Read Rongmei Naga LUK 7 Bible Online

LUK 7 - Rongmei Naga bible

LUK 7

¹Jisu kamei rui meic nunc khou salou niimei lat guay salou tang lana, Kapharnahum khou gut the.

²Mi khou tei Rommei ricpy gaanv khat bam khwan e, kumna mi pu tei kamei rui nzianmei bangc gaanv khat theic ni kumcna nnau bam khwan e.

³Kamei Jisu lam khou chu lana, kamei guangna kabangcpu ta kiu tigaylou khang kaw khang, Jihudimei gaanvthaih nunc ta ndiulou khwan e.

⁴Kumna kaniw Jisu daeng khou guangna huaycha ranv sihna sa the, “Mi pu khang hei, mi hei swlou biuc rapmei tuang de.

⁵Kamei hei aniu zaat ta nzianmeipu e, kumna aniu khang sinagog kai swloumeipu e.”

⁶Khoutei Jisu kaniw lev tat the. Jisu kai daeng ana guang pwkhou, rihpypu tei rui kapammei nunc ta ndiulouna sa the, “Kaipouc, nang akhang ryanra bam nangh khe, kalam thu ai kumhmei thu nang ta akai bangc khou kaw guang bam khang biuh mak ge.

⁷Kumna ai ni nang daeng khou guang khang biuh mak ge. Tiki nang tuang latkaeng sa patlouna abangc ti hei tigaylou di tho.

⁸Ai hei ni ngamv naimei bangc khou bammei mei e, kumna abangc khou ni rihmei nunc nai muay e. Ai rui mi pu ti hei ‘tat ro’ tw ti thei kamei tat the, baihmei gaanv khat ta ni ‘guang o’ tw ti thei ni kamei guang the. Ai rui abangc ta, ‘Mi hei taanc o,’ tw ti thei kamei taanc the.”

⁹Hei tei chu pwkhou Jisu kata ngak the, kumna karih patna kathei laymei nunc khou sa the, “Ai nangniw khou sa tuang e: Mi kumcna lwmmei hei Isaraelmei pang khou nganvna ai ariw mak he,”

¹⁰Khoutei ndiuloumei nunc tei kai khou guang dat pwkhou, mi bangcpu tei gay dat bammei ta ariw the.

¹¹Mi tangv asaanh makna[5] mi kumcna pat khwan e. Jisu kaziap nunc khatni meic kangdai kathei huamc buih buina Nain kawmei kaidai thangc tat khwan e.

¹²Kamei mi kaidai raengcmun ana guang khou, theihmei gaanv khat ta puanc pat khwan e. Mi pu kiu maypui nac, kapui napuan khou kara namei mpouh khwan e. Meic kangdai mi kaidai khou tei rui kapui tei lev lay pat khwan e.

¹³Poubauhmei mi pui ta tei how pwkhou nzian the. Kumna, “Kap riu,” twna sa the.

¹⁴Khoutei Jisu guangna, theih puanhpaeng tei kahi the, kumna theih puanhmei nunc tei ding the. Khoutei, “Nggaanvbungcle, ai rui nang khou sa e: Thau tho,” twna Jisu rui sa the.

¹⁵Khoutei theihmeipu tei thau dungcna lat sa thau the. Kumna Jisu rui kata kapui khou nsinlou kan the.

¹⁶Khoutei meic guayna ping the, kumna, “Aniu pang khou muhzwng daihmei guang the! Ravguangc kamei nunc ta nkhavlou khang guang the!” twna sana Ravguangc ta thuanc the.

¹⁷Mi Jisu chamv hei Judia kapwm khou zin lik kan the.

¹⁸Kumna mi guay hei Jahon khou kaziap nunc rui poulou the. Khoutei Jahon rui kaziap gaanv nei ta kaw lana, “Guang nimeipu kiu nang the ni, hamh e thei, mi kiu baihmei di he cho?” twmei Poubauhmei khou thanv o twna ndiulou the.

¹⁹

²⁰Kaney Jisu daeng khou guangna, “‘Guang nimeipu kiu nang the ni, hamh e thei, mi kiu baihmei di he cho?’ twmei nang khou thanv o twna duiluploumei Jahon rui aney ta ndiulou pwna guang tuang e,” twna sa the.

²¹Mi ganv kahak khou tei Jisu rui ravpuat naimei, suc numei khatni ravsic gutmei mpeyna ta tigaylou bam khwan e, khatni mik tiatmei mpeyna ta tihowlou bam khwan e.

²²Khoutei Jisu rui kaney khou mundawna sa the, “Nangney tatna, nangney rui how kanmei khatni chu kanmei guay tei, twmei thu: mik tiatmei nunc ta tihow dat bammei, kaphay baumei nunc ta titat dat bammei, mphaanhmei nunc ta sw nthanlou[6] dat bammei, nu ndymei nunc chu dat bammei, theihmei nunc ta tiringcthaulou dat bammei khatni lungcsimei nunc khou gaychamv dinclou bammei; mi guay hei Jahon khou raclou ti tho.

²³Ata lwmsi makmei nunc tei sangaymei nunc e.”

²⁴Jahon rui ndiu guangmeipu nei tei tat dat kan pwkhou, Jisu rui meic kangdai khou tei Jahon lam khou sa the, “Nangniw tabui ta zauh khang tazikramv khou tei pat tu cho? Mpwan khou kahai bammei ntou bang nunc ta tei cho?

²⁵Kiuc hamh e thei, nangniw tabui ta zauh khang pat tu cho? Pheynuaih piumei nunc ta cho? Mi kumhmei kakhe kare swna kamanv kunghmei pheynuaih piumei nunc tei thu guanghkai khou bam tuang de.

