Read Rongmei Naga LUK 3 Bible Online

LUK 3 - Rongmei Naga bible

LUK 3

¹Kaisar Tiberia guangh swmei ruhna panguhmei kwm—Ponta Pilat rui Judia khou guanghkhyn, Herod rui Galili ramvlangv tuang dihsinpouc, kakainac Philip rui Ituria lev Trakhoniti ramvlangv tuang dihsinpouc, khatni Lisania rui Abilene ramvlangv tuang dihsinpouc sw bammei douc;

²khatni Anna lev Kaiapha rui amuh sw bammei douc, Zekaria nac mpouh Jahon tazikramv khou bam khou, Ravguangc tuang lat kakhou sa guang khwan e.

³Kamei Jordan daeng nkuaymei ramv kapwm khou tatna paapc guay kuaklou khang lungh laicna duilup khang dinc ndauh the.

⁴Mi hei muhzwng Isaia rui hyloumei khou, “Tazikramv khou gaanv khat, mi kumcna kauc bam e: ‘Poubauhmei guang pw the, Kakhang chaeng sw tho; kakhang chaeng sw ndiau tho.

⁵Kabaek guay sw padik puni, chyngbut luanghbut guay sw kazaengc puni; Kadip kadaengvmei chaeng nuk guay sw ntyng puni; kathukh kaduk guay sw padik puni.

⁶Kumna meic guayna Ravguangc rui kanloumei how puni,’ ” twna samei tei the.

⁷Kumna kamei rui duiluplou khang guangmei meic kangdai khou tei Jahon rui sa the, “Nangniw nrui nac nunc! Guang nimei latzan khou rui pak la tho twna nangniw khou thow rui sa pwna cho?

⁸Nangniw lungh laihmei thai nthai o; ‘aniw thu Abraham nac nunc de,’ twna du daic bam la ri tho. Ai rui nangniw khou sa e: Ravguangc thu mi taucbut nunc ti hei Abraham nac nunc ti mbaihlou ngam de.

⁹Ntaw ni thing bang guay bangbi khou nrih lou bam the, kumna kathai gaymei nthai makmei bang guay ta gai bauna mai khou phaiclou puni.”

¹⁰Khoutei, “Mi kum e thei aniw tabui tuang sw nina cho?” twna meic kangdai tei rui thanv the.

¹¹Khoutei Jahon rui sa the, “Thiula kanei naimei tei rui maekmei tei lev piu nzanh o, khatni tu khang naimei tei rui maekmei lev tu nzanh o.”

¹²Dihkhav kakhamei nunc ni duilup khang guangna, “Dinhpouc, aniw tabui tuang sw nina cho?” twna thanv the.

¹³“Nangniw ta laa o twna saloumei khou tei rui laa mbu riu,” twna Jahon rui kaniw khou sa the.

¹⁴Khoutei, “Aniw ni tabui tuang sw nina cho?” twna rihmei nunc rui ni thanv the. “Meickai tuang syan asut laa riu khatni nkhuai makmei khou khuay nkhamlou riu. Nang tuang taanvphy tei nang khang pianmei sw o,” twna kamei rui daw the.

¹⁵Meic nunc tei lwmgayna phaengc bam khou khatni Jahon hei Khrista kiu lana khuang di the twna meic guay tei kaniw lungning khou kakhanhna bam khou,

¹⁶Jahon rui kaniw khou sa the, “Ai rui nangniw ta dui rui duiluplou the. Tiki akhang suangc ngamv daihmei gaanv khat guang puni. Ai thu katuang phaythuapc riang rih khang na sini biuhpui mei hamh e. Kamei rui nangniw ta Bumaengh Nthanmei rui khatni mai rui luplou puni.

¹⁷Kabaanc khou nzamh sin e, kumna laudy bamv khou rui kagung guay sw nthan puni. Katak guay kasaamc khou phungc guanglou puni. Tiki kagung guay tei amit dat makmei mai khou ntei puni.”

¹⁸Kumna baih baihmei lat mpeyna ni sana, Jahon rui katiulou the khatni kaniw khou gaychamv dinclou the.

¹⁹Tiki Jahon rui dihsinpouc Herod ta kakainac now Herodia kaney lungc nkhuaimei zaeng rui khatni kamei rui taanc kanmei simei taanv guay zaeng rui luh tina,

²⁰kamei rui Jahon ta kangkai khou louna simei taanv taanc katynlou the.

²¹Meic guay ta tei duiluplou tangna Jisu ta ni luplou the. Khoutei kamei huayney bam khou, tingkauh laanc patna,

²²Bumaengh Nthanmei akhouhna kumcna kapumc swna kakhou keylou the. Khoutei, “Nang hei ai rui nzianmei, ai rui pianmei Anac Mpouh e,” twna tingkauh thangc rui kauc key the.

²³Jisu kamei kataanv kahouh khou katingkwm tamruc dou khwan e. Meic nunc ramchak khou, kamei hei Josep nac e, Josep hei Heli nac e,

²⁴Heli hei Matthat nac e, Matthat hei Levi nac e, Levi hei Melkhi nac e, Melkhi hei Jannai nac e. Jannai hei Josep nac e,

²⁵Josep hei Mattathia nac e, Mattathia hei Amos nac e, Amos hei Nahum nac e, Nahum hei Esli nac e, Esli hei Naggai nac e,

²⁶Naggai hei Maath nac e, Maath hei Mattathia nac e, Mattathia hei Semein nac e, Semein hei Josekh nac e, Josekh hei Joda nac e,

²⁷Joda hei Jaanan nac e, Jaanan hei Rhesa nac e, Rhesa hei Zerubbabel nac e, Jerubbabel hei Shealtiel nac e. Shealtiel hei Neri nac e,

²⁸Neri hei Melkhi nac e, Melkhi hei Addi nac e, Addi hei Kosam nac e, Kosam hei Elmadam nac e, Elmadam hei Er nac e,

²⁹Er hei Joshua nac e, Joshua hei Eliezar nac e, Eliezar hei Jorim nac e, Jorim hei Matthat nac e, Matthat hei Levi nac e,

³⁰Levi hei Simeon nac e, Simeon hei Juda nac e, Juda hei Josep nac e, Josep hei Jonam nac e, Jonam hei Eliakim nac e,

³¹Eliakim hei Melea nac e, Melea hei Menna nac e, Menna hei Mattatha nac e, Mattatha hei Nathan nac e, Nathan hei David nac e,

³²David hei Jessi nac e, Jessi hei Obed nac e, Obed hei Boaz nac e, Boaz hei Salmon nac e, Salmon hei Nashon nac e,

³³Nashon hei Amminadab nac e, Amminadab hei Admin nac e, Admin hei Arni nac e, Arni hei Hezron nac e, Hezron hei Perez nac e, Perez hei Juda nac e,

³⁴Juda hei Jakob nac e, Jakob hei Isak nac e, Isak hei Abraham nac e, Abraham hei Tera nac e, Tera hei Nahor nac e,

³⁵Nahor hei Serug nac e, Serug hei Reu nac e, Reu hei Pereg nac e, Pereg hei Eber nac e, Eber hei Shela nac e,

³⁶Shela hei Kainan nac e, Kainan hei Arphasad nac e, Arphasad hei Shem nac e, Shem hei Nouha nac e, Nouha hei Lamek nac e,

³⁷Lamekh hei Methusela nac e, Methusela hei Enok nac e, Enok hei Jared nac e, Jared hei Mahalalil nac e, Mahalalil hei Kainan nac e,

³⁸Kainan hei Enos nac e, Enos hei Set nac e, Set hei Adam nac e, Adam hei Ravguangc nac e.