Read Rongmei Naga RIAKDANV KALUAIHMEI 15 Bible Online

RIAKDANV KALUAIHMEI 15 - Rongmei Naga bible

RIAKDANV KALUAIHMEI 15

¹“Chaneimei tingkwm luaimei kathuic nangniw tuang syanpow phunghmei nunc pow tei kuaklou nina e.

²Mi hei kumna sw nina e. Isaraelmei nchamc khou syan tipouloumei nunc tei mi pow tei kuaklou nina e; kamei mi syan tei laa dat khang sw lak nina e. Kalam thu mi pow tei kuak the twna RINGHPOUC kamei kahak rui kauc pat kan the.

³Zaatc baihmei tuang pow tei thu laa dat nuh de, tiki Isaraelmei nchamc pow tei thu laa dat nuh mak khe.

⁴“Kum e tiki nangniw pang khou lungcsi ryanramei nai lak ge, kalam thu “RINGHPOUC nangniw Racguangc rui mi kandic tei nangniw tuang sw khang tiilou tuang the, kamei rui chingkhiuhna suaihiamlou puni.

⁵Nangniw rui nthuihna khatni lunghgutna ai rui aseic nangniw khou tiimei RINGHPOUC tuang latdanv guayna tei piu pwkhou suaihiamlou puni the.

⁶RINGHPOUC kamei rui nangniw ta katuang latdyng theilayna suaihiamlou puni. Nangniw tuang syan zaatc mpeyna khang tipou pat puni tiki nangniw thu meickai tuang pou bam lak ge. Nangniw rui zaatc mpeyna ta sin puni, tiki zaatc akhat na rui sini nangniw ta sin bam lak ge.

⁷“Tabui bui tuang kaidai khou pwni Isaraelmei lungcsimei nai e thei kara rana khang chakna nkhavlou makna ganclou lak nina e.

⁸Nangniw lungning daicna kakhang kage naimei guay tei tipou tio.

⁹Pow kuaklou nimei ganv ana the twna tipoulou makna bam nuh mak ge. Hei kumhmei simei lungning hei nangniw khou pat nuh mak ge. Nangniw rui kakhang tipoulou mu ti thei kamei rui nang ruc khou RINGHPOUC khou lat phungclou puni, kumna nang ruc khou nwan keylou puni.

¹⁰Lungning daicna nsa tii pat tio, kum e thei nang taanv guay khou RINGHPOUC rui suaihiamlou puni.

¹¹Isaraelmei pang khou ni lungcsimei nai tanh tan bam pw nina di the, kumhpui zaeng rui kaniw khang tei lungning daiclou o twna ai rui latdanv tii e.

¹²“Isaraelmei nggaanvmei hamh e thei ntumei gaanv khat rui karana kata bangh swna nang khang zuanclou e thei, kamei rui tingkwm charuk nang khang taanvtaanhlou e thei nang rui kata tei mpatlou dat nina e. Chaneimei kwm tei guang e thei nang rui kata mpatlou dat nina e.

¹³Nang rui kata mpatlou datmei ganv khou kata tei baantang mpatlou dat lak nina e.

¹⁴RINGHPOUC rui nang khang tiiloumei lauziu, nap-bi, khatni drakhadui tei lungning daicna tiilou nina e.

¹⁵Nangniw Izip khou bangh sw bammei tuang e, tiki RINGHPOUC nangniw Racguangc rui ric patloumei tuang e twmei amuc riu; hei zaeng rui ai rui nangniw khou mi latdanv hei tiimei tuang e.

¹⁶“Tiki nangniw tuang bangc tei tat dat nii mak kho ni nuh e. Kamei rui nang ta khatni nang kai ta nzianna pianna bam bam nuh e.

¹⁷Kum e thei kata tei nang kai kaimun khou nduangh guangna kanu rwng o. Kum kan e thei kamei tei panty saanvsaengh nang bangc di the. Ntumei bangc nunc ta ni hei kumcna sw muay nina e.

¹⁸Nang bangc ta mpatpui ganv khou tei amanv makmei tuang sw riu. Kamei rui nang tuang syan phihmei suangc taanv kadam kanei mbuna tingkwm charuk taanclou kan the. Nangniw mi hei taanc ti thei RINGHPOUC nangniw Racguangc rui nangniw tuang taanv bamv guayna khou suaihiamlou puni.

¹⁹“Nangniw tuang guaic khatni lauziu tuang nkui reymei guay tei RINGHPOUC nangniw Racguangc khang reic patlou nina e. Mi kumhmei guay ta tei taanv titaanc nuh mak ge khatni mi kumhmei lauziu hiw tei tiap nuh mak ge.

²⁰Tingkwm pum mi guay tei kalummei bamv khou RINGHPOUC hu khou guangna tu nina e.

²¹Tiki mi khouringc tei kamik tiatna ny, kaphay chuanchayna ny hamh e thei baihmei suai hakmei tuang nai e thei hei tei RINGHPOUC nangniw Racguangc khang khaenglou lak nina e.

²²Mi kumhmei khouringc tei kai khou tu nuh e. Nangniw nthanmei, nthan makmei meic kaguayna asanh lev chakhaengv zanc tu kumcna tu nuh e.

²³Tiki kazei tei thu tu nuh mak ge; zei tei kandih khou dui bun kumc bun keylou nina e.