Read Rongmei Naga LUK 22 Bible Online

LUK 22 - Rongmei Naga bible

LUK 22

¹Kaanpatpui Ngai twna kawmei Khay Loumakpui Ngai ana guang khwan the.

²Khoutei amuh daihmei nunc khatni Riakdanv dinhpouc nunc rui Jisu ta swluai nuhpui chaeng phu bam khwan e. Kalam thu kaniw meic nunc ta ping khwan e.

³Khoutei ziap ruhna kanei pang khou kazauhmei Iskariot twna kawmei Juda khou Seitaan gut the.

⁴Khoutei Juda tei amuh daihmei nunc khatni ravkai rigaanv kapy nunc daeng thangc tatna akumhna kamei rui Jisu ta zuanctu nuh puni cho twmei kaphianh the.

⁵Khoutei kaniw neihla the, kumna kakhang syan tii khang nuh the.

⁶Juda ni hei tei nuh the, kumna meic pang bam makmei ganv zaucna kata tinym khang kadouchamei zauc the.

⁷Khay Loumakpui Ngai tuang Kaanpatmei lauziu khaeng nimei tingmik tei guang the.

⁸Khoutei Jisu rui Pitar lev Jahon ta ndiuna, “Kaanpatpui taektw tu khang nangney tatna aniu khang chamdaanv tho,” twna sa the.

⁹“Tabui bamv khou chamdaanvlou o twna cho?” twna kaney rui thanv the.

¹⁰Khoutei kaney khou sa the, “Nangney kaidai khou tei gut pwkhou, duilai puancna tat bammei gaanv khat pu nangney ta ariw puni. Kathei layna kamei gutmei kai khou tei gut tho.

¹¹Kumna mi kai kaipouc khou tei, ‘Dinhpouc kaziap nunc lev Kaanpatpui taektw tu nimei bamv kiu tabui khou tei cho twna kamei rui sa e,’ twna sa tio.

¹²Kamei rui nangney khou kai kauh khou tanvna lou ntanghmei kai daihmei akhat lyanlou puni. Mi khou tei chamdaanv tho.”

¹³Kaney tat the, kumna Jisu rui kaney khou saloumei kahak tei ariw the. Kumna kaney Kaanpatpui ngai khang tei chamdaanv the.

¹⁴Kaganv tangc pwkhou, Jisu khatni kaziap nunc tei tu khang dungckey the.

¹⁵Khoutei Jisu rui kaziap nunc khou tei sa the, “Ai ryanramei ariw makmei hu khou mi Kaanpatpui taektw hei nangniw lev tu nchamclou niina bammei tuang the.

¹⁶Kalam thu ai rui nangniw khou sa tuang e: nthuihmei Kaanpatpui ngai taektw Ravguangc guangcdic khou tu mak saanv, mi hei thu ai tu dat ni tu hamh the.”

¹⁷Khoutei buangh akhat laana, kamei rui thuanckulouna sa the, “Mi hei laa tho, kumna nangniw meic guayna zangv tho.

¹⁸Kalam thu ai rui nangniw khou sa tuang e: Ravguangc guangcdic guang mak saanv, drakha thai dui hei ai thu zangv dat ni tu hamh the.”

¹⁹Kamei rui ntyan dwm akhat laana thuanckulouna, by bak the. Kumna hei tei kaniw khang tiina sa the, “Mi hei nangniw khang rui tiiloumei apumc the; ata ningtow khang nangniw mi hei taanc o.”

²⁰Hei tei kumcna, tu tang zangv tang pwkhou, buangh tei laana sa the, “Mi buangc hei nangniw khang bun patloumei, latdyng thanh tuang azei the.[28]

²¹Tiki ata zuanctu nimeipu tei ai lev kuakpaeng akhat na khou baanlaan kariu bam e.

²²Meic Nac Mpouh hei thu kakhang damclou tangmei thei layna tat bam tuang de; tiki kata zuanctumeipu tei mu kasan si e dav!”

²³Mi pu kiu thow lana cho twna kaniw pang khou kakhi thau the.

²⁴Kaniw pang khou thow ta tei daic liangmei swna laalou puni cho twna ni kaniw pang khou latgeic thau the.

