Read Rongmei Naga RIAKDANV KALUAIHMEI 20 Bible Online

RIAKDANV KALUAIHMEI 20 - Rongmei Naga bible

RIAKDANV KALUAIHMEI 20

¹“Nangniw rui zauczihmei ta adow khang tat pwkhou kaniw tuang gari, takuanh, khatni rihmei tei nangniw tuang khang suangc geic pwkhou, kaniw ta tei ping nuh mak ge. Nangniw ta Izip khou rui kanpatloumeipu RINGHPOUC nangniw Racguangc rui nangniw ta nkhavlou puni.

²Nangniw adow thau ni khou, amuh rui hu khou pat lana rihmei nunc khou tei kumna sa nina e,

³‘He Isaraelmei nuncle, nking o! Aseic hei nangniw rih bamv khou gut puni the. Zauczihmei ta nangniw ping riu, nangniw lung ni tangkhyn riu.

⁴RINGHPOUC nangniw Racguangc rui nangniw ta nkhavlou puni, kumna kamei rui nangniw ta rih tingamlou puni.’

⁵“Khoutei kapy nunc tei rui meic nunc khou tei kumna sa puni, ‘Kai swlouna katgutlou nangh makna bammei nangniw pang khou nai tu cho? Kumhmei nai e thei kamei tei kakai thangc hanc dat tho. Kata tei rih bamv khou swluai kan e thei, meic baihmei rui kakai tei katgutlou kan puni.

⁶Thowkumhmei drakhalau ruaiclouna kathai rei nangh makna bammei nai tu cho? Kum e thei kamei kakai thangc tat dat nuh the. Kata tei rih bamv khou swluai e thei meic baihmei rui drakhadui tei zangv kan puni.

⁷Thowkumhmei now suanc nina bammei nai tu cho? Kum e thei kamei tei hanc dat tho. Kata tei rih bamv khou swluai e thei, kakhang thanvloumeipui ta tei meic baihmei rui kaw dat kan puni.

⁸“‘Thowkumhmei zammei kalungthw maekmei nai tu cho? Kum e thei kamei tei kakai thangc hanc dat kan diu. Hei kumhmei nunc tei rui meic baihmei ta swzam e.’ ”

⁹Kapy nunc tei rui rihmei nunc khou sa tang pwkhou kaphwam kaphwam tuang kapy swmei kadah nina e.

¹⁰“Nangniw kaidai akhat ta adow khang sw pwkhou, kaniw tei gutlou khang sa rey nina e.

¹¹Kaniw rui raenghmun laanc patna nangniw baanc bangc khou gutlou e thei, kaniw tei nangniw bangc swna nangniw khang rui taanvtaanc nina e.

¹²Tiki mi kaidai mei nunc tei rui gutlou makna adow khang sw e thei, mi kaidai ta tei dingbin tho.

¹³RINGHPOUC nangniw Racguangc rui mi kaidai tei nangniw khou tiilou pwkhou, mi kaidai khou bammei nggaanvmei guayna ta swluai nina e.

¹