Read Rongmei Naga LUK 4 Bible Online

LUK 4 - Rongmei Naga bible

LUK 4

¹Jisu, Bumaengh Nthanmei rui padikna Jordan thangc rui guang dat khou, Bumaengh rui kata tazikramv thangc zaeng riakdei nduanghlou khwan e.

²Mi khou tei ravsic rui kata nchanv khwan e. Mi ganv lungc khou tei kamei tu zangv mak khwan e, kumna nkhamh khou ndaapc khwan the.

³Khoutei, “Nang Ravguangc Nac Mpouh e thei, mi taucbut ti hei ‘ntyan mbaih o’ twna sa tio,” twna ravsic rui kakhou sa the.

⁴Khoutei Jisu rui daw the, “‘Ntyan na rui meic ringh mak ge’ twna hylouna nai e.”

⁵Khoutei ravsic tei rui Jisu ta kauh khou nduangh kuna kadyng khou mbaanv kapwm tuang guangcdic guay lyanlou the.

⁶Ravsic tei rui kakhou sa the, “Mi guangcdic guay tuang ngamv khatni hym hei ai rui nang khang tii puni; kalam thu mi hei abaanc khou tiilou the; kumna mi hei ai rui tiilou nii niimei khou tiilou e.

⁷Kumna nang ahu khou nkhum keyna ata kalum e thei, mi guay hei nang tuang sw puni.”

⁸Khoutei Jisu rui sa the, “‘Poubauhmei nang Racguangc ta nang kalum nina e khatni kasiamruai na sw nina e’ twna hylouna nai e.”

⁹Khoutei Jisu ta Jerusalem khou nduangh guangna Ravkai twan pinh khou tidinglouna ravsic tei rui sa the, “Nang Ravguangc Nac Mpouh e thei, mi khou hei rui cham key o;

¹⁰‘Nang ta gaeklou khang kabaanchara nunc ta ndiulou puni; kumna nang phay ntauh khou kadyang mak khang kaniw baanc rui nang ta kapuanglou puni’ twna hylouna nai e.”

¹²Khoutei Jisu rui sa dawna sa the, “‘Nang Racguangc Poubauhmei ta nang nchanv lak nina e’ twna sa e.”

¹³Nchanv nimei guay nchanv ntangh lana, kadouchamei ganv ariw dat mak saanv khang ravsic tei kakhou rui tat pat kan the.

¹⁴Jisu Bumaengh pumtan phungcna Galili khou guang dat the, kumna mi ramv gaengv zaengv kapwm khou tei kazanc dinc lik the.

¹⁵Kamei rui kaniw tuang sinagog guay khou nchamlou the, kumna meic guayna rui kata thuanc the.

¹⁶Mi tangv Jisu kamei daic thaumei kaidai Nazareth khou guang the. Khoutei kamei katuang chav sw bammei thei layna, Sabbathneic sinagog ku the. Kumna Nthanmei Latrik pah khang kamei dingthau the.

¹⁷Khoutei muhzwng Isaia tuang latrik zy kakhou tiilou the. Kumna kamei hei tei ric pat pwkhou, mi kumcna hylou bammei tei ariw the: “Poubauhmei Bumaengc akhou bam e; kalam thu lungcsimei nunc khou gaychamv dinh khang, kamei rui ata suanglou the. Bangclou bammei nunc khou ricloumei chamv, khatni mik tiatmei nunc khou, mik tirakloumei chamv dinc ndauh khang, sin zyn bammei nunc ta tiduaklou khang,

¹⁹khatni Poubauhmei tuang zauzian ganv kauc ndauh khang, kamei rui ata ndiulou the.”

²⁰Kumna Jisu latrik zy tei kazihlou datna siamruaimeipu khou tiilou lana dungckey kan the. Khoutei sinagog khou bammei guay tei kata miktunna zauc the.

²¹Khoutei kamei rui kaniw khou, “Aseic nangniw nking bammei Nthanmei Latrik khou hyloumei hei ntaw guang tangc bam the,” twna sa the.

²²Khoutei kiuc dyng the twna meic guayna rui laalou the khatni kamwang khou rui patmei zauzian lat guay khou tei kaniw ngak the. Kumna, “Mi hei Josep nac tei hamhna cho?” twna kaniw rui sa the.

