Read Rongmei Naga RIAKDANV KALUAIHMEI 19 Bible Online

RIAKDANV KALUAIHMEI 19 - Rongmei Naga bible

RIAKDANV KALUAIHMEI 19

¹“Nangniw khang tiiloumei kandic khou lungc bammei nunc ta tei RINGHPOUC nangniw Racguangc rui swkamut kamailouna khou tei naimei kaidai guay khatni kai guay tei nangniw khang laana khou tei lungc pwkhou,

²Mi kandic tei kaidai kathumh khang damcpat nina e.

³Kumna kabamv nunc khang tei chaeng kasiamhna kalangv kathumh damcpat ro, thowkumhmei meic kabiuloupui mei rui kaidai akhat khou tei paklou khang e.

⁴Zauczihna hamhna, maanvna meic akhat ta swluaipui mei rui mi kumhmei kaidai khou tei pak duaklou khang e.

⁵Lat khang sana, meic gaanv nei rui thing dow khang tatna gaanv khat tuang nrih tei kathyngna gaanv khat ta tei swluai the, kum e thei kamei rui duploumei kaidai akhat khou paklou nina e.

⁶Duploumei kaidai hei akhat na e thei thu, hei khou tei nzwan guang khang duc langv tina guang tangh makna bam khou rui khwm khangh nimei rui kata nymna kakhuay maekmei ta swluai nuh e.

⁷Hei zaeng rui duploumei kaidai hei kathumh nina e.

⁸“Kamei rui nangniw pupouc nunc khou nrianhloumei kumcna RINGHPOUC nangniw Racguangc rui nangniw tuang kandic tidaiclou pwkhou khatni kamei rui nrianhloumei kandic kapwm tei tiilou pwkhou kiu

⁹baihmei kaidai kathumh ni kadahlou nina e. (Ai rui aseic nangniw khou tiimei latdanv guay hei piu e thei khatni RINGHPOUC nangniw Racguangc ta nzianna kamei rui samei theilayna lungc e thei kamei rui mi kandic hei nangniw khang tii puni.)

¹⁰Kakhuay maekmei maansei theih mak khang khatni RINGHPOUC rui nangniw khang tiiloumei kandic khou hei mi kumhmei nunc zei tei keylou mak khang, hei tei nangniw sw nina e.

¹¹“Meic gaanv khat rui reih reina bammei gaanv khat ta dowluai lana mi kumhmei kaidai akhat khou paklou the twna kakhanh kho.

¹²Mi kumhmei tei patmei ganv khou kamei bammei kaidai tuang kapy nunc rui nym guangna khwm laa nimei nunc khou tei tiilou nina e, kumna kata tei swluai nina e.

¹³Kata tei zauc nzianlou nuh mak ge. Mi kumhmei meicdowmei ti hei Isaraelmei khou rui swmaan nina e, heikum e thei ramh katana nangniw khang gay turana puni.

¹⁴“RINGHPOUC nangniw Racguangc rui tii nimei kandic khou kiu, kainingmei tuang reynungc tuang ramvrei tei kalaic nuh mak ge.

¹⁵“Meic gaanv khat ruc khou nkham guangmei khuay tei sakhi akhat na lat khou rui ti-nkhuai nuh mak ge; rau nganv khang sakhi kanei kathumh lat theilayna hei tei sinthau nina e.

¹⁶Thowkumhmei rui gaanv khat ta saraamcna khuay nkhamlouna sw kasic khang sw guang pw e thei,

¹⁷kaney gaanv nei tei kalummei bamv khou tei guangna amuh nunc khatni pei khou bammei latzanpouc nunc rui latzan tei sw nina e.

¹⁸Latzanpouc nunc tei rui latbamv tei mincna kathai lana thowkumhmei Isaraelmei nchamc ta saraamcna nkham bammei tuang nai e thei,

¹⁹nkhamloumeipu rui laa nimei dandi tei kamei rui laa nina the. Heikumna hei kumhmei simei taanhmeipu hei nangniw pang khou rui sw nthan pat nina e.

²⁰Meic baihmei nunc tei rui hei tei chu lana kaniw ping puni, kumna meic gaanv khat na sini mi kumhmei simei taanv taanc dat mak puni.

²¹Mi kumhmei lat bamv khou hei zauzian swlou nuh mak ge; mi tuang dandi tei panty khang panty, mik akhat khang mik akhat, huh akhat khang huh akhat, baanh akhat khang baanh akhat, tan akhat khang tan akhat khwm khangc nina e.