Read Rongmei Naga LUK 9 Bible Online

LUK 9 - Rongmei Naga bible

LUK 9

¹Jisu rui gaanv ruhna kanei ta tei kaw guang kaduaina ravsic nthau ganh khang khatni ravpuat guay tigaylou khang pumtan khatni ngamv tiilou the.

²Kumna Ravguangc guangcdic dinc ndauh khang khatni su numei ta tigaylou khang kaniw ta ndiu pat the.

³Kumna kamei rui kaniw khou sa the: “Chaeng khou sinsw khang nangniw ramhkhat sini phungc riu—builwang ni, khau ni, ntyan ni, syan ni, thiula saplai ni phungc riu.

⁴Nangniw gutloumei kai khou tei, nangniw mi kaidai khou tei rui tat dat mak saanv bam o.

⁵Tiki nangniw ta laalou makmei nunc ruc khou tei thu, kaniw tuang kaidai khou tei rui tat pat dat ni khou, kaniw ruc khou sakhi khang, nangniw tuang phaypav niang tei kadiw keylou duc tio.”

⁶Kumna kaniw tat patna, namv namv khou tatlouna, tatloupui bamv kathuic khou gaychamv dinclou the khatni su numei nunc ta tigaylou the.

⁷Mi kumna sw bammei guay hei guangh Herod chu lana, kamei ramh sw la khang thay mak khe. Kalam thu, “Jahon ta tiringcthaulou dat tina di the,” twna meic gaanvsaekc rui sa the.

⁸“Elija lungc guang lana di the,” twna gaanvsaekc rui sa the. Baihmei gaanvsaekc rui, “Reynungc muczwng ringcthau dat lana di the,” twna sa the.

⁹Tiki, “Jahon ta thu ai rui kapy dangv kan the. Mi kumna sw bam e twna sabammeipu kiu thow lana cho?” twna Herod rui sa the. Kumna kata ariw khang phu the.

¹⁰Kumna latdiutatmei nunc tei hanc guang datna kaniw rui taanc kanmei guay tei Jisu khou raclou the. Khoutei Jisu rui kaniw ta nduanghna kaphwng kaphaw makna, Bethsaida twna kawmei kaidai thangc tat the.

¹¹Tiki meic kangdai tei hei tei thay lana kathei lay guang the. Khoutei Jisu rui kaniw ta riulouna Ravguangc guangcdic lam raclou the khatni tigaylou khang kage naimei guay ta tigaylou the.

¹²Tiki tingzyn neih key pwkhou, ziap ruhna kanei tei guangna Jisu khou sa the, “Meic kangdai ti hei ndiu ganclou ti tho. Kaniw ana khou naimei namv khatni laumangh namv guay khou bangv bamv khang khatni tu zangv khang kaphianh tat kan di tho. Aniu bampui bamv hei thu tazikramv di the.”

¹³Khoutei, “Kaniw tu khang nangniw tii tio,” twna Jisu rui kaniw khou sa the. Khoutei kaniw rui sa the, “Aniw khou naimei thu ntyan dwm panguh lev khav kanei na de. Aniw tatna liu mak ge thei meic heizumei khang maek ge.”

¹⁴(Kalam thu mi khou tei nggaanvmei meic ching panguh dou bam khwan e.) Tiki, “Meic riakngu dou dou tuang phwam phwam swna tidungc key tho,” twna Jisu rui kaziap nunc khou tei sa the.

¹⁵Ziap nunc tei rui meic guay na ta hei tei kumcna tidungc key the.

¹⁶Khoutei ntyan dwm panguh lev khav kanei tei laana tingkauh thangc zauc kuna suaihiamlou lana by baklou the. Kumna meic heizumei khou tei nzanhlou khang kaziap nunc khou tiilou the.

¹⁷Khoutei meic guay na tu ngguna tu the, kumna tu nsaekcloumei giupaekc ruhna kanei khuam guang the.

¹⁸Zaeng neih khat Jisu karana huayney bam khou, kaziap nunc ni kadaeng khou bam khwan e. Khoutei kamei rui kaziap nunc khou, “Ai hei thow e twna meic nunc rui sa bam bu cho?” twna thanv the.

¹⁹Kaniw rui mundawna, “Duiluploumei Jahon tei e twna sa e; tiki gaanvsaekc rui thu, ‘Elija e,’ baihmei gaanvsaekc rui ‘reydouc muczwng pang khou rui gaanv khat ringcthau dat lana e,’ twna sa bam e,” twna sa the.

