Read Rongmei Naga RIAKDANV KALUAIHMEI 18 Bible Online

RIAKDANV KALUAIHMEI 18 - Rongmei Naga bible

RIAKDANV KALUAIHMEI 18

¹“Levimei kaikhwang hei Isarael khou kaniw tuang ramvdui nai nuh mak ge; RINGHPOUC khang katloumei puatkat khou tei rui kaniw ringc nina e.

²Kaikhwang baihmei kumcna kaniw tuang ramv nai nuh mak ge. Kaniw tuang dam kiu thu RINGHPOUC tuang latdyng theilayna RINGHPOUC tuang amuh swmei hei di the.

³“Guaih hamh e thei lauziu khaengmei ganv khou, amuh nunc khang tei hunaeng, kakhacbaeng, khatni kalungcna, tii nina e.

⁴Nap-bi, drakhadui, Olive thauc, khatni ramhhiw tei rey liangmei dam tei kaniw laa nina e.

⁵Levimei ti hei tingsaeng kasiamruai swmei khang RINGHPOUC rui Isaraelmei kaikhwang pang khou rui kadahloumei tuang di the.

⁶“Levimei tabui bui kaidai khou rui pwni kamei rui kahaw e thei kalummei bamv khou guang nuh e

⁷kumna baihmei Levimei amuh nunc tei kumcna kamei ni RINGHPOUC tuang amuh swna taanvtaanc bam nuh e.

⁸Amuh baih baihmei rui laa bammei taektw zu tei kamei ni laa nuh e, khatni kakai kaikhunc rui tii guang guangmei tei kakhang lou nuh e.

⁹“RINGHPOUC nangniw Racguangc rui nangniw khang tiiloumei kandic khou kiu guang pwkhou, hei khou tei lungc bammei zaatc nunc rui taanc bammei chanymei taanv guay tei nangniw lay taanc lak nina e.

¹⁰Nangniw tuang ravchapaeng khou nangniw nac nunc ta tei nteina khaeng nuh mak ge. Duaih raengh ni parian paramei ni sw nuh mak ge.

¹¹Mangmuc swna mpinmei rav khatni mang thangc theihmei ta kachucna latdinc bam nuh mak ge.

¹²Mi kumhmei chanymei taanv guay ta RINGHPOUC nangniw Racguangc rui karaeng e. Hei zaeng rui zaatc nunc ta tei nangniw gut pwkhou mi kandic khou rui nthau ganh tuang e.

¹³RINGHPOUC khou na lwmnuhmei swna bam o.”

¹⁴Khoutei Mousi rui sa the, “Nangniw guang lungc nimei kandic khou lungc bammei nunc tei mangmuc mbanna ravtow muc kachucmei nunc e. Tiki nangniw thu hei tei sw khang RINGHPOUC nangniw Racguangc rui nuhlou mak khe.

¹⁵Tiki kamei rui nangniw pang khou rui ai kumhmei muhzwng akhat nangniw khou tiguang puni. Nangniw kalat piu nina e.

¹⁶“Nangniw Sinai Chyng khou guang kariu bammei nungc tei, nangniw theic pw khang ping lana RINGHPOUC rui nangniw khou kachuclou dat mak khang khatni kamei bammei tuang maibwang tei tihowlou dat mak khang nangniw ney khwan e.

¹⁷Kum tina RINGHPOUC rui akhou kumna sa the, ‘kaniw ningtyngna ney the.

¹⁸Nang kumhmei muhzwng akhat ai rui kaniw pang khou rui kaniw khou thouc guang puni the. Kamei rui sa nimei lat guay tei ai rui kakhou salou puni the, kumna ai rui sa o twmei guay tei kamei rui meic nunc khou sa kadailou puni the.

¹⁹Muhzwng tei rui azanc khou sa patmei alat guay ta tei chulou makmei kathuic ta tei ai rui dandi tii puni.

²⁰Ai rui sa o twna sa makmei lat thowkumhmei muhzwng ruina azanc khou rui sa e thei, mi zaeng tei rui kamei theic puni, khatni rav baihmei zanc khou rui samei guay tei ni theic muay puni.’

²¹“Muhzwng akhat akhat rui sa patmei lat tei RINGHPOUC khou rui hamh e twmei akumhna thay ngam nina cho twna nangniw ning nuh e.

²²Muhzwng akhat rui RINGHPOUC zanc khou rui sa pat pwkhou, kamei rui samei tei guang tangh mak ge thei thu hei tei RINGHPOUC tuang lat hamh the. Mi kumhmei muhzwng tei kakhou rui patmei lat sa bam tuang e, mi kumhmei ta tei nangniw ping lak nina e.