Read Rongmei Naga LUK 5 Bible Online

LUK 5 - Rongmei Naga bible

LUK 5

¹Zaeng neih khat meic kangdai Ravguangc lat nking khang Jisu daeng khou huamc bam khwan e. Khoutei kamei Gennesaret zeiclat paengc khou ding bam khwan e.

²Mi khou tei, chiakc khiu bammei achuanh nei tuang hic kanei dui tin khou lou bammei ta kamei how the.

³Khoutei hih akhat khou, mi kiu Simon tuang hic khou, gut lana dui tin khou rui chau gut maih khang kakhou sa the. Kumna kamei hih khou tei dungckey lana meic kangdai khou tei nchamlou the.

⁴Kamei sa tang pwkhou, “Dui nthukmei thangc gut ro, kumna nangniw chiak guay tei mpat key o,” twna Jisu rui Simon khou sa the.

⁵“Kaipouc, aniw zingbangc karamc thangc the, tiki khat na sini nym tow mak ge. Tiki nang rui samei thei layna ai mpat key ni the,” twna Simon rui daw the.

⁶Kumna kaniw mpat key ti khou khav pang kangdai akhat gauc bin the, kumna kaniw tuang chiak kaek ni kumc the.

⁷Khoutei hih baihmei khou bammei kaniw pammei nunc ta tei guang nkhavlou khang baanh zaapna kaw the. Khoutei kaniw guangna hih kanei tei lou padikna, mi kanei tei limc ni kumc the.

⁸Hei tei how lana, Simon Pitar tei Jisu phay daeng khou nkhum keyna, “Poubauhmei, akhou rui tat patlou kan o; ai thu paapcmei de!” twna sa the.

⁹Simon khatni kapammei nunc tei kaniw khav heizu nymmei khou tei ngak the.

¹⁰Simon pammei Zebedi nac Jakob lev Jahon ni mi kumc muay the. Khoutei Jisu rui Simon khou sa the, “Ping riu; ntaw rui thauna nang maansei nymmei achuanc sw puni the.”

¹¹Kumna kaniw tuang hic nei tei dui paengc khou zay patlouna, ramh guayna ganclouna kaniw Jisu thei lay tat the.

¹²Jisu kaidai akhat khou, bam khou mphaanh tabut thuth thutmeipu gaanv khat Jisu ta how lana kahu khou pun nkhum laamv keyna, “Kaipouc, nang rui chwnmei e thei, nang thu ata sw nthanlou[3] ngam de cho!” twna huaycha the.

¹³Khoutei Jisu kabaanc haamv patna kata kahina, “Ai chwn the, nang nthan tho!” twna sa the. Mi dyng khou tei mphaanhmei ravpuat tei kakhou rui tat kan the.

¹⁴Meic gaanv khat na khou sini hei tei raclou mak khang Jisu rui kata kakimlou the. Kumna, “Nang amuh daeng thangc tat tho; nang nthan the twmei meic nunc thay khang Mousi tuang latdanv thei layna, pumh nthanmei tuang puatkat kat tho,” twna kakhou salou the.

¹⁵Tiki Jisu lam khou tei dinc lik hay hay tat kan the, kum tina kalat nking khang khatni kaniw tuang su nu tigaylou khang meic kangdai kadaeng khou guang the.

¹⁶Tiki kamei meic pang khou tei rui tazikramv thangc tat patna huayney raph rap bam khwan e.

¹⁷Zaeng neih khat mi kumna pat khwan e. Jisu nchamlouna bam khou, Galili khatni Judia tuang namv guay khou rui khatni Jerusalem khou rui guangmei Pharisimei nunc khatni Riakdanv dinhpouc nunc mi khou tei dungc bam khwan e. Kumna nnaumei ta tigaylou khang Poubauhmei tuang pumtan kakhou nai khwan e.

¹⁸Khoutei meic nunc rui kapaektheihmei gaanv khat ta kazy khou louna puanc guangna, kainung gutna Jisu hu khou lou khang karamc khwan e.

¹⁹Tiki meic geih langv tina gut nuhmei thiak maek la thena, kainam kuna mi pu ta tei kainam khou rui kazy mpamc meic la khou tei Jisu hu khou mpat key the.

