Read Rongmei Naga LUK 19 Bible Online

LUK 19 - Rongmei Naga bible

LUK 19

¹Jisu Jeriko khou gutna tat ruan pat khwan the.

²Mi khou tei kazanc Zakkaia twmeipu gaanv khat nai khwan e. Kamei tei dihkhav kakhamei kapy khat khwan e. Kumna kamei lungcgay khwan e.

³Jisu kiu thow cho twmei kamei zauh khang karamc khwan e, tiki kahyang ana lana kamei meic kangdai khou tei rui how ngam mak khwan the.

⁴Kumna kamei Jisu pat nimei chaeng khou pak kasuakc patna, kata zauh khang mbu bang khou ku the.

⁵Jisu mi bamv khou tei guang tangc pwkhou, zauc thauna, “Zakkaia, key katumc o; aseic ai nang kai khou bangv puni,” twna sa the.

⁶Khoutei kamei chadi chadana keyna, neihlana Jisu ta kakai khou tibangvlou the.

⁷Hei tei how lana meic guayna tei, “Kamei paapcmei kai khou bangv khang gut kan the,” twna tanglumna sa the.

⁸Zakkaia tei dingthauna sa the, “Poubauhmei, atuang naimei guay tuang kapaek akhat ntaw lungcsimei guay khang tii pat the, khatni ai rui thowkumhmei tuang guatna laaloumei tuang nai khwan e thei, ai kadam padeih mbuna khangclou dat ni the.”

⁹Khoutei Jisu rui kakhou sa the, “Aseic hei mi kaikhunc ti hei kanlou the, kalam thu kamei hei ni Abraham nac mpouh muay de.

¹⁰Meic Nac Mpouh hei maan kanmei ta phu khang khatni kanlou khang guang tuang e.”

¹¹Meic nunc tei hei tei nking bam khou, latgiam akhat salou khwan e. Kalam thu kamei Jerusalem ana guang the, kum tina Ravguangc guangcdic guang puni the twna meic nunc tei ning bam khwan e.

¹²Khoutei Jisu rui sa the, “Meicdaihmei kai khou puancloumei nac gaanv khat rui kamei guanghbamv laa lana hanc guang dat khang duhmei kandic akhat thangc tat khwan e.

¹³Kamei tat ni khou, kamei rui kabangc gaanv ruh ta kaw guangna mina ruh ruh tiilouna, ‘Ai guang dat mak saanv mi hei rui ali bam khwan o,’ twna kadylou the.

¹⁴“Tiki meic nunc tei rui kata karaeng e, kumna kaniw rui kathei thangc meickhyn nunc ndiulouna, ‘Mi pu ti hei aniw guangh tisw nii mak ge,’ twna sa the.

¹⁵“Tiki kata guangh tiswlou the, kumna kamei guang dat the. Khoutei kamei rui syan tiilou kanmei bangc gaanv ruh ta tei kawna azuh azuh guanh pat the cho twmei thanv the.

¹⁶“Reymeipu tei guangna, ‘Poubauhmei, nang tuang mina tei rui mina ruh tuangc the,’ twna sa the.

¹⁷“Khoutei kakaipouc tei rui sa the, ‘Gay the, gaymei bangc! Nang ramh katitnamei khou lwm nuhpui zaeng rui, kaidai ruh ta sin tho.’

¹⁸“Kaneimeipu tei guangna, ‘Poubauhmei, nang tuang mina tei rui mina panguh tuangc the,’ twna sa the.

¹⁹“Khoutei, ‘Nang kaidai panguh sin tho,’ twna kakaipouc tei rui sa the.

²⁰“Khoutei baihmei bangc akhat ni guangna, ‘Poubauhmei, mi hei nang rui tiiloumei mina tei e. Mi hei phey rui duamna rylou tuang the.

²¹Nang thu suailou nuh makmeipu de; kumna ai nang ta pingna the. Nang thu nang tuang hamhmei ta sini laameipu e khatni nang rui lingclou makmei ta taymeipu e!’

²²“Khoutei guangh tei rui sa the, ‘He meicsimei bangc, nang mwang khou rui sa pat kanmei lat tei rui, ai rui nang ta latzan sw puni the. Ai hei suailou nuh makmeipu e, ai hei atuang hamhmei ta laameipu e khatni ai rui lingclou makmei ta taymeipu e twmei nang thay the.

²³Ai guang dat khou kathuay kazauhna laa dat khang hei tei syan alipuikai khou lou nuh diki, tabui swna lou mak tu cho?’