²⁵Khoutei Jisu rui kaniw khou sa the, “Zaatc Zentenmei guangc nunc rui kamei nunc ruc khou kaipouc sw e, khatni meic nunc ruc khou ngamv sinmei nunc rui kaniw ta zauzian thaymeipu twna sa e.

²⁶Tiki nangniw thu hei tei kumc nina hamh e. Nangniw pang khou daic liangmei kamei tei alauc liangmei kumc nina e, khatni kapy swmei kamei tei siamruaimei kumc nina e.

²⁷Thow tei daihmei cho? Kuakpaeng khou dungc bammei tei ny, siamruai sw bammei tei cho? Kuakpaeng khou dungc bammei kamei tei hamh nah cho? Tiki ai nangniw pang khou siamruai swpui mei kumcna bam tuang e.

²⁸“Nangniw hei ata nchanvmei ganv khou ata bam nduanghmei nunc the.

²⁹Apu rui akhang tiiloumei kumcna ai rui ni nangniw khang guanghdic akhat tii the.

³⁰Kumna atuang guangcdic khou nangniw ni akuakpaeng khou tu nchamc zangv nchamc puni, khatni guangh bamvpaeng khou dungcna Isaraelmei kaikhwang ruhna kanei ta sin puni.

³¹“Simon, Simon, gehu katang kumc nangniw ta katang khang Seitaan rui ney pat kan the.

³²Tiki Simon, nang rammei maan mak khang, ai nang khang huayneylou kan the. Nang akhou hanc guang pwkhou, nang chana nunc ta titanclou o.”

³³Khoutei, “Poubauhmei, kangkai khou ni, theihmei khou ni, ai nang thei lay tat khang alung ding the,” twna Pitar rui sa the.

³⁴Tiki Jisu rui sa the, “Ai nang khou sa tuang e: Pitar, nang rui nang hei amei hamh e twna, sa luan kathumh mak saanv aseic hei nruay khuangc ni tu hamh e.”

³⁵Khoutei Jisu rui kaniw khou sa the, “Ai rui nangniw ta syankhau ni, khau ni, phaythuapc ni tiphungh makna ndiu pat khou tei, nangniw khang gaat tuang nai buh cho?” “Ramh gaat tuang maek ge,” twna kaniw rui daw the.

³⁶Jisu rui kaniw khou sa the, “Tiki ntaw thu, syankhau nai e thei phungc tho, khau ni phungc tho; baengsaeng maek ge thei nang phey zuancna liu tho.

³⁷‘Kata nkhuaimei pang khou chaklou the,’ twna hylou e. Ai rui nangniw khou samei tuang e: mi hei akhou guang tangclou puni the. Ngguay, alam khou hyloumei guay tei guang tangc nthuih puni the.”

³⁸“Poubauhmei, zauclo, baengsaeng kanei nai the,” twna kaziap nunc rui sa the. “Hei tei biuc the,”[29] twna Jisu rui sa the.

³⁹Jisu tat patna, kamei tat raph rap bammei bamv Olive Chyng thangc tat kan the. Kumna kaziap nunc ni kathei lay tat khwan e.

⁴⁰Mi bamv tei guang tangc pwkhou, kamei rui kaziap nunc khou, “Nangniw nthiammei khou bowlou mak khang huayney o,” twna sa the.

⁴¹Kamei mi bamv khou tei rui ntauh ndat tangc biuhmei saan thangc tat kasuanh gutna, khuksun keyna huayneyna sa the,

⁴²“Apule, nang rui nuh e thei mi buangc hei akhou rui laa ganclou o; tiki ai ningmei hamh e, nang ningmei sw kan dio.”

⁴³Khoutei tingkauh thangc rui kauh baanchara keyna kapumtan titanclou the.[30]

⁴⁴Kamei kalung ryanrana huayney ranvna huayney the, kumna zei talanvdui kumcna kandih khou zow key the.

⁴⁵Kamei huayney bammei khou tei rui thau datna, kaziap nunc daeng khou pat dat the. Khoutei kaniw lungh ryanra lakna zip bammei ta ariw the.

⁴⁶“Tabui swna nangniw zip bam tu cho? Nangniw nthiammei khou bowlou mak khang thauna huayney o,” twna kaniw khou sa the.

⁴⁷Jisu rui mi kumna sa bam khou, ziap ruhna kanei khou kazauhmei Juda twna kawmeipu rui nduanghna meic kangdai guang the. Kamei Jisu daeng khou guangna kata kaput the.

⁴⁸Khoutei, “Juda, nang Meic Nac Mpouh ta kaputna zuanctu ni twna cho?” twna Jisu rui kakhou sa the.

⁴⁹Kaniw rui sw punimei tei Jisu thei laymei nunc tei thay la thena, “Poubauhmei, baengsaeng rui dow di kho cho?” twna sa the.

⁵⁰Khoutei kaniw pang khou gaanv khat rui tingkuh bangc gaanv khat ta dow the, kumna kanu siap pat the.

⁵¹Khoutei, “Sw dat ri tho!” twna Jisu rui sana, mi pu nu tei kahilouna tigaylou dat kan the.

⁵²Khoutei Jisu rui, kata nym khang guangmei amuh daihmei nunc, ravkai rigaanv kapy nunc khatni gaanvthaih nunc khou tei sa the, “Nangniw kwamtupui mei ta nym ni kumcna baengsaeng khatni thing dangv sinna guang tu cho?

⁵³Tingmik pum ai Ravkai khou nangniw lev bam nchamc bam tuang de; tiki nangniw ata nym mak ge. Tiki mi hei nangniw tuang ganv tina the—zinghmei ngamv tuang ganv tina the.”

⁵⁴Kaniw rui Jisu ta nymna zay tat the, kumna tingkuh kai khou zay guang the. Khoutei Pitar ni tat mpaanna lay guang khwan e.

⁵⁵Mi khou tei kaimav khou mai swlouna dungc haengvna bammei nunc pang khou kamei ni lay dungc bam khwan e.

⁵⁶Banghpui gaanv khat rui kata mi khou tei dungc bammei ta mai riw khou rui how lana, kata matingna, “Mi pu hei Jisu thei laymei de,” twna sa the.

⁵⁷“Ai kata thay mak ge,” twna kamei rui mi pui khou tei sa the.

⁵⁸Kanakc datmei tangv, meic baihmei gaanv khat rui kata how lana, “Nang ni kaniw pang khou kazauhmei de,” twna sa the. “Ai kiuc hamh e,” twna Pitar rui sa the.

⁵⁹Ganvdak akhat dou tangv, meic baihmei gaanv khat rui, “Mi pu hei kathei laymei changh de. Kamei Galilimei de,” twna sa the.

⁶⁰Khoutei, “Nang sa bammei hei tabui tuang cho, ai thay mak ge!” twna Pitar rui daw the. Mi dyng khou tei nruay khuangc the.

⁶¹Khoutei Poubauhmei ziangrih patna, Pitar ta zauc the. “Aseic nruay khuangh makmei hu khou, nang amei hamh e twna sa luan kathumh puni,” twna Poubauhmei rui kakhou saloumei tei kamei ningtow the.

⁶²Khoutei kamei kapaengc patna, kalung kabiuna kap the.

⁶³Khoutei Jisu ta gaek bammei nunc tei rui,

⁶⁴kamik duamlouna bai the, kumna kata sinnuina, “Nang ta baimei hei thow cho dinc pat ro,” twna sa the.

⁶⁵Kumna baih baihmei kata sw zakpui lat mpeyna sa the.

⁶⁶Tinggaanc pat pwkhou, charuangc gaanthaic nunc, amuh daihmei nunc khatni Riakdanv dinhpouc nunc kaniw pei khou guang kaduaina, Jisu ta mi khou tei zay guang the.

⁶⁷Khoutei, “Nang Khrista kiu cho? Aniw khou sa o,” twna katy the. “Ai sa tina nangniw ata lwm ni tu hamh e.

⁶⁸Ai rui thanv tina nangniw daw ni tu hamh e.

⁶⁹Tiki ntaw khou rui thauna, Meic Nac Mpouh hei Ngamparimeipu Ravguangc baanzat thangc dungc puni the,” twna Jisu rui daw the.

⁷⁰“Kum e thei, nang Ravguangc Nac Mpouh cho?” twna kaniw rui sa the. Khoutei, “Nangniw rui samei tei kumcna, ai kiuc the,” twna Jisu rui mundaw the.

⁷¹Khoutei kaniw rui sa the, “Tabui tuang sakhi aniw kage nai dat hena cho? Kamwang kahak khou rui aniu chu the.”