²⁰Kaniw ramlum tei how lana, “Nggaanvbungc, nang paap guay kuaklou the,” twna Jisu rui sa the.

²¹Khoutei, “Ravguangc ta sw chapavna sa bammei kamei hei thow cho? Ravguangc na hamhna thow rui paapc kuaklou ngamna cho?” twna Pharisimei nunc khatni Riakdanv dinhpouc nunc kaniw lungning khou kakhanh thau the.

²²Kaniw mi kumcna kakhanh bammei ti hei thay lana, Jisu rui kaniw khou sa the, “Nangniw tabui tuang kakhanh bam tu cho?

²³‘Nang paap guay kuaklou the,’ twna samei chiw ni, ‘Thauna tat tho,’ twna samei chiw cho?

²⁴Tiki Meic Nac Mpouh hei paapc kuaklou khang kandih khou kangamv nai e twmei nangniw thay khang...(Kamei rui kapaektheihmeipu khou tei sa the) Ai rui nang khou sa e: Thauna nang zy laa thauna nang kai thangc tat tho.”

²⁵Mi dyng khou tei kamei kaniw hu khou ding thauna, kazy laa thauna Ravguangc ta thuancna kakai tat kan the.

²⁶Khoutei meic guayna ngak the, kumna Ravguangc ta thuancku the. Kaniw pingmei rui padikna, “Aseic aniu charynmei taanv how the,” twna sa the.

²⁷Mi tangv tei Jisu tat pat dat pwkhou, kazanc Levi twna kawmei dihkhav kakhameipu, dihkhav phuhpui kai khou dungc bammei ta how lana, “Athei lay o,” twna Jisu rui kakhou sa the.

²⁸Khoutei kamei thauna ramh guayna ganclouna Jisu thei lay tat the.

²⁹Khoutei Levi rui kakai khou, Jisu ta napkawmei mung daihmei akhat raengclou the. Mi khou tei dihkhav kakhamei nunc meic mpeyna khatni meic baih baihmei mpeyna kamei lev dungc nchamc bam geic khwan e.

³⁰Khoutei Pharisimei nunc khatni kaniw tuang Riakdanv dinhpouc nunc rui nuancna, “Nangniw tabui swna dihkhav kakhamei nunc khatni paapcmei nunc lev tu nchamc zangv nchamc bam tu cho?” twna kaziap nunc khou sa the.

³¹Khoutei Jisu rui mundawna sa the, “Pumh gaymei nunc khang ravtow amuc kage maek ge; nnaumei nunc khang de.

³²Ai guangmei thu ravchaptatmei nunc ta kaw khang hamh e, tiki paapcmei nunc ta lungh laih khang kaw khang de.”

³³Khoutei kaniw rui Jisu khou, “Jahon ziap nunc thu katupcna munthiangcna huayney bam e. Hei tei kumcna Pharisimei ziap nunc ni sw bam muay e, tiki nang ziap nunc thu tuna zangvna bam e cho?” twna sa the.

³⁴Khoutei Jisu rui kaniw khou sa the, “Nowpouc kamei bam khou nowpouc pammei nunc ta tei timunthiangc bam nuh dina cho?

³⁵Tiki nowpouc ta tei kaniw khou rui laa tat kanmei ganv guang puni. Mi ganv khou kiu kaniw munthiangc puni.”

³⁶Jisu rui kaniw khou mi latgiam hei sa the: “Meic gaanv khat na sini phey thanh khou rui kakiak siat patna, phey raan khou khuamlou mak ge. Mi kumcna sw e thei, kamei rui phey thanh tei siat kaeklou puni, khatni phey thanh kiak tei ni karaan tei lev nchamc ni tu hamh e.

³⁷Gaanv khat na sini ramhgic muanc raan khou drakha zouc thanh lou mak ge. Lou ti thei, drakha zouc thanh tei rui muanh tei swbak puni, kumna drakha zouc ni muanh tei ni maan puni.

³⁸Drakha zouc thanh thu muanh thanh khou lou nina de.

³⁹Meic gaanv khat na sini drakha zouc kaguangc zangvlou kan e thei, kathanc thu zangv dat nii mak khe, kalam thu ‘Kaguangc rui zangv gay de’ twna kamei sa puni the.”