²³Khoutei Jisu rui kaniw khou sa the, “ ‘Ravtow amucle, nang rana nang ta swgay o’ twmei latchap hei nangniw akhou suai makna sa puni. ‘Nang rui Kapharnahum khou taanclou kan e twna aniw chumei guay tei mi nang ramc kaidai khou hei taanclou o’ twna sa puni.

²⁴“Ai rui nangniw khou kaling siakna sa tuang e: Muhzwng ta karamc khou thu laalou mak ge.

²⁵Tiki ai rui nangniw khou latling samei kiu mi hei e: Elija ganv khou tingkwm kathumh bw charuk ting key makna mi kandic kapwm khou tei nap nkow dai nkow khou tei, Isarael khou maypui mpeyna nai kan de,

²⁶tiki Elija ta kaniw daeng khou ndiulou makna, Sidon kandih khou Zaraphath khou bammei maypui khat khou ndiulou kan e.

²⁷Khatni muhzwng Elisha ganv khou Isarael khou mphaanhmei mpeyna nai kan de, tiki kaniw ta tigaylou kan mak ge; Suriamei Naaman ta tigaylou kan e.”

²⁸Mi hei chu la khou, sinagog khou bammei guay tei lungh puamc the.

²⁹Khoutei kaniw thauna kata kaidai paengc thangc nthau patna, kaniw tuang kaidai paengc khow khou phaic key khang nthau pat the.

³⁰Tiki kamei meic pang chung khou tei tat patna tat kan the.

³¹Khoutei kamei Galili tuang Kapharnahum kaidai khou key the, kumna Sabbathneic kamei rui meic nunc khou nchamlou bam khwan e.

³²Kamei rui nchamloumei khou tei kaniw ngak the, kalam thu kalat tei ngamv naimei lat khwan e.

³³Mi sinagog khou tei nthan makmei ravsic bumaengc gutmeipu gaanv khat bam khwan e. Kamei rui kauc ranvna kaucna sa the,

³⁴“He Nazarethmei Jisu, nang aniw lev tabui tuang sw khang naina cho? Aniw ta swmaan khang guang tu cho? Nang thow cho twmei ai thay e—nang hei Ravguangc tuang Nthanmeipu e!”

³⁵Khoutei, “Reih rei bam o! Kakhou rui tat pat tho!” twna Jisu rui kata luh the. Khoutei ravsic tei rui kata tei meic pang la khou tei siauc keylouna, kata sw kabiu kabaeng makna kakhou rui tat pat kan the.

³⁶Meic guay tei ngakna, “Mi lat hei tabui tina cho? Kalam thu ngamv khatni pumtan naina nthan makmei bumaengc guay ruc khou latdanv pat tina kaniw tat pat kan the!” twna kaniw khat khat khou sa the.

³⁷Kumna kachamv tei Kapharnahum gaengv zaengv khou tei chu lik sik kan the.

³⁸Jisu sinagog khou tei rui tat patna Simon kai khou gut the. Khoutei Simon now pui ravmanc ranv sihna bam khwan e. Kumna kata tigaylou khang kaniw rui Jisu khou sa the.

³⁹Jisu kadaeng khou guang dingna ravman ta tei luh the; khoutei mi ravman tei kakhou rui tat kan the. Kumna kadyng khou kamei thauna kaniw siamruai sw the.

⁴⁰Neih key kan pwkhou, meic nunc rui ravpuat kazaat baih baihmei nnaumei guay ta Jisu daeng khou phungc guang the. Khoutei kaniw kathuic khou kabaanc bouclouna kaniw ta tigaylou the.

⁴¹“Nang hei Ravguangc Nac Mpouh e!” twna kaucna meic mpeyna khou rui ravsic nunc ni tat pat khwan e. Kum tina kaniw ta luh the khatni lat sa khang nuhlou mak ge. Kalam thu kamei Khrista e twmei ravsic nunc tei thay e.

⁴²Tinggaanc pat pwkhou, Jisu mi kaidai tei mpatlouna meic khwan meic ring chu makpui bamv thangc tat kan the. Khoutei meic nunc tei kata phu the, kumna kaniw kata ariw pwkhou, kamei kaniw khou rui tat pat dat mak khang kham the.

⁴³Tiki, “Ravguangc guangcdic tuang gaychamv hei ai kaidai baih baihmei khou ni dinc tat mak nuh mak ge, kalam thu Ravguangc rui ata ndiu guangmei hei mi khang hei rui e,” twna sa the.

⁴⁴Kumna kamei Judia tuang sinagog guay khou mi gaychamv hei dinc tat the.