²⁴“Khoutei kamei rui kadaeng khou ding bammei nunc khou tei sa the, ‘Katuang mina tei kakhou rui laana, mina ruh sinmeipu khou tei tiilou ti tho.’

²⁵“‘Poubauhmei, kakhang thu ruh nai bam dyng the cho?’ twna kaniw rui sa the.

²⁶“Kamei rui sa the, ‘Ai rui nangniw khou sa tuang e: Naipui mei khou tei tii mbulou puni, maekpui mei khou tei kakhou naimei na tei sini laa tat kan puni.

²⁷Tiki ata kaniw tuang guangc tisw zihmei, ata zauczihmei nunc ta tei, mi khou hei zay guangna ahu khou dowluai o.’ ”

²⁸Mi guay hei salou tang lana, Jisu Jerusalem nzwanna ngangh the.

²⁹Kamei Olive Chyng twna kawmei bamv khou, Bethphage lev Bethani ana guang pwkhou, kamei rui kaziap gaanv nei ta ndiulou huna, kaney khou sa the,

³⁰“Nangney hu khou naimei namv khou hei nangney tat ro. Mi khou tei gut pwkhou meic tuangclou makmei kuanniam launa bangclou bammei ta ariw puni. Hei tei ricna mi khou hei laaguang o.

³¹‘Tabui swna nangney mi hei ric bam tu cho?’ twna thanv pw e thei, ‘Kaipouc[26] khang kage naina e,’ twna sa tio.”

³²Ndiuloumeipu nei tei tat the, kumna kaney khou saloumei tei kahak ariw the.

³³Kaney kuanniam launa tei ric bam khou, “Nangney tabui swna mi hei ric bam tu cho?” twna kakaipouc rui thanv the.

³⁴“Poubauhmei khang kage naina e,” twna kaney rui daw the.

³⁵Kaney rui hei tei zay guang the. Kaniw rui kuanniam ruc khou tei phey nsaplouna Jisu ta tidungclou the.

³⁶Kamei tuangc guang pwkhou, meic nunc rui kaniw tuang phey chaeng khou bamclou the.

³⁷Olive Chyng but khou rui kasou tat key nimei bamv khou kamei guang tangc pwkhou, kaziap meic kangdai, kaniw rui how kanmei charynmei taanv guay khang tei rui Ravguangc ta thuanckuna, kauc ranvna mi kumna kauc the:

³⁸“Poubauhmei zanc khou guangmei guangc hei sangaymei e! Tingkauh khou chuzaenghmei nai diu, khatni kauh liangmei khou hymdaihmei sw diu!”

³⁹Meic kangdai khou tei rui Pharisimei gaanvsaekc rui, “Dinhpouc, nang ziap nunc ta mphut tio,” twna sa the.

⁴⁰Khoutei Jisu rui sa the, “Ai rui nangniw khou sa tuang e: kaniw kauc ti mak ge thei, ntauh guay rui kauc thau puni de.”

⁴¹Jisu Jerusalem daeng ana guangna mi kaidai ta tei how pwkhou, kamei mi ruc khou tei kaplouna,

⁴²sa the, “Nang khang chuzaenghmei phungc guang nimei chaeng tei aseic na sini thay khwan e thei mu ni! Tiki hei tei nang how mak khang nang khou rui nkamhlou kan the.

⁴³Nang ta zauczihmei rui nang ta rilin chau haengvna ding bin nimei ganv guang pw the.

⁴⁴Nang ta khatni nang raengc lungc khou bammei mei guay ta sw mut sutlou puni the. Ntauh akhat ruc khou ntauh akhat nsaplou bam dat lak khe. Kalam thu Ravguangc nang ta nkhavlou khang guangmei ta nang thay mak khe.”

⁴⁵Khoutei Jisu Ravkai khou gutna ramh zuanc bammei guay ta tei nthau ganc the.

⁴⁶Kumna kamei rui kaniw khou sa the, “‘Akai hei huayneypui kai sw puni,’ twna hylou e, tiki nangniw rui kwamtumei nunc kai tiswlou the.”

⁴⁷Kumna tingmik pum kamei Ravkai khou nchamlou khwan e. Khoutei amuh daihmei nunc, Riakdanv dinhpouc nunc, khatni charuangc kapy nunc rui kata swluai khang karamc khwan e.

⁴⁸Tiki kaniw sw khang kachaeng maek khwan e, kalam thu meic guayna rui kalat nking niina nking bam khwan e.