Read Rongmei Naga RIAKDANV KALUAIHMEI 11 Bible Online

RIAKDANV KALUAIHMEI 11 - Rongmei Naga bible

RIAKDANV KALUAIHMEI 11

¹“RINGHPOUC nangniw Racguangc ta nzian o kumna kaganv kathuicna katuang latdanv guay tei piu o.

²RINGHPOUC kamei rui nangniw khou taanvtaancloumei khou rui kalam khou nangniw thay kanmei guay tei aseic hei ningtow o. Hei tei thay how kanmei tei nangniw nac nunc hamh e, nangniw de. RINGHPOUC tuang hym, kapumtan, kangamv,

³khatni katuang charynmei guay Izipmei guangc khou khatni kakandih kapwm khou taanclou kanmei tei nangniw mi nungc tei how kan the.

⁴Nangniw ta nthau tat bammei Izipmei rihmei guay ta kaniw tuang takuanc khatni takuanh gari guay lev Ntou duipui khou liakbinlou kanmei tei nangniw how the.

⁵Nangniw mi bamv hei guang tangh mak khou RINGHPOUC rui nangniw khang tazikramv khou taancloumei guay how kanmei tei nangniw de.

⁶Reuben kaikhwangmei Eliab nac mpouh Dathan khatni Abiram khou swlou kanmei tei nangniw thay e. Kandih nkakc patna kaney ta tei, kaney kaikhunc, kai, bangh, khatni kiruai guay lev kazauhna meic guayna hu khou kandih rui aluakc kanmei tei how the.

⁷Ngguay, RINGHPOUC rui taancloumei guay mik kahak rui how kanmei kiu nangniw the.

⁸“Ai rui aseic nangniw khang tiiloumei latdanv guay hei piu nina e. Kum e tw e thei nangniw rui Jordan duithuak hei kaan lana nangniw rui gut nimei kandic hei laa ngam puni.

⁹Kumna nangniw pupouc nunc khatni kaniw kikta nunc khou nrianhloumei guaihnoudui khatni nkhuaihdui rui luanghmei kandic gaymei ramc khou tei tingsaengcna lungc bam puni.

¹⁰Nangniw rui laa nimei kandic hei thu nangniw rey khou lungcloumei Izip kandic tei kumhmei hamh e. Izip khou tei thu phunling lingc ni khou duichaeng zayna taanc ranvna taanh khang kage nai e,

¹¹tiki nangniw gut nimei kandic hei thu chyngramv khatni nzaengcramv mpeyna nai e, mi khou tei tingdui rui dui zwanmei tuang di the.

¹²Mi kandic ta tei RINGHPOUC nangniw Racguangc rui kadanlou bam e kumna kamei rui tingkwm saanvsaengh zauc bammei tuang e.

¹³“Kumhpui zaeng rui, ai rui aseic nangniw khou tiimei latdanv guay hei piu o; RINGHPOUC nangniw Racguangc ta nzian o kumna nangniw lung kapwm rui khatni nang du kapwm rui kasiamruai sw o.

¹⁴Nangniw rui kumna lungc e thei, tingdui kage naimei tingseimun khatni lailum khou ting tii guangna nap-bi, drakhadui, Olive thauc nangniw khang tii geiclou puni,

¹⁵khatni nangniw tuang kiruai khang ramhbwan tithaulou puni. Nangniw rui kahawmei taektw guay tiilou puni.

¹⁶RINGHPOUC khou rui nangniw ta zay mbiangh patna rav baihmei ta tikalum mak khang ramh thay lo.

¹⁷Kum ti thei, RINGHPOUC rui nangniw ta lunghpuamc puni. Kamei rui tingdui ta khaamlouna nangniw kandic khou ramh thau dat ngam pw lak khe. Kum pwkhou nangniw khang kandih gaymei ramv tiilou bam sini nangniw lungc ngam makna theic nuangc puni.

¹⁸“Mi tuang latdanv guay hei nangniw lungsyng khou lou o khatni kungcna sw o. Nangniw ningtowna bam khang hei tei nangniw baancpwam khou ntalou o khatni nangniw sanpiang khou thaengclou o.

¹⁹Mi guay tei nangniw nac nunc khou nchamlou o. Nangniw kai khou ni, rwan thanc tat bam khou ni, zipkeymei ganv khou ni, thaudatmei ganv khou ni, nthaekc bam khou ni, taanvtaanh bam khou ni mi lam tei racna bam o.

²⁰Mi guay tei nangniw kai kaimun tiangc khou khatni kairaengvmun khou hylou o.

²¹Kum e thei nangniw pupouc nunc khou nrianhloumei kandic khou nangniw lungc saengcna lungc puni. Tingpuk kandih nai saanv nangniw hei khou tei lungc bam puni.

²²“Ai rui nangniw khang tiilou kanmei latdanv guay tei piu chuyna piu o: RINGHPOUC nangniw Racguangc ta nzian o, katuang latdanv guay piu o, kumna kakhou lwm nuhmei sw e thei,

²³nangniw gut pwkhou mi zaat guay ta tei alay ganclou puni, khatni nangniw zaat suangc daihmei khatni tanhmei zaat lungc bammei kandic tei nangniw laa puni.

²⁴Nangniw rui tatloumei kandic guay tei nangniw tuang sw puni. Nangniw tuang ramvrei tei dihba thangc tazikramv, dihpy thangc Lebonan Chyng, neihpat thangc Euphratis duithuak khatni neihkey thangc Mediterranean duipui nganv puni.

²⁵Mi kandic khou tei nangniw rui tatloumei bamv kathuicna khou RINGHPOUC rui meic kathuicna ta nangniw ta ping khang swlou puni. Ai rui saloumei kumcna meic gaanv Khat na sini nangniw ta ding ada dat ngam lak khe.

²⁶“Aseic nangniw suaihiam khatni syang kak khou akhat kadah tho —

²⁷Ai rui aseic nangniw khang tiiloumei RINGHPOUC nangniw Racguangc tuang latdanv guay tei piu e thei nangniw suaihiam laa puni.

²⁸Tiki nangniw mi latdanv guay hei piu makna nangniw kalum bam zat makmei rav ta kalum tat re thei thu nangniw ruc khou syang key puni the.

²⁹Nangniw rui laa nimei kandic khou RINGHPOUC rui nangniw ta phungc guanglou pwkhou nangniw rui Gerizim Chyngbut khou suaihiam lou nina e khatni Ebal chyng khou sianglou nina e.

³⁰(Mi chingcbut kanei hei Jordan neihkey ramv khou Jordan nzaengc khou lungc bammei Kanaanmei tuang ramv khou nai e. Gilgal daeng khou More khou thau bammei thingbang daihmei ding khou rui duh makna neihkey biak thangc mi hei nai e.)

³¹Nangniw Jordan kaanna RINGHPOUC nangniw Racguangc rui tiiloumei kandic khou gut puni the. Nangniw mi kandic tei laana lungc pwkhou,

³²ai rui aseic nangniw khang tiiloumei latdanv guay hei lungh gutna piu nina e.