Read Rongmei Naga RIAKDANV KALUAIHMEI 13 Bible Online

RIAKDANV KALUAIHMEI 13 - Rongmei Naga bible

RIAKDANV KALUAIHMEI 13

¹“Nangniw pang khou mang amuh nai patna charynmei lat dinclouna

²khatni hei tei guang nthuihlou tina (nangniw kahunungc thay makmei) rav baihmei ta aniu kalum kandikho twna sa pwsini,

³kamei rui samei tei nking la riu. Hei tei RINGHPOUC nangniw Racguangc rui nangniw ta nchanv bam tuang e, RINGHPOUC ta nangniw lung kapwm rui nzian di ny zauc bam tuang e.

⁴RINGHPOUC kamei na ta pingna kathei lay o; katuang latdanv guay tei piu o; lwm nuhmei swna kata kalum o.

⁵Nangniw ta Izip khou bangh sw bammei khou rui kanpatloumei RINGHPOUC lat liam khang sa samei amuh khatni mangmuh ta tei thu swluai nina e. Mi kumhpui mei tei meicsimei e khatni RINGHPOUC rui nangniw ta kumna lungc o twna latdanv tiiloumei panty khou tei zay mbiangh pat khang swmei nunc e. Mi kumhmei simei khou tei rui duak pat khang mi kumhpui mei ta tei swluai nina e.

⁶“Nangniw khatni nangniw pupouc nunc rui nganvna kalum zat makmei rav nunc ta kalum khang nangniw rui nzianmei chana khatni nownah nunc rui hamh e thei nduangh dianghmei champanv rui nthiam nuh e.

⁷Nangniw daeng khou lungc bammei hamh e thei duh thangc lungc bammei nunc tuang rav nunc ta kalum khang mi kumhmei nunc hei rui katiu bam nuh e.

⁸Tiki mi khou tei nangniw kwmlou la riu, nking sini nking bam la riu. Kumhpui mei ta tei zauc nzianlou nuh mak ge, kata tei gaek ni gaek bam nuh mak ge.

⁹Kata tei swluai nina e! Nang baanc kahak rui rey liangna swluai nimei khou tei baanh keyrey nina e, kum pwkhou meic baihmei nunc ni baanh key dat kan diu.

¹⁰Kata tei ntauh nkwam luai nina e! kalam thu nangniw ta Izip khou bangh sw bammei khou rui kanpatloumei RINGHPOUC nangniw Racguangc khou rui nangniw ta zay mbiangh pat khang sw the.

¹¹Kumna sa kanmei tei Isaraelmei guayna rui chu puni kumna mi kumhmei tei sw dat khang ping puni.

¹²“RINGHPOUC rui nangniw khang tiiloumei kaidai guay khou lungc bampui ganv khou,

¹³gaeng makmei nangniw meic gaanvsaekc rui gaanvsaekc ta chaengzay mbianghna nangniw kalum bam makmei rav nunc ta tikalum kan the twna chu guang nuh e.

¹⁴Mi kumhmei lat hei chu guang pwkhou, hei tei kaling ny twmei phu mincna phu o; mi kumhmei tei pat changh kan the twmei thay e thei,

¹⁵mi kumhmei kaidai khou lungc bammei guay ta tei thu kaniw tuang kiruai guay lev twna swluai ngam nina de. Mi kaidai ta tei sw kamut kamailou nina e.

¹⁶Mi kaidai tuang puat guay tei sanghbamv khou guang khuanlouna mi kaidai lev puatc guay tei RINGHPOUC nangniw Racguangc khang khaengmei swna ntei nina e. Mi kaidai tei kasiamh dat makna ganclou nina e.

¹⁷Kaniw tuang ramh akhat na sini laa thau nuh mak ge. Kum pwkhou RINGHPOUC lungpuam nchu keyna nangniw ta zauc nzianlou dat puni. Kamei rui nangniw ta nzianlouna nangniw pupouc nunc khou nrianhloumei kumcna nangniw ta meic kingckiucna tilungclou dat puni.

¹⁸Ai rui aseic nangniw khou tiimei latdanv guay hei piuna kamei rui taanc o twmei guay taanc pwkhou kamei rui mi guay hei swlou puni.