Read Rongmei Naga RIAKDANV KALUAIHMEI 17 Bible Online

RIAKDANV KALUAIHMEI 17 - Rongmei Naga bible

RIAKDANV KALUAIHMEI 17

¹“Hiaksui makmei guaic khatni lauziu RINGHPOUC khang kat nuh mak ge; hei tei RINGHPOUC rui karaeng e.

²“Thowkumhmei ntumei pwni, nggaanvmei pwni nangniw kaidai khou lungc bammei gaanv khat rui RINGHPOUC tuang latdanv ta liamna kamik zaw khou simei taancna

³rav baihmei ta hamh e thei neihmik ta, bw ta gaanchuangcna ta kalum bammei nai e twna chu guang e thei,

⁴hei tei kalingmei kaling hamhmei phu mincna kathai nina e. Mi kumhmei simei tei Isaraelmei pang khou pat bam changhmei tuang nai e thei,

⁵mi kumhpui mei ta tei kaidai paengc thangc zay patna ntauh nkwam luai nina e.

⁶Tiki sakhi kanei khatni mi suangc geicna nai pwkhou rui swluai nina e; sakhi akhat na zaeng rui thu swluai nuh mak ge.

⁷Sakhi nunc tei rui ntauh nkwam rey nina e, kum pwkhou rui baihmei guay tei rui ni nkwam nina e; mi kumcna simei ti hei swmaan nina e.

⁸“Kaidai tuang latzanpouc nunc na rui sw ngam makmei tuang latzan asaekc ni nai nuh e. Ramvdui lam khou, kabiu kabaengmei lam khou, khatni meicbiw meicdowmei lam khou kaphianh kunghmei latbam nai guang nuh e. Mi kumhmei kunghmei latzan hei nai pwkhou RINGHPOUC nangniw Racguangc rui kadahloumei kalummei bamv thangc tei tatna

⁹latbam tei amuh nunc khou khatni latzanpouc khou phungc ku nina e, kumna kaniw rui latbamv tei kaphianh kan puni.

¹⁰Kaniw rui lat tei riawlou puni kumna kaniw rui kum o twmei tei piuna taanc nina e.

¹¹Kaniw tuang latdyng tei piu nina e kumna kaniw rui kum o twna samei guay tei piuna taanc nina e. Kaniw rui saloumei khou tei rui ramhkhat na sini taanc twan nuh mak ge.

¹²Latzanpouc khatni thouh sw bammei amuh tuang latdanv tei piu makpui mei ta tei swluai nina e. Heikumna simei tei Isaraelmei pang khou rui laa ganc nina e.

¹³Kum pwkhou mi chamv tei chu lana mi kumhmei simei taanv tei taanc dat bauh mak khang e.

¹⁴“RINGHPOUC nangniw Racguangc rui tiiloumei kandic khou kiu nangniw lungc pwkhou, nangniw daeng khou lungc nkuay bammei zaat nunc kumcna nangniw ni “Aniu khang guangh akhat suanglou di kho” twna sa puni.

¹⁵Nangniw tuang guangc sw nimei hei RINGHPOUC kamei rui kapahloupui mei rui sw nina e twmei hei nangniw maanv lam e. Nangniw tuang guangc tei nangniw mei rui sw nina e; zaatc baihmei ta nangniw guangc ti sw nuh mak ge.

¹⁶Guangh tei katuang ricmei nunc khang takuanh geicna nai khang rui takuanh liu khang Izip thangc meic thoucna sw lak nina e, kalam thu Isaraelmei tei Izip khou hanc guang dat lak nina e twna salou e.

¹⁷Guangh tei kanow geic lak nina e, kalam thu hei tei rui kata RINGHPOUC khou rui tiduc pat puni. Kamei daandi kachaekc khou ni lungcgay lak nina e.

¹⁸Kamei guangh sw pwkhou, Ravguangc tuang latdanv buk akhat kadaeng khou nai nina e, kumna Levimei amuh nunc khou naimei buk khou tei rui ncham bam nina e.

¹⁹Kamei rui RINGHPOUC ta chakhwang swna bam khang khatni mi khou tei naimei latdanv guay tei piu nthuihna piu bam khang kamei rui mi buk tei kadaeng khou louna kapanty saanvsaengh pac bam nina e.

²⁰Kamei hei Isaraelmei guay pang khou rui kauh taph tapmei the twna kakhanh nimei khou rui khatni RINGHPOUC tuang latdanv liam nimei khou rui hei tei rui kata karak bam khang e. Kum e thei kamei tingsaengcna guanghtu puni khatni kakikta rui meickin mpeyna Isarael khou guangh sw puni.