²⁶Kum e thei, nangniw tabui ta zauh khang pat tu cho? Muhzwng ta cho? Ngguay, kiuc e, ai rui nangniw khou sa tuang e: Kamei muhzwng suangc daihmei e.

²⁷‘Nang khang chaeng sw khang ai rui atuang latdiumei ta nang hu khou ndiulou puni,’ twna saloumei kiu mi pu ti hei the.

²⁸Ai rui nangniw khou sa tuang e: Ntumei rui puanhmei pang khou Jahon suangc daihmei maek khe; tiki Ravguangc guangcdic khou nthyam liangpui mei tei kakhang suangc daic e.”

²⁹(Kalat tei chumei guay, dihkhav kakhamei nunc nganvna Jahon khou rui duilupna, Ravguangc hei nchumhmeipu e twmei laalou the.

³⁰Tiki Pharisimei nunc khatni Riakdanv dinhpouc nunc thu kamei rui duilupmei khou tei kazauh makna, Ravguangc rui kaniw ta sw pw tu kahawmei tei kaniw sw mak khe.)

³¹“Ntaw kin khou lungc bammei nunc ti hei tabui lev kida kho cho? Kaniw hei tabui kumc bu cho?

³²Kaniw hei alauc nunc khanghbamv khou dungcna, ‘Aniw nangniw khang alim muanlou ti ni, nangniw alaamh mak ge; aniw theihlu suanlou ti ni, nangniw kap mak ge,’ twna khat khat khou kauc bammei tei lev nchamc the.

³³Kalam thu Duiluploumei Jahon rui ntyan tu mak, drakha zouc ni zangv mak twna guang tina, ‘Kamei ravsic gut lana the,’ twna nangniw sa e.

³⁴Meic Nac Mpouh hei tu ni tu zangv ni zangv twna guang tina, ‘Zauclo, kamwang agaamvmei, zouh mbamei, dihkhav kakhamei nunc khatni paapcmei nunc ta kapam swpui mei,’ twna nangniw sa e.

³⁵Tiki Ravguangc tuang Ningting hei nchumh e twmei thu hei tei piumei nunc tei rui thay e.”

³⁶Pharisimei gaanv khatpu rui kakai khou nap tu khang kaw tina Jisu mi pu kai khou kiu guang dungc bam khwan e.

³⁷Kumna mi kaidai khou tei paapc khou lungc bammeipui gaanv khat nai khwan e. Pharisimeipu kai khou tei Jisu nap tu khang guang bam e twmei mi pui tei chu lana, mwndui thauc alabastar haan akhat sinna guang khwan e.

³⁸Khoutei kamei Jisu thei khou kaphaypav daeng khou dingna kapna, kaphay tei kamikdui rui zow timclou the. Khoutei kamei Jisu phay khou keyloumei kamikdui tei kasam rui thut phuina, kaphay tei kaputna, kaphay khou tei mwndui thauc tei bun patna teylou the.

³⁹Khoutei kata nap kawmei Pharisimeipu tei, hei tei how pwkhou, “Mi pu hei muhzwng e thei, kata kahi bammei pui hei thow cho khatni tukumhmei pui cho—twmei thu kamei paapc khou lungc bammei pui e twmei kamei thay ni tuang e,” twna kalung khou kakhanh bam khwan e.

⁴⁰Khoutei mundawna, “Simon, ai nang khou ramhkhat salou khang nai e,” twna Jisu rui sa the. Khoutei, “Dinhpouc, salou o,” twna kamei rui daw the.

⁴¹“Meic gaanv nei syan alimei gaanv khat pu tuang syan pow phungc khwan e. Gaanv khat rui denari[7] phay panguh, baihmei gaanv khat rui riakngu pow phungc khwan e.

⁴²Kaney tei khangc dat ngam mak ti thena, kaney pow tei kuaklou the. Mi nei khou tei thow tei rui kata nzian mbu puni cho?”

⁴³“Kapow geihmeipu tei khuangh the twna ning e,” twna Simon rui daw ti khou, “Nang tuang latzan nchumh the,” twna Jisu rui kakhou sa the.

⁴⁴Khoutei Jisu mi pui biak tei karih patna, Simon khou sa the, “Nang mi pui ti hei how bu cho? Ai nang kai khou guang e, aphay khiu khang nang dui tii mak ge; tiki kamei thu, kamikdui rui aphay khiulou the, kasam rui thut phuilou the.

⁴⁵Nang thu ata kaputlou mak ge, tiki mi pui hei thu, ai mi khou hei gut rap khou rui aphay kaputmei taek mak ge.

⁴⁶Nang thu apy khou thauh teylou mak ge, tiki kamei thu aphay khou mwndui thauc teylou the.

⁴⁷Hei zaeng rui, ai rui nang khou sa tuang e: Kapaap guay tei kuaklou kan the. Kum tina kamei nzian diangc bam tuang e. Tiki kakhuay katitna kuakloupui mei tei rui thu karam zian katitna lyan e.”

⁴⁸Khoutei Jisu rui mi pui khou tei sa the, “Nang paap guay kuaklou the.”

⁴⁹Khoutei, “Paapc nganvna kuakloumeipu kamei hei thow cho?” twna mi khou tei dungc nchamc bammei nunc tei kaniw pang khou sa thau the.

⁵⁰“Nang ramlum rui nang ta kanlou the; chuzaenghna tat tho,” twna Jisu rui mi pui khou tei kadylou kan the.