Read Rongmei Naga RIAKDANV KALUAIHMEI 1 Bible Online

RIAKDANV KALUAIHMEI 1 - Rongmei Naga bible

RIAKDANV KALUAIHMEI 1

¹Isaraelmei nunc rui Jordan tuang neihpat biak tazikramv khou bam khou Mousi rui kaniw khou salou duhmei lat guay mi buk khou hei hylou the. Kaniw tei Jordan nzaengc, kabiak akhat thangc Paran kaidai akhat thangc rui Tophel, Laban, Hazerot, khatni Dizahab kaidai naimei kak khou kaniw bammei ganv khou saloumei lat guay the.

²(Sinai Chyng khou rui Kades Barnea hei Edom tuang chyng chaeng zaeng 11 tat re.)

³Isaraelmei nunc khou salou o twna RINGHPOUC rui Mousi kakhou latdanv tiimei guay tei kamei rui kaniw Izip khou rui tat thaumei tangv tingkwm 40 bw 11 tuang reymei tingmik nungc salou the.

⁴Mi hei RINGHPOUC rui Amormei guangc Sihon, Heshbon kaidai sinmeipu, akhatni Bashanmei guangc Og, Ashtarot lev Edrei sinmeipu ta rih ngamloumei tangv the.

⁵Meic nunc tei Jordan tuang neihpat khou Moabmei kandic khou bammei ganv khou Mousi rui Ravguangc tuang latdanv guay khatni latdyn guay tei nthanna dinclou the. Kamei rui sa the,

⁶“Aniu Sinai chyng khou bam khou tei RINGHPOUC aniu Racguangc rui aniu khou kumna sa the, ‘nangniw mi chingcbut khou hei bam saengc sihlou kan the.

⁷Nangniw zypui laina tat thau dat tho. Amormei tuang chyngramv khou khatni mi daeng nkuaymei ramv guay khou twmei thu Jordan nzaengc khou, chyngramv khou khatni nzaengcramv khou, dihba biak thangc, Mediterranean duitin ramv thangc tat tho. Kanaan kandic thangc khatni Lebanon chyngbut guay tat twanna Euphratis duiriang nganv tat tho.

⁸Mi guay hei RINGHPOUC ai rui nangniw pupouc Abraham, Isak, Jakob, khatni kaniw kikta khang tii ni twna nrianhloumei kandic tei the. Mi khou tei tatna lungc tho.’ ”

⁹Mousi rui meic nunc khou tei sa the, “Aniu Sinai Chyng khou bammei douc tei ai rui nangniw khou kumna sa kan the, ‘nangniw ta zaylou nimei thouc hei akhang nrit langv khe, mi hei arana phungc ngam mak khe.

¹⁰RINGHPOUC nangniw Racguangc rui nangniw ta tingpuk khou nai bammei gaanchuangcna zu tigeiclou the.

¹¹RINGHPOUC nangniw pupouc Racguangc rui kalatryan theilayna nangniw ta luan ching ching tigeiclou diu khatni tilungcgaylou diu!

¹²Tiki nangniw khou latlu patmei guay tei katiamh nimei tuang nritmei thouc hei akumhna arana phungc ngam nina cho?

¹³Kaikhwang kathuic khou rui ningting ntakmei, kabah thaymei, thayhow geihmei nunc kadah pat tho, kumna kaniw ta tei nangniw ta zaylou khang lou puni the.’

¹⁴Hei tei gay the twna nangniw nuh kan the.

¹⁵Kumna nangniw khwang pang khou rui kadah guangmei ningting ntakmei khatni thayhow geihmei kapy swmei guay ta tei ai rui laalouna nangniw ta zaylou khang swlou kan the. Meic gaanvsaekc rui meic 1000 ta, gaanvsaekc rui 100 ta, gaanvsaekc rui 50 ta, khatni gaanvsaekc rui ruh ta phungc the. Ai rui baihmei thouc phunghmei nunc ni kaikhwang kaguayna khou tei kadahlou the.

¹⁶“Mi ganv khou tei ai rui kaniw ta kumna nchamlou kan e, ‘nangniw pang khou latlu patmei tei zauc o. Hei tei nangniw pang khou na pat tw ny hamh e thei nangniw pang khou bammei gin nunc kazauh tw ny twmei latlu patmei kathuic tei kaphianh chuyna kaphianh o.

¹⁷Nangniw tuang latzan khou tei guhsw gahsw riu; zawkhu zawru zauh makna meic kathuic ta nchamcna latzan sw o. Meic gaanv khat na ta sini rouh riu, kalam thu nangniw tuang latzan latdyng tei Ravguangc khou rui guang tuang e. Nangniw rui kaphianh khang kungclangvmei tuang latbamv nai e thei, hei tei akhou laaguang o, ai rui kaphianhlou puni.’

¹⁸Baih baihmei lam khou ni nangniw rui taanc nimei guay tei ai rui nangniw khou mi ganv khou tei dinclou kan the.

¹⁹“RINGHPOUC, aniu Racguangc tuang latdanv theilayna aniu taanc the. Aniu Sinai Chyng ganclouna meic pingmei tazikramv tat kaanna Amormei tuang chyngramv chaeng khou tat guang the. Aniu Kades Barnea guang tangc pwkhou,

²⁰‘RINGHPOUC aniu Racguangc rui aniu khang tiiloumei Amormei chyngramv khou guang tangc the’ Ai rui nangniw khou salou the.

²¹Zauclo, RINGHPOUC nangniw Racguangc rui nangniw mav khou ramvdui tiilou bam the nganghna ramv tei nangniw tuang sw tho. RINGHPOUC nangniw pupouc Racguangc rui nangniw khou salou kanmei kumcna ping riu khatni lungh tangkhyn riu.

²²“‘Tabui chaeng tei tat ti thei gay liang ni cho khatni mi khou tei tabui kumhmei kaidai guay nai bw cho twmei thay khang mi kandic tei zauh khang meic thouclou rey di kho’ twna nangniw rui akhou guangna sa the.

²³“Hei tei gay khwang dyng the twna, ai rui kaikhwang khou rui gaanv khat gaanv khat laana gaanv 12 kadah the.

²⁴Kaniw chyngramv thangc tei tatna Eskol nzaengc nganv tat tangcna ramv tei zauc the.

²⁵Hei khou tei kaniw tatriuloumei tingthai asaekc phungc guang the, kumna RINGHPOUC aniu Racguangc rui aniu khang tiiloumei kandic hei ramv gaymei kandic budyng the twna guang sa the.

²⁶“Tiki nangniw rui RINGHPOUC nangniw Racguangc tuang latdanv ta tei liam the, kumna nangniw mi kandic khou tei gut mak khe.

²⁷Nangniw tanglum tanglaina khat khat khou kumna sa the: ‘RINGHPOUC rui aniu ta karaeng the. Amormei nunc rui aniu ta swluai kan khang aniu ta kaniw baanc khou tiilou khang kamei rui aniu ta Izip khou rui nduangh pat tu di the.

²⁸Tabui swna aniu mi thangc tei tat bam nina cho? Aniu ping e. Mi khou lungc bammei nunc tei aniu suangc tanc e khatni saengdai e, kumna kaniw tei kaniw tuang kaidai guay raengc tei tingpuk tungtanghmei khou lungc bam e twna aniu rui thoucloumei nunc rui sa the. Kaniw rui mi bamv khou tei liantuangh nunc how e tw e!’

²⁹“Tiki khou tei ai rui sa the, ‘Mi mei nunc ta tei ping riu.

³⁰Mi tangv tei ai rui nangniw khou sa the, kaniw ta ping riu, Izip kandic tuang tazikramv khou taanclou kanmei tei kumcna nangniw hu khou tat bammei RINGHPOUC rui nangniw khang adowlou puni de.

³¹Mi bamv khou guang tangh mak saanv chaenglwan thuic kapu rui kanac ta phungcloumei kumc RINGHPOUC nangniw Racguangc rui nduanghlou the twmei nangniw how the.’

³²Ai rui kumna sa bam tisini nangniw RINGHPOUC ta lwm mak ge.

³³Kamei rui nangniw hu tat kasuakcna zypui bamv dinc tat bam tisini nangniw lwm mak ge. Nangniw khang chaengzay khang zingbangc maitiangc khatni kalaanv muanghtiangc swna nangniw hu khou tatlou the.

³⁴“Nangniw rui nutna sa bammei tei RINGHPOUC rui chu lana kumna kauc pat the,

³⁵‘Ai rui nangniw khang tii puni twna nangniw pupouc khou nrianhloumei gaymei kandic khou tei mi simei meikin hei nangniw gaanv khat na sini gut lak khe.

³⁶Jephune nac mpouh Kaleb na gut puni. Kamei akhou lwm nuhmei swna bam e, kumna kamei rui zauc kanmei kandic tei kakhang khatni kakikta guay khang tii puni.’

³⁷Nangniw zaeng rui RINGHPOUC rui ata kalungpuamcna sa the, ‘Mousi, nang nganvna mi kandic khou tei gut ni tuang hamh the.

³⁸Tiki nang ta nkhav bammei Nun nac mpouh Joshua ta kalung sw ntip ranvlou tho. Isaraelmei rui mi kandic gut laa nimei tei kamei rui kapy swna gut puni the.’

³⁹“Mi tangv tei RINGHPOUC rui aniu meic guayna khou sa the, ‘ntaw sigay thay makmei — zauczihmei nunc rui nym kan puni twna nangniw rui sa bammei nangniw nac nunc hei rui mi kandic khou tei gut puni. Ai rui kaniw khang mi kandic tei tiilou puni, kumna kaniw rui mi kandic tei laa puni.

⁴⁰Tiki nangniw thu thei hanc datna Ntou duipui chaeng khou tazikramv khou key dat tho.’

⁴¹“Khoutei nangniw rui daw the, ‘Mousile, aniw RINGHPOUC ruc khou paapc taanc the. Tiki RINGHPOUC aniu Racguangc tuang latdanv theilayna ntaw thu aniw adow ni the.’ Khoutei chyngramv khou tei gut khang chiw puni de twna ningna nangniw kathuicna adow khang chamdaanv the.

⁴²“Khoutei RINGHPOUC rui akhou sa the, ‘kaniw ta adow la riu twna sa tio, ai kaniw ta nkhavlou ni tuang hamh e, kumna zauczihmei rui kaniw ta ngam puni de.’

⁴³RINGHPOUC rui samei tei ai rui nangniw khou dinclou the tiki nangniw chulou mak khe. Nangniw alat liamna, nangniw daihriw swna chyngramv khou tei gut the.

⁴⁴Khoutei bammei Amormei nunc rui nkhuaih katang pat kumcna patna nangniw ta Horma nganv nthau tangclou the, kumna Edom tuang chingcramv khou nangniw ta ngamlou the.

⁴⁵Kumna khou tei nkhavlou khang RINGHPOUC khou kauc the, tiki kamei nkinglou mak khe.

⁴⁶“Kumhpui zaeng rui nangniw kaganv tingsaengc sihna Kades khou bamlou the.