²⁰Khoutei Jisu rui, “Nangniw thu ai hei thow e twna laa tu cho?” twna kaniw khou sa the. Khoutei Pitar rui mundawna, “Ravguangc tuang Khrista the,” twna sa the.

²¹Hei tei meic gaanv khat na khou sini salou nuh mak ge twna kaniw khou kakhimlouna sa the,

²²“Meic Nac Mpouh hei ryanra ryanriumei mpeyna ariw puni; gaanvthaih nunc, amuh daihmei nunc khatni Riakdanv dinhpouc nunc rui kata nuh makna ganc pat puni khatni swluai puni. Tiki zaeng neih thumhpui nungc ringcthau dat puni.”

²³Khoutei Jisu rui meic guayna khou tei sa the, “Thow pw ni athei lay nii e thei, karana kata nuh makna, tingmik pum katuang kros phungcna athei lay nina e.

²⁴Thow pw ni karingcpaan kan niina ning e thei, hei tei swmaan puni; tiki thow pw ni akhang rui karingcpaan maanlou e thei, hei tei kanlou puni.

²⁵Thow pw ni, mbaanv kapwm hei kakhang laatow sini, kamei kahak maanlou e thei, hamh e thei kapumc thuanlou e thei, kakhang tabui gaengna cho?

²⁶Thow pw ni, alam khou khatni alat lam khou zakpui mei ta tei, Meic Nac Mpouh hei rui ni, kamei kahym khou, kaPu hym khou khatni nthanmei baanchara nunc hym khou key pwkhou, kamei e twna sa khang zak puni.

²⁷Ai rui nangniw khou kaling samei tuang e, mi khou ding bammei nunc pang khou kaniw theih mak khou, Ravguangc guangcdic how nimei nunc nai e.”

²⁸Mi guay hei saloumei tangv zaeng tachat dou tangv, Pitar, Jahon khatni Jakob ta nduanghna, huayney khang Jisu chyngbut thangc ku the.

²⁹Khoutei kamei huayney bam khou kazawpaanv kalaic pat the khatni katuang pheybaan mphwan ti tah ta pat the.

³⁰Thaymak lyangna meic gaanvnei rui kata pary rac bam khwan e. Kaney tei Mousi lev Elija khwan e, kumna

³¹hymdaicna guangna, Jisu kamei Ravguangc tuang raeng ti-nthuihna Jerusalem khou theiclou nimei lam khou kamei lev kachuc bam khwan e.

³²Khoutei Pitar lev kapammei nunc tei zip nii langvna zip tat the. Kumna kaniw mphaengv pat dat pwkhou, Jisu tuang hymdaihmei khatni kadaeng khou Mousi lev Elija ding bammei ta kaniw how the.

³³Mi nei tei tat dat kan pwkhou, Pitar rui Jisu khou sa the, “Kaipouc, aniu mi khou hei bammei gay the. Kumna aniw nang khang, Mousi khang khatni Elija khang zypui kai kathumh swlou ni the.” Hei tei kamei tabui sa bam tu cho twmei thay makna sa bam tu khwan e.

³⁴Kamei hei tei sa bam khou, muangh guam guangna kaniw ta tuk liam the. Khoutei kaniw ping the.

³⁵Kumna, “Mi hei ai rui kapahloumei Anac Mpouh the, nangniw kalat chu o!” twna muangh khou tei rui kauc pat the.

³⁶Mi khwan tei sa pat pwkhou, Jisu karana bam dat khwan the. Ziap nunc tei kaniw rui how kanmei tei gaanv khat na khou sini, mi douc tei sa pat makna bam khwan e.

³⁷Nthuanh thauna, kaniw chyngbut thangc tei rui key dat pwkhou, meic kangdai rui kata ariw the.

³⁸Khoutei meic kangdai khou tei rui gaanv khat rui kaucna sa the, “Dinhpouc, anac ta zauclou o; kamei hei kalu akhat namei nac mpouh e.

³⁹Bumaengh akhat rui kata sinswna, kadyng khou kamei kauc thauna kandih khou kasaanv keylouna savbwam patna bam raph rap the. Kumna sw kasic karouclouna ganclou raph rap the.

⁴⁰Mi ti hei nthau ganclou khang nang ziap nunc khou zaenghuay the, tiki kaniw ngam mak khe.”

