Read Rongmei Naga RIAKDANV KALUAIHMEI 2 Bible Online

RIAKDANV KALUAIHMEI 2 - Rongmei Naga bible

RIAKDANV KALUAIHMEI 2

¹“RINGHPOUC tuang latdanv theilayna aniu hanc datna Ntou duipui chaeng tazikramv khou key the, kumna Seir chyng khou kaganv tingsaengc sihna ruan tat bam khwan e.

²“Mi tangv RINGHPOUC rui akhou sa the,

³‘Nangniw mi chingcphay khou hei kaganv ramhbiucdou ruan tat kan the; dihpy biak thangc karih ngangh tho.

⁴Seir chyng khou lungc bammei nangniw chana punav Esau nac nunc tuang ramv khou tat gut puni the twna meic nunc khou latdanv tii titho. Mi khou tei kaniw rui nangniw ta ping puni.

⁵Tiki nangniw kaniw lev rih sw nuh mak ge, kaniw tuang ramv tei nangniw phaypav baclou biucna sini nangniw khang tii ni tuang hamh e. Kalam thu ai rui Seir kandic tei Esau kikta khang tii kan the.

⁶Nangniw kaniw khou rui taektw khatni dui thu liu nuh e.’

⁷“Nangniw rui taanhmei kaguay khou tei RINGHPOUC nangniw Racguangc rui akumhna suaihiamlou kan tu cho twmei ningtow o. Mi daihmei tazikramv khou ruan tat bam khou kamei nangniw ta kakalou the. Mi tingkwm 40 hei kamei rui nangniw lev tat nchamc guang the kumna nangniw khang ramh akhat na sini gaat tuang maek khe.

⁸“Kumna aniu tat thau datna Elat khatni Eziongeber kaidai khou rui Theihmei duipui keymei chaeng tei mpatlouna dihpy neihpat biak karihna Moab kandic biak thangc pat the.

⁹Khoutei RINGHPOUC rui akhou sa the, ‘Lot kiktamei Moabmei nunc ta nangniw sw kaguakc riu, hamh e thei kaniw ta adow riu. Ai rui Ar kaidai tei kaniw khang tii kan the, kumna kaniw tuang kandic kakiak na sini ai rui nangniw khang tii dat ni tuang hamh the.’ ”

¹⁰(Emim twna kawmei liantuangh zaat Ar khou lungc bam khwan e. Kaniw tei liantuangh Anakimmei nunc kumc saengdai khwan e.

¹¹Anakimmei nunc ta kumcna kaniw ta ni Rephaim twna kaw bam khwan e; tiki Moabmei nunc rui kaniw ta Emim twna kaw e.

¹²Hormei nunc Edom khou lungc bam khwan e, tiki Isaraelmei rui RINGHPOUC rui kaniw khang tiiloumei kandic khou lungc bammei nunc ta alay ganhmei kumcna Esau kikta nunc rui kaniw ta tei alay gancna mi zaat ta tei swmaan lana kaniw khoutei lungc the.)

¹³“Ntaw thu thau tho kumna Zered duithuak tei nangniw khang laa tho twna saloumei theilayna Zered duithuak tei tatna laa the.

¹⁴Hei tei aniu Kades Barnea mpatloumei tangv 38 kwm e. RINGHPOUC rui saloumei theilayna mi meikin tuang rihphyan guay tei theic ngam kan the.

¹⁵Kaniw guay tei theic ngam kan mak saanv RINGHPOUC rui kaniw ta nkhavlou dat mak khwan e.

¹⁶“Kaniw tei theic ngam kan pwkhou,

¹⁷RINGHPOUC rui aniu khou sa the,

¹⁸‘Aseic hei nangniw Ar chaeng rui Moab kandic tat kaan puni the.

¹⁹Khou kiu nangniw Lot kiktamei Amormei nunc tuang kandic ana puni the. Mi nunc ta tei nangniw suc-rih sw nuh mak ge, kalam thu ai rui kaniw khang tii kanmei kandic tei kakiak na sini ai rui nangniw khang tii dat ni tuang hamh the.’ ”

²⁰(Mi ramv zanc tei ni mi khou tei lungc bam khwanmei nunc zanc tei phuakna Rephaim twna kaw bam khwan e. Amormei nunc rui mi ti hei Zamzummim twna kaw khwan e.

²¹Kaniw tei Anakimmei nunc kumcna saengdai e. Kaniw tei zaatc daihmei akhat khwan e. RINGHPOUC rui kaniw ta swmaanlouna Amormei nunc tei khou tei lungc the.

²²Edommei kandic khou lungc bammei Esau kikta Edommei nunc khang ni RINGHPOUC rui hei tei kumcna swlou muaymei tuang e. RINGHPOUC rui Hormei nunc ta swmaan lana Edommei ta ntaw kaniw lungc bammei Edom kandic khou hei tilungclou the.

²³Mediterranean duipui paengc khou hei Kret pukakdic thangc rui guangmei nunc lungc the. Hei khou tei lungc bammei Avvimmei nunc ta kaniw rui swmaan lana kaniw rui dihba thangc Gaza nganvna laa key the.)

²⁴“Aniu Moab kandic kaan pat tang pwkhou, RINGHPOUC rui aniu khou sa the, ‘ntaw thu thauna Arnon duithuak kaan pat tho. Ai rui Heshbon khou bammei Amormei guangc Sihon ta khatni kakandic ta nangniw baanc khou tiilou kan the. Nangniw rui kata adowna kakandic tei laa tho.

²⁵Aseic khou rui thauna kandih nam ruc khou lungc bammei maansei guay rui nangniw ta ping khang tiswlou puni the. Nangniw zanc chu pwkhou meic kathuicna rui pingna kadunh puni the.’

²⁶“Mi tangv tei Kedemot tuang nzaengc khou rui Heshbon tuang guangc Sihon khou ai rui latpaumei thouclouna nchu-nzaengh khang kumna sa the:

²⁷‘Aniw nang tuang kandic tat kaan nii e. Aniw chaeng khou na nzut phut phutna tat puni de, chaeng paengc pat lak ge.

²⁸Aniw rui taektw ni dui ni kamanv tiina laa ni de. Aniw rui kahawmei thu nang tuang kandic tat kaanlou khang na de.

²⁹RINGHPOUC Ravguangc rui aniw khang tiiloumei kandic nzwanna Jordan ntaanvna tat kan ni de. Esau kiktamei Edom khou lungc bammei nunc khatni Ar khou lungc bammei Moabmei nunc rui thu kaniw kandic tat kaan khang nuhlou the.’

³⁰“Tiki guangh Sihon rui thu katuang kandic khou titat gut mak khe. Aniu ntaw laana bammei kandic hei kata ngamlouna laa kan diu khang RINGHPOUC Ravguangc rui Sihon lung titanclou the.

³¹“Khoutei RINGHPOUC rui akhou sa the, ‘Zauclo, ai rui guangh Sihon khatni katuang kandic ta nang baanc khou tiilou the; mi kandic tei nangniw laana lungc tho.’

³²Sihon rui katuang ricmei guay ta nduanghna aniu ta adow khang Jahaz kaidai daeng khou pat the.

³³Kumna RINGHPOUC rui kata aniu baanc khou tiilouna aniu rui kata, kanac mpouh nunc ta khatni kamei guay ta swluai the.

³⁴Kaidai kaguayna tei aniu rui laana swkamut kamailou the. Nggaanvmei, ntumei, alauc khaklangc dat makna meic kaguayna ta swluai the. Aniu rui meic gaanv khat na ta sini nringh mpatlou mak khe.

³⁵Aniu rui kiruai guay ni laa the, kaidai guay khou rui puatc ni laa the.

³⁶Arnon nzaengc tin khou naimei Aroer kaidai khou rui thauna Gilead nganv mi nzaengc chung khou naimei kaidai guay kuak ngam the. Kaidai akhat na raengc sini aniu khang tanhmei maek khe.

³⁷RINGHPOUC rui aniu ta tatlou riu twna samei Amormei nunc ramv, Jabbok duithuak tin khatni tatlou riu twna samei chyngramv guay khou thu aniu tatlou mak ge.