Read Rongmei Naga LUK 8 Bible Online

LUK 8 - Rongmei Naga bible

LUK 8

¹Mi tangv hei Jisu kaidai guay khatni namv guay khou tatlouna, Ravguangc guangcdic tuang gaychamv dinc ndauhlou khwan e. Mi khou tei kaziap ruhna kanei khatni ravsic gutmei khatni su numei khou rui tigayloumei ntumei nunc kathei lay tat khwan e. Mi nunc kiu thu: Kakhou rui ravsic chanei nthau ganclou kanmei Magadaleni Meri twna kawmei pui;

³Herod kai khou tamthiwmei Khuza now Joanna; Susanna; khatni baih baihmei mpeyna hei e. Mi pui nunc hei kaniw tuang syan lanv phungc patna Jisu khatni kaziap nunc siamruai sw bammei nunc e.

⁴Kaidai kaidai khou rui meic nunc guangna kadaeng khou meic kangdai guang kachunc bam khou, latgiam swna Jisu rui sa the:

⁵“Lautaanhmeipu gaanv khat napphwn nrou khang pat the. Kamei rui nrou patmei tei asaekc chaengluang khou keylou the; kumna hei tei ni bin the khatni nruayna rui tu kan the.

⁶Asaekc rui ntauh ruc khou keylou the, hei tei thau pat pwkhou theic key kan the; kalam thu kaniw khang dui maek khe.

⁷Baihmei asaekc rui sauh ding khou keylou the, kumna sauh bang thau pat kariuna mi ta tei zynluai kan the.

⁸Baihmei asaekc rui kandih gaymei khou keylou the, kumna hei tei thau pat lana nroulou kanmei suangc phay khat mbuna nthai the.” Mi hei sana, “Chu khang nukuanc naimei kathuic chu la tho!” twna kamei rui kauc the.

⁹Mi latgiam kabac hei tabui cho twna kaziap nunc rui kakhou thanv the.

¹⁰Khoutei Jisu rui daw the, “Meic thay makmei Ravguangc guangcdic tuang tei nangniw khou dinclou the, tiki meic baihmei khang thu, ‘kaniw how bam sini how mak khang khatni chu bam sini kabah thay mak khang’ latgiam swna sa tuang e.

¹¹“Mi latgiam kabac kiu thu mi hei e: Napphwn kiu thu Ravguangc lat tei e.

¹²Chaengluang khou keyloumei nunc kiu thu, lat tei chulou pwkhou, kaniw lwmlouna, kanloumei laa kan mak khang, ravsic rui guangna lat tei kaniw lung khou rui laa ganc kanmei nunc tei e.

¹³Ntauh ruc khou keyloumei nunc kiu thu, kaniw lat tei chu pwkhou neihlana laalou the, tiki kamaan maek tipui zaeng rui kaganv asaekc lwmlou the, tiki nchanvmei guang pwkhou bow kanmei nunc tei e.

¹⁴Sauh ding khou keyloumei kiu thu, lat tei chu the tiki, kandih panty lwnlung khang kapaamvmei, syan lanv khatni nungngai amanvmei rui zynna kathai nthai ngam makmei nunc tei e.

¹⁵Kandih gaymei khou keyloumei kiu thu, kalip kalei maekmei khatni gaymei lungning khou lat tei chulou lana, hei tei sin ntipna khaengv thayna kathai nthaimei nunc tei e.

¹⁶“Meic gaanv khat na sini thauhmai daanc lana ramh rui gumbinlou mak ge, laeng bangc khou ni lou mak ge; tiki kainung khou tat gutmei guay rui how diu khang kahyang khou dungclou e.

¹⁷Ntheihlou bammei guay tei ndauh pat puni the, khatni gumbinlou bammei guay tei laanc pat puni the.

¹⁸“Hei zaeng rui, nangniw nking chuy la tho. Naipui mei khang tei tiilou haap puni; tiki maekpui mei khang tei thu, kakhou nai e twna kamei kakhanh bammei tei na sini kakhou rui laa tat dat kan puni.”

¹⁹Neih khat Jisu pui khatni kakainac nunc kata ariw khang guang khwan e. Tiki meic geic langv tina kadaeng khou guang tangc ngam mak khwan e.

²⁰Khoutei, “Nang pui khatni nang kainac nunc nang ta ariw niina kaizaeng khou ding bam e,” twna kakhou salou the.

²¹Khoutei Jisu rui sa the, “Apui khatni achana nunc kiu thu Ravguangc lat chu lana piu bammei nunc tei the.”

²²Neih khat mi kumcna pat khwan e. Jisu kaziap nunc lev hih tuangcna, “Zeihlat paengc akhat thangc kaan pat kho,” twna tat khwan e.

²³Kaniw mi kumcna tat bam khou, kamei zipri kan the. Khoutei ting puanzingh guang the. Kaniw tuang hic tei dui chungc padik thau the. Kumna nkhan ni kumc the.

²⁴Khoutei kaniw Jisu daeng khou guangna, “Kaipouc, kaipouc, aniu theic puni the!” twna sana nchyang thau the. Khoutei Jisu thauna puanzingh khatni dui luat ta tei khaam the. Kumna puanzingh tei nchwng kan the, rimh rim the.

²⁵Khoutei, “Nangniw ramlum kiu tabui tei tha?” twna Jisu rui kaniw khou sa the. Khoutei kaniw ping the khatni ngak the. Kumna, “Mpwan khatni dui rui nganvna katuang latdanv piu pwmei pu hei tu kumhpui mei lana cho?” twna kaniw khat khat khou sa the.

²⁶Mi tangv kaniw hih tuangcna, Galili khou rui dui paengc akhat thangc naimei Geraseni[8] ramv khou pat khwan e.

²⁷Jisu hih khou rui dui paengc tat pat rap khou, mi kaidaimei, ravsic gutmeipu gaanv khat kata ariw the. Mi pu tei kaganv tingsaengcna pheybaan piu makna khatni kai khou lungh makna, theihmei ta mbeihloumei khowlang khou kabamv swna bammeipu khwan e.

²⁸Kamei Jisu ta how pwkhou, kauc rah ndyna kahu khou pun nkhum laamv keyna, kauc ranvna, “Kauh Liangmei Racguangc Nac Mpouh Jisu, nang lev anei tabui sw khang naina cho? Nang khou zaenghuaypui tuang e: Ata dandi tiilou rio,” twna sa the.

²⁹Kalam thu Jisu rui simei bumaengc ta tei mi pu khou tei rui tat pat tho twna sa the. Tabui cho tiki, katupc sihna hei tei rui kata sinsw the, kumna kata pareiriang khatni kang rui bangclouna gaek bam tisini, mi guay tei dingchaek mak khe. Kumna ravsic tei rui kata tazikramv thangc zay tat raph rap the.

³⁰Khoutei Jisu rui, “Nang zanc thow cho?” twna thanv ti khou, “Legion” twna kamei rui daw the. Kalam thu ravsic mpeyna kakhou gut bam khwan e.

³¹Khoutei kaniw ta kanganv maekmei khunc[9] khou ndiulou mak khang Jisu khou huaycha the.

³²Mi khou tei chyng naek khou guak kangdai akhat kataek mpac bam khwan e. Kumna kaniw ta guak nunc khou tei ndiulou khang ravsic nunc tei rui Jisu khou huaycha tina kamei rui hei tei nuhlou the.

³³Ravsic nunc tei mi pu khou tei rui patna, guak nunc khou tei gut the. Khoutei guak nunc tei khow khum khou tei saeng keyna zeih khou tei alip luai ngam kan the.

³⁴Hei tei how la khou, guak sianmei nunc tei pak tatna, kaidai khou tei khatni namv guay khou tei poulou the.

³⁵Kumna hei tei zauh khang meic nunc guang geic the. Kaniw Jisu daeng khou guang pwkhou, ravsic nunc tat pat kanmeipu tei pheybaan piuna meic paek pat nthan thiakna, Jisu daeng khou dungc bammei ta how pwkhou, kaniw ping the.

³⁶Ravsic nunc gutmeipu ta tei tigaylou kanmei ta howmei guay rui hei tei akumhna tigaylou kan tu cho twmei meic nunc khou tei raclou the.

³⁷Khoutei Geraseni ramv khou bammei guay tei ping langv lana, Jisu ta mi khou tei bam mak khang sa the. Kumna kamei hih tuangcna tat dat kan the.

³⁸Kakhou rui ravsic nunc tat pat kanmeipu tei rui kathei lay tat khang Jisu khou zaenghuay the, tiki Jisu rui kata kakai thangc ndiulou datna sa the,

³⁹“Nang kai thangc tat dat tho, kumna Ravguangc rui nang khang adih daicna taanclou cho twmei raclou ti tho?” Kumna mi pu tei tat lana, Jisu rui kakhang adih daicna taanclou cho twmei mi kaidai kapwm khou tei raclou the.

⁴⁰Ntaw Jisu hanc guang dat pwkhou, kata nkhwan bammei meic kangdai rui kata riu the.

⁴¹Khoutei kazanc Jairas twna kawmeipu, sinagog tuang kapypu gaanv khat guangna Jisu hu khou pun nkhum laamv keyna, kakai khou guang khang zaenghuay the.

⁴²Kalam thu kanac aluh akhat namei, tingkwm ruhna kanei doumeipui nnauna theic ni kumcna bam khwan e. Kumna Jisu tat patmei chaeng lwan khou, meic kangdai kata hic luai ni kumcna tat bam khwan e.

⁴³Tingkwm ruhna kanei zeina, meic gaanv khat na rui sini swgaylou ngam makna[10] bammei pui Jisu phey tin kahi the. Khoutei kakhou zei key bammei tei, kadyng khou nthaekc kan the.

⁴⁴

⁴⁵Khoutei, “Ata kahimei tei thow cho?” twna Jisu rui sa the. “Ai the” twmei meic gaanv khat na sini maek ti khou, Pitar rui, “Kaipouc, meic kangdai rui nang ta hicna tat bam di the cho?” twna sa the.

⁴⁶Khoutei, “Meic gaanv khat ata kahi the; akhou rui pumtan pat kanmei ta ai thay the,” twna Jisu rui sa the.

⁴⁷Khoutei kamei nkamh ngam ni tu hamh the twmei thay lana, kadunhna guangna, Jisu hu khou khuksun key the. Kumna tabui zaeng rui kata kahi tu cho khatni akumhna kadyng khou kata tigaylou tu cho twmei mathiuc hu khou kamei rui sa the.

⁴⁸Khoutei, “Alule, nang lwmmei paan rui nang ta tigaylou the. Chuzaenghna tat tho,” twna Jisu rui kakhou kadylou the.

⁴⁹Jisu rui mi kumna sa bam khou, sinagog tuang kapypu Jairas kai thangc tei rui meic gaanv khat guangna, “Nang nac aluhpui tei theic the; dinhpouc ta sw ryanra bam dat nangh khe,” twna Jairas khou sa the.

⁵⁰Hei tei chu lana, Jisu rui Jairas khou, “Lungh geih riu, lwm o, kata tigaylou dat puni de.” twna sa the.

⁵¹Kumna Jairas kai tei guang tangc pwkhou, Pitar, Jahon, Jakob khatni angana pui pu ta na hamhna meic baihmei ta kathei kainung tigut mak ge.

⁵²Mi ganv khou tei, meic guayna tei kapna huayna bam khwan e. Khoutei, “Kap taan tho; kamei theih mak ge, zip bam tu de,” twna Jisu rui sa the.

⁵³Kamei theic the twmei thay lana, kaniw Jisu ta nuic the.

⁵⁴Tiki kamei rui kabaanc zayna, “Alule, thau tho!” twna kaucna sa the.

⁵⁵Khoutei kabumaengc hanc guang dat the, kumna kamei kadyng khou dingthau the. Khoutei, “Ramh tu khang tii ti tho,” twna Jisu rui sa the.

⁵⁶Mi khou tei kapui kapu tei ngak the. Hei tei meic gaanv khat na khou sini salou nuh mak ge twna kaniw khou kadylou the.