Read Rongmei Naga LUK 21 Bible Online

LUK 21 - Rongmei Naga bible

LUK 21

¹Khoutei Jisu zauc pat pwkhou, lungcgaymei nunc puatkat khuk khou kaniw tuang puatkat phaic keylou bammei ta how the.

²Lungcsimei maypui gaanv khat ni paic kanei na mi khou tei phaic keylou kanmei ta how the.

³Khoutei Jisu rui sa the, “Ai rui nangniw khou kaling siakna sa tuang e: meic baihmei guay tuang suangc mi maypui tuang tei geic liang e.

⁴Kaniw hei thu kaniw tuang liamh laihmei khou rui tii tuang de, tiki mi pui hei thu maekna kamei tu nimei phaan tii tuang e.”

⁵Howgaymei tauc khatni puatkat swna katloumei puat rui kasiamhloumei Ravkai tuang howgaymei tei ziap gaanvsaekc rui sa khwan e. Khoutei Jisu rui sa the,

⁶“Nangniw ntaw how bammei hei, ntauh akhat rui ntauh akhat ruc khou nai bam dat lak nimei ganv guang puni. Kaguayna pangv key ngam kan puni.”

⁷Khoutei, “Dinhpouc, mi kiu tabui nungc pat puni cho? Mi kiu guang puni the twmei nchinmei tuang tabui tuang nai puni cho?” twna kaniw rui thanv the.

⁸Khoutei Jisu rui sa the, “Nangniw ta chaengzay mbiangh mak khang ramhthay o. Kalam thu meic mpeyna azanc khou guangna, ‘Ai hei kamei kiu the!’ khatni ‘Kaganv ana the,’ twna sa puni. Kaniw thei lay riu.

⁹Rih chamv khatni rihthaumei chamv chu pwkhou ping nangh e. Mi guay hei pat rey puni; tiki nganvmei tei thu pat rap ni tu hamh mak he.”

¹⁰Khoutei kamei rui sa dat re, “Zaatc khat rui zaatc khat ta khatni guanghdic khat rui guanghdic khat ta adow puni.

¹¹Baengla daih mpeyna guang puni, kabamv mpeyna khou nkowmei khatni ravpyan mpeyna guang puni, meic pingmei tuang khatni sw-nchinmei tuang mpeyna tingpuk khou pat puni.

¹²“Tiki mi guay hei pat makmei hu khou, nangniw ta nymna rairiu puni. Kaniw rui nangniw ta sinagog khou phungc guang puni khatni kangkai khou lou puni, azanc zaeng rui nangniw ta guangh nunc hu khou khatni guanghkhyn nunc hu khou zay guang puni.

¹³Hei tei nangniw khang gaychamv dinh khang kadouchamei sw dat puni.

¹⁴Hei zaeng rui nang pumc khang akumhna daw duak nina cho twna kakhanh rey bam nangh e.

¹⁵Nangniw ta zauczihmei nunc mwang daw ngam khang nangniw khang lat ni ningting ni tiilou puni.

¹⁶Nangniw pui pu rui, chana rui, riang luaih rui khatni rup rian rui tinym puni, kumna nangniw gaanvsaekc ta kaniw rui swluai puni.

¹⁷Azaeng rui nangniw ta meic guayna rui karaeng puni.

¹⁸Tiki nangniw samlu na sini maan lak ge.

¹⁹Nangniw khaengvthaypui paan rui ringhpaan laatow puni.

²⁰“Jerusalem ti hei rihmei rui dingbin guangmei ta how pwkhou, mi ti hei sw kamut kamai nimei ana the twmei nangniw thay tho.

²¹Mi khou kiu Judia khou bammei nunc chyngram thangc pak tat la tho, kaidai lungc khou bammei nunc ni pak pat la tho, kapaengc thangc bammei nunc gut dat la ri tho.

²²Kalam thu mi hei hylou bammei latzan guay tei keylou khang guangmei tuang di the.

²³Mi ganv khou kiu kapumc nrit bammei khatni angana puanc nouc bammei pui nunc tei sansi e dav! Kalam thu mi kandic khou hei ryanra daihmei khatni meic nunc khou kalungpuam keylou puni the.

²⁴Kaniw buy baeng mun khou theic puni khatni kaniw ta zaatc guayna khou kangmei swna zay tat puni. Zentelmei nunc tuang ganv luai mak saanv, Jerusalem ti hei Zentelmei guay rui ni bin bam puni.

²⁵“Bw, neih, gaanchuangcna khou madanhmei pat puni. Kandih kapwm khou duipui kamuatcmei khatni mi khwan khou tei rui swang dwang maekna pingmei padik puni.

²⁶Kandih nam ruc khou guang punimei khang tei kakhanhna meic nunc tei pingna theic key puni; kalam thu tingpuk ngamv guay ta kanuk puni.

²⁷Mi ganv khou kiu, Meic Nac Mpouh katik kahym daicna muangh khou keymei ta kaniw how puni.

²⁸Mi guay hei guang thau pw e thei, dingthauna nangniw py khuang thau tho. Kalam thu nangniw ta thuak patlou nimei tei ana guang the.”

²⁹Jisu rui kaniw khou mi latgiam hei salou e: “Tadut bang khatni thing bang guay ta tei zauc lo.

³⁰Hei tei kazik kasatc pat pw e thei lauphwnswan ana the twmei nangniw thay e.

³¹Hei tei kumcna, mi guay hei pat pw e thei, Ravguangc guangcdic ana the twmei thay la tho.

³²“Ai rui nangniw khou kaling siakna sa tuang e: mi guay hei pat kan mak saanv, mi zuk hei luai ni tu hamh e.

³³Tingpuk kandih maan kan puni; tiki alat thu maan ni tu hamh e.

³⁴“Tu mba zangv mbamei khatni mi kandic tuang khang kapaamvmei rui nangniw lung sw kambangvna bam khou phah nkhap kumcna Poubauhmei tingmik tei guanglou mak khang, nangniw kasiath thay o.

³⁵Kalam thu mi hei kandih nam ruc khou lungc bammei maansei katana khou guanglou puni.

³⁶Nangniw ntak nrakna nkhwan bam o, khatni pat nimei guay khou hei rui duak ngam khang khatni Meic Nac Mpouh hu khou ding ngam khang huayney tanh tan bam o.”

³⁷Tingmik pum kamei Ravkai khou guangna dinclou khwan e, kumna tingzyn key e thei Olive Chyng thangc zip tat dat khwan e,

³⁸khatni kalat nking khang meic guay Ravkai khou lauthwan thwanzingh guang dat khwan e.