Read Rongmei Naga RIAKDANV KALUAIHMEI 10 Bible Online

RIAKDANV KALUAIHMEI 10 - Rongmei Naga bible

RIAKDANV KALUAIHMEI 10

¹“‘Khoutei RINGHPOUC rui akhou kumna sa the, ‘reymei tuang tei kumhmei ntauhpaek kanei kaphangv tho kumna hei tei lou khang thingkhuk ni kasiamh tho. Kumna adaeng khou chyngbut thangc tei ku tho,

²nang rui swbak kanmei ntauhpaek nei khou hylou kanmei tei mi khou tei hylou dat puni the, kumna hei tei nang thingkhuk khou tei lou nina the.’

³“Ai rui akasia thing rui thingkhuk akhat kasiamh the khatni reymei tei kumhmei ntauhpaek kanei kaphangv lana hei tei chyngbut thangc tei abaanc rui puanc ku the.

⁴Nangniw chyng khou guang kaduai bammei nungc kamei rui mai khou rui sa patna nangniw khang tiimei Latzan latdanv Ruh hylou reymei kahak tei RINGHPOUC rui mi taucpaek nei khou tei hylou the. Hei tei RINGHPOUC rui akhou tiilou the.

⁵Ai kai biak ziangrih datna chyng khou tei rui key dat the. Khoutei, RINGHPOUC rui latdanv tiimei kumcna, ai rui kasiamhloumei thingkhuk khou tei mi taucpaek nei tei lou the — khou tei rui thauna hei tei mi khou tei lou bam kan the.”

⁶(Bene-Jaakanmei nunc tuang duikhunc bamv khou tei rui Isaraelmei nunc tei tat thau datna Mosera thangc tat kan the. Hei bamv khou tei Aron theic the kumna khou tei mbeihlou kan the, mi tangv kanac mpouh Eleazar rui kaphaan amuh sw lyn the.

⁷Hei khou tei rui kaniw Gudgoda thangc tat datna dui geihmei bamv Jotbatha twna kawmei bamv thangc tat the.

⁸Mi ganv khou tei Levi kaikhwang tei Latdyng Khuk tei kathouc sw khang, amuh nunc swna kasiamruai sw khang, khatni kazanc khou rui suaihiam kaucpat khang RINGHPOUC rui kadahlou kan the. Ntaw nganv hei tei kaniw thouc sw bam e.

⁹Hei zaeng rui khwang baihmei kumcna Levimei kaikhwang thu kaniw khang ramv maek khe; RINGHPOUC nangniw Racguangc rui nrianhloumei kumcna kaniw rui laatowmei twmei kiu RINGHPOUC tuang amuh nunc swtowmei tei the.)

¹⁰“Reymei luan khou sw kanmei kumcna, ai chyngbut khou tei zaeng 40 bamlou the. Ai rui samei tei RINGHPOUC rui chulou datna nangniw ta swmutlou mak khang nuhlou dat the. Kalam thu nangniw ta swmaanmei hei Ravguangc tuang ningmei hamh khwan e.

¹¹Hei tangv nangniw pupouc nunc khou nrianhloumei kandic tei gut laa khang nangniw ta nduangh tat tho twna kamei rui akhou sa the.

¹²“Ntaw thu, Isaraelmei nuncle, RINGHPOUC nangniw Racguangc rui nangniw khou rui kahawmei hei nking o: RINGHPOUC ta kalum o khatni kamei rui samei guay tei piu o. Kata nzian o, nang lung kapwm rui khatni nang du kapwm rui kasiamruai sw o,

¹³kumna katuang latdanv guay tei piu o. Nangniw khang gaeng khang rui ai rui aseic hei mi guay tei nangniw khou dinc bammei tuang the.

¹⁴Kauh liangmei tingpuk hei RINGHPOUC tuang e; kandih khatni mi khou naimei kaguayna hei ni katuang e.

¹⁵Tiki RINGHPOUC rui nangniw pupouc nunc ta heidikamv nzianmei zaeng rui zaatc baihmei phaan nangniw ta kamei khang kadahlou the, kumna ntaw ni nangniw hei katuang kadahloumei nunc swna bam the.

¹⁶Kumhpui zaeng rui, lungning tuang gic ruamc o, nangniw nu tanc bam ri tho.

¹⁷Kalam thu nangniw Racguangc hei Ravguayna Racguangc kaipouc guayna kaipouc, kamei hei daihmei, Ngamparymei meicpingmei Racguangc e. Kamei hei guhsw gahsw mak ge, lanvbiwmei ni laa mak ge.

¹⁸Kamei rui nrunac nunc khatni amaypui nunc ta kadanlou e; aniu pang khou lungc bammei gin nunc ta kamei nzian e, kumna kaniw khang taektw khatni pheybaan khang tiilou e.

¹⁹Kumhpui zaeng rui, mi gin nunc ta tei zauc nzianlou o, kalam thu kaganv akhat khou nangniw Izip kandic khou gin sw bam khwan e.

²⁰RINGHPOUC nangniw Racguangc lat piu o kumna kata na siamruai sw o. Kakhou lwm nuhmei sw o kumna nangniw tuang latdyng tei kazanc khou na sw o.

²¹Kata thuanc o — kamei hei nangniw Racguangc e, khatni kamei rui nangniw khang daihmei charynmei taanv taanclou kanmei tei nangniw mik kahak rui how kan the.

²²Nangniw pupouc nunc tei kaniw Izip thangc keymei ganv khou kaniw meic gaanv 70 na khwan e. Tiki ntaw thu RINGHPOUC nangniw Racguangc rui nangniw ta tingpuk khou nai bammei gaanchuangcna zu tigeiclou the.