⁴¹Khoutei mundawna, “Lwm makmei khatni chaeng maanvmei nunc, ai nangniw lev asaanh khaengv bam ho twna cho? Nang nac ta kiu mi khou hei laaguang o,” twna Jisu rui sa the.

⁴²Mi nac tei Jisu daeng nzwan guangmei dyng khou tei ravsic tei rui kata titheilanc keyna kandih khou saanv keylou the. Khoutei Jisu rui nthan makmei bumaengc ta tei mphut the, kumna mi nac ta tei tigaylouna kapu khou nsinlou dat the.

⁴³Khoutei meic guay tei Ravguangc tuang ngamv daihmei ta tei ngak the. Mi kumcna kamei rui swloumei guay khou tei meic guayna ngak sakh sakna bam khou, Jisu rui kaziap nunc khou sa the,

⁴⁴“mi hei nangniw nukuanc khou chu gutlou la tho: Mi kiu thu, Meic Nac Mpouh ti hei meic nunc baanc khou tii patlou puni the.”

⁴⁵Mi lat kabac hei kaniw thay mak khe, kalam thu kaniw kabah thay mak khang, hei tei gumbinlou kan the. Mi kabac tei kaniw thanv khang ni ping the.

⁴⁶Kaniw pang khou thow tei daic liang puni cho twna kaziap nunc tei kaphianh thau the.

⁴⁷Kaniw khou mi kumhmei lungning nai bammei tei thay lana, Jisu rui alauc gaanv khat ta kaw guangna kadaeng khou tidinglouna,

⁴⁸kaniw khou sa the, “Thow pw ni, mi nac ti hei laaloupui mei tei ata laalou tu e, khatni ata laaloupui mei tei ata ndiu guangmeipu ta laalou tu e. Kalam thu nangniw pang khou nthyam liangpui mei tei daic liangpui mei e.”

⁴⁹Khoutei Jahon rui sa the, “Kaipouc, meic gaanv khat nang zanc khou ravsic nthau ganc bammei ta howna hei tei sw riu twna aniw rui khaamlou kan e. Kalam thu kamei aniu thei lay kazauhpui mei hamh e.”

⁵⁰Khoutei, “Kata khaam nangh e; kalam thu nangniw ta akhangv makpui mei tei thu nangniw biak lianghpui mei de,” twna Jisu rui kakhou sa the.

⁵¹Kumna kata tingkauh thangc laa thau nipui ganv guang pwkhou, Jerusalem thangc tat khang Jisu dinglou the.

⁵²Kumna Jisu khang bangvbamv chamdaanv khang meic gaanvsaekc ta ndiulou the. Khoutei kaniw Samariamei kaidai akhat khou gut the.

⁵³Tiki kamei Jerusalem thangc key nina tat bam tu de twpui zaeng rui, kaniw rui kata laalou mak khe.

⁵⁴Hei tei how lana, kaziap Jakob lev Jahon rui, “Poubauhmei, tingkauh thangc rui mai tii keyna[11] kaniw ti hei swmaan di kho cho?” twna sa the.

⁵⁵Khoutei karih patna Kaniw ta luh the.[12]

⁵⁶Kumna kaniw namv baih thangc tat dat kan the.

⁵⁷Kaniw tat bammei chaenglwan khou tei, “Nang tat tatpui bamv khou ai nang thei lay ni,” twna gaanv khat rui Jisu khou sa the.

⁵⁸Khoutei, “Asacsi nunc khang kaniw kai nai e, nruayna nunc khang ni kaniw bou nai e, tiki Meic Nac Mpouh khang thu kapy mbaeng keyloupui bamv khang na sini maek ge,” twna Jisu rui kakhou daw the.

⁵⁹Meic baihmei gaanv khat khou, “Nang athei lay o,” twna Jisu rui sa the. Tiki, “Ai apu ta mbeih tat rey ni he,” twna mi pu tei rui daw the.

⁶⁰Khoutei, “Theihmei ta thu theihmei nunc rui mbeih bam kan di tho; nang thu Ravguangc guangcdic chamv dinc tat tho,” twna Jisu rui kakhou sa the.

⁶¹Khoutei baihmei gaanv khat rui, “Poubauhmei, ai nang thei lay ni; tiki ai akai thangc tatna kaikhunhmei nunc khou kadylou ni he,” twna sa the.

⁶²Khoutei, “Guaihphu sinna thei zauc karihpui mei tei thu Ravguangc guangcdic khang biuh mak ge,” twna Jisu rui sa the.