei kabac tei kaniw thay mak khe.

³⁵Kumna Jisu Jeriko ana guang pwkhou, mik tiatmeipu gaanv khat chaeng daeng khou dungcna, neytu bam khwan e.

³⁶Meic kangdai tat patmei khwan chu lana, hei tei tabui tuang lana cho twna kamei rui thanv the.

³⁷“Nazarethmei Jisu guang tina e,” twna kaniw rui kakhou sa the.

³⁸Khoutei, “He David Nac Mpouh Jisu, ata zauc nzianlou o!” twna kamei rui kauc the.

³⁹Khoutei, chaeng humei nunc tei rui kata luhna, “Rei rei bam o,” twna sa the. Tiki kamei kauc ranv hay hayna, “David Nac Mpouh, ata zauc nzianlou o!” twna kauc the.

⁴⁰Khoutei Jisu ding the, kumna mi pu ta tei kadaeng khou nduangh guang khang sa the. Kadaeng khou guang pwkhou, Jisu rui kakhou,

⁴¹“Ai rui nang khang tabui swloumei ta laa niina cho?” twna thanv the. “Poubauhmei, amik how dat nii e,” twna Kamei rui sa the.

⁴²Khoutei, “How dat tho; nang lwmmei paan rui nang ta tigaylou the,” twna Jisu rui sa the.

⁴³Mi dyng khou tei kamei kamik how dat the, kumna Ravguangc ta thuancna Jisu thei lay tat the. Meic guay tei hei tei how pwkhou, kaniw ni Ravguangc ta thuanc the.