Read Rongmei Naga RIAKDANV KALUAIHMEI 14 Bible Online

RIAKDANV KALUAIHMEI 14 - Rongmei Naga bible

RIAKDANV KALUAIHMEI 14

¹“Nangniw hei RINGHPOUC nangniw Racguangc tuang mei nunc e. Kumhpui zaeng rui, theihmei khang latlumei ganv khou zaatc baihmei rui swmei kumcna nangniw pumc kazam kazei sw patna khatni nangniw hubiak sam guatna sw nuh mak ge.

²Nangniw hei thu RINGHPOUC nangniw Racguangc tuang nthanmei nunc e; kandih nam ruc khou bammei zaatc guayna pang khou rui nangniw ta thu kamei khang kadahloumei tuang di the.

³“RINGHPOUC rui nthan makmei e twna saloumei guayna tei nangniw tu nuh mak ge.

⁴Nangniw rui tu nuhmei khouringc nunc thu: guaih, lauziu, ziuh,

⁵asanh, nwmbangc lauziu, chalung, chakhaengv,

⁶khatni kangianc kanei bakna chalath khaihmei khouringc guay hei e.

⁷Kangianc kanei bak makmei khatni chalath khaih makmei khouringc tu nuh mak ge. Guaikuan, rabbit, khatni mbepui hei guay hei tu nuh mak ge. Mi guay hei nthan makmei e; mi guay hei chalath khaic sini kangianh kanei bak mak ge.

⁸Guak zanc tu nuh mak ge. Guak hei nthan makmei e; kangianc kanei bak sini chalath khaih mak ge. Nangniw mi kumhmei khouringc guay ta tu nuh mak ge, theihmei pumc ta sini kahi nuh mak ge.

⁹“Kasw naimei khatni kalip naimei khav zaat guay tu nuh e.

¹⁰Dui khou bammei kasw maek khatni kalip maekmei khouringc ta tu nuh mak ge. Hei tei nthan makmei khouringc nunc e.

¹¹“Nthanmei nruayna guay nangniw tu nuh e.

¹²Tiki mi nruay nunc thu nangniw tu nuh mak ge mouckauh, langdia, langdia miwmei,

¹³mouckavna miwmei, mouc zaat guay,

¹⁴agaekc zaat guay,

¹⁵ostrich, kachei naimei puanmangh zaat guay,

¹⁶puanmanghlauna khatni puanmangh daihmei, dui ruay,

¹⁷khatni tazikramv puanmangc,

¹⁸baanbuc, taruaih rampiu khatni laamtuaih.

¹⁹“Kasw naimei nkav nkit guay tei nthan makmei e; hei tei tu nuh mak ge.

²⁰Kasw naina samhmei nthanmei khouringc guay nangniw tu nuh e.

²¹“Karana theihmei khouringc zanc tu nuh mak ge. Nangniw pang khou bammei zaatc baihmei nunc tei rui hei tei tu kan diu, hamh e thei hei tei zaatc baihmei khang zuanclou nuh e. Tiki nangniw thu RINGHPOUC nangniw Racguangc tuang e; nangniw hei katuang mei nunc e. “Ziuhnac, hamh e thei lauziunac zanc kakui noudui khou suangc nuh mak ge.

²²“Nangniw laupuk khou rui tingkwm khou taanc patmei kaguay khou rui kadam ruh khou akhat thu laa patlou nina e.

²³Kumna RINGHPOUC nangniw Racguangc rui kata kalummei bamv khang kadahloumei bamv khou tei tatna kahu khou nangniw tuang nap, drakhadui, Olive thauc kadam ruh tuang tei khatni nangniw tuang guaih khatni lauziu nkui reymei tei khou tei tu nina e. RINGHPOUC nangniw Racguangc ta kaganv kathuicna khou chakhwang swna bam khang nangniw mi hei taanc nina e.

²⁴RINGHPOUC nangniw Racguangc rui nangniw ta suaihiamlou pwkhou nangniw bamv khou rui kalummei bamv tei duc langvna kadam ruh tuang tei phungc tat tangc lakmei tuang nai e thei,

²⁵hei tei zuanc lana kamanv tei kalummei bamv thangc tei phungc tat nina e.

²⁶Mi syan tei rui guaih zanc, lauziu, drakhadui, hei kumhmei guay hei liu lana nang khatni nang kai kaikhuncmei kaguayna khou tei RINGHPOUC hu khou tu nina e.

²⁷“Nangniw tuang kaidai guay khou lungc bammei Levimei guay ta tei ntaamvlou riu; kalam thu kaniw tuang ramvdui maek ge.

²⁸Tingkwm kathumh pum nangniw tuang nap-bi tuang kadam ruh tuang tei phungc guang kaduaina nangniw tuang kaidai khou ry kaduailou nina e.

²⁹Mi hei karam kadui maekmei nangniw kaidai khou bammei Levimei, gin nunc, nruna nunc, khatni swmmaypui nunc khang e. Kaniw khang kage naimei theilayna kaniw guang laa nina e. Nangniw hei kumcna taanc ti thei nangniw rui taanhmei taanv guayna khou RINGHPOUC nangniw Racguangc rui suaihiamlou puni.