Read Rongmei Naga RIAKDANV KALUAIHMEI 12 Bible Online

RIAKDANV KALUAIHMEI 12 - Rongmei Naga bible

RIAKDANV KALUAIHMEI 12

¹“RINGHPOUC nangniw pupouc nunc Racguangc rui nangniw khang tiilou bammei kandic khou kiu lungc bam saanv nangniw piu bam nimei latdanv guay kiu mi hei e. Lungh gutna nking o!

²Nangniw guanglou pw nimei kandic khou tei, meic nunc tei rui kaniw tuang rav kalumpui bamv chyng kauhmei twan khou, luanghbut ruc khou, khatni thingbang bangc khou naimei kaguayna tei sw kasic ngam nina e.

³Kaniw tuang ravchabamv guay tei kalat ganc ngam nina e khatni kaniw kalum bammei ntauh guay tei siaucpuat paruatlou ngam nina e. Mi bamv guay khou tei kaniw kalum dat mak khang kaniw tuang ravpui Ashera tuang maengc tei mai ntei nina e khatni kaniw tuang ravmaengc guay tei dowbau key nina e.

⁴“Mi zaat nunc tei rui kaniw rav ta kalummei thak tei kumcna nangniw RINGHPOUC nangniw Racguangc ta kalum nuh mak ge.

⁵Meic nunc rui RINGHPOUC kakhou guang kariu lana kata kalummei bamv khang nangniw tuang kaikhwang nunc lungc bammei kandic khou rui kabamv akhat kamei rui kadahlou puni.

⁶Rawna khaeng nimei khatni baihmei khaeng nimei guay, nangniw tuang kadam ruh tuang akhat guay khatni puatkat guay, nangniw rui RINGHPOUC khang nrianhloumei kaipat guay, nangniw rui tii niina tiimei puatkat guay, nangniw tuang kiruai khatni lauziu nunc tuang nkui reymei guay tei mi bamv khou tei phungc guang nina e.

⁷Mi bamv khou tei, nangniw ta suaihiamloumeipu, RINGHPOUC nangniw Racguangc mav khou nangniw rui taancpatmei taektw taekzangv tei nangniw khatni nangniw kaikhunc guayna tuzangvna neihla bam nina e.

⁸“Mi ganv kiu guang pwkhou thu, aniu rui aseic sw bammei thiak tei kumcna nangniw sw dat lak nina the. Ntaw nganvmei thu kamei kamei rui kahawmei thiak khou kalum bam di he,

⁹kalam thu RINGHPOUC nangniw Racguangc rui tiiloumei, nangniw nchu-nzaenghna lungc pw nimei kandic khou tei nangniw gut mak ge.

¹⁰Nangniw Jordan duithuak kaanpat pwkhou, RINGHPOUC rui nangniw ta mi kandic tei tii laa puni khatni khou tei tilungclou puni. Nangniw ta zauczihmei kapwmna khou rui kamei rui nangniw ta gaeklou puni, kumna nangniw nchu-nzaenghna lungc bam puni.

¹¹Mi tangv RINGHPOUC nangniw Racguangc rui kazanc sana lungc nipui bamv kadah patlou puni, mi bamv khou tei ai rui nangniw khou latdanv tiimei guay rawna khaengmei puatkat, ruh tuang kadam, nthukmei puatkat khatni RINGHPOUC khang latdyng swloumei puatkat guay hei phungc guang nina e.

¹²Mi bamv khou tei nangniw nac nunc banghpui banghpu nunc, kaniw tuang ramvdui maekmei Levimei nangniw kaidai khou lungc nchamc bammei nunc lev twna RINGHPOUC hu khou neihla nchamc nina e.

¹³Nangniw rui khaeng nii niimei bamv khou nangniw khaeng rap nuh mak ge;

¹⁴nangniw Isaraelmei kaikhwang pang khou kaikhwang akhat tuang ramv khou kata kalummei bamv khang kadahloumei bamv khou na tei rawna khaeng nuh e khatni ai rui taanc o twmei guay tei taanc nuh e.

¹⁵“Tiki nangniw rui bammei bamv khou tei nangniw tuang khouringh khounah thu swluai tu bam nuh e. RINGHPOUC rui tiiloumei theilayna nangniw tu nii saanv tu nuh de. Nangniw meic guayna kariak theilayna nthanmei ni nthan makmei ni asanh khatni chakhaengv zanc tumei kumcna tu nuh de.

¹⁶Tiki nangniw zei thu tu lak nina e; hei tei dui bun ganh kumcna kandih khou bunlou nina e.

¹⁷RINGHPOUC khang khaengloumei zanc tei thu akhat na sini nangniw kailuangc khou tei tu lak nina e: nap-bi tuang, drakhadui tuang, Olive thauc tuang, kadam ruh tuang pwni, nangniw tuang guaih bangh khatni lauziu nkui reymei pwni, RINGHPOUC khang nrianhloumei kaipat pwni, nangniw rui tii niina tii patmei kaipat pwni, baih baihmei kaipat pwni kai khou tu lak nina e.

¹⁸Nangniw khatni nangniw nac nunc tei, nangniw bangc nunc lev nangniw kaidai khou lungc kariu bammei Levimei nunc lev twna mi puatkat guay hei RINGHPOUC nangniw Racguangc hu khou, RINGHPOUC nangniw Racguangc kamei rui kalummei bamv khang twna kadahloumei bamv khou tei tu nina e. Nangniw rui taanclou kanmei kaguayna ruc khou tei mi bamv khou tei nangniw neihla nina e.

¹⁹Nangniw tuang kandic khou tei nangniw lungc bam saanv Levimei ta ntaamvlou mak khang ramh thay o.

²⁰“RINGHPOUC nangniw Racguangc kamei rui nrianhlou kanmei kumcna, kamei rui nangniw tuang ramv tidaic pat pwkhou, khav zanh ni nangniw rui tu nii niimei ganv khou tu bam nuh e.

²¹Ravkalum nimei bamv kiu duc langv e thei, nangniw rui kahaw hawmei ganv khou, RINGHPOUC rui tiiloumei guaih bangh khatni lauziu tei dowluaina nangniw kai khou khav zanc tei ai rui salou kanmei tei kumcna tu nuh e.

²²Thow pwni, kariak khou nthanmei ni nthan makmei ni, asanh lev chakhaengv zanc tumei kumcna kamei hei tei tu nuh e.

²³Zanhbangv khou tei zei naibam saanv thu hei tei tu lak nina e, kalam thu ringhmei hei zei khou tei nai the, kumna zanh tu khou rui ringhmei tei nangniw tu bin nuh mak ge.

²⁴Nangniw zei tu nuh mak ge; hei tei dui bun ganh kumcna kandih khou bunlou nina e.

²⁵Nangniw mi latdanv hei piu e thei, RINGHPOUC neihla puni, kumna ramh kaguayna nangniw khatni nangniw tounac nunc khang nganvna gay puni.

²⁶Nangniw tuang puatkat guay akhatni nangniw rui RINGHPOUC khang nrianhloumei puatkat guay tei kalummei bamv khou tei laaguang nina e.

²⁷RINGHPOUC tuang ravchapaeng khou ntei mutsutna khaeng nimei puatkat guay tei phungc guang nina e. Nangniw kazanc tu lana kazei tei ravchapaeng khou bunlou nina e.

²⁸Ai rui nangniw khou latdanv swna samei kathuic hei piu chuyna piu nina e, kum e thei tingsaengzaeng nangniw khatni nangniw tounac nunc khang nganvna ramh katana gay turana puni, kalam thu hei tei rui nangniw nchumhmei khatni RINGHPOUC nangniw Racguangc rui pianlou nuhmei taanv taanc bam tu e.

²⁹“Nangniw zaatc baihmei nunc tuang kandic khou tei rihkey pwkhou RINGHPOUC nangniw Racguangc rui zaatc baihmei nunc ta tei swmaanlou puni, kumna nangniw mi ramv tei laana mi khou tei lungc puni.

³⁰RINGHPOUC rui mi zaat nunc ta tei swmaan tang kan pwkhou, kaniw tuang ravriak thak tei nangniw lailuaih mak khang ramh thay o, kalam thu hei tei phaysuy nimei bamv e. Kaniw rui kalummei thak tei kumcna kalum khang rui kaniw akumhna kaniw tuang rav ta kalum tu cho twmei kathai bam riu.

³¹Kaniw rui kaniw tuang rav ta kalummei thak tei kumcna RINGHPOUC nangniw Racguangc ta nangniw kalum nuh mak ge, kalam thu kaniw rui kaniw rav ta kalummei ganv khou RINGHPOUC karaengmei chanymei taanv guay tei taanc e. Kaniw tei kaniw nac nunc ta nganvna mai nteina kaniw tuang ravchabamv khou khaeng e.

³²“Ai rui nangniw khou latdanv swna saloumei guay tei nangniw lungh gutna piu nina e; mi khou tei haap ni haaplou nuh mak ge, laa ganc ni laa ganc nuh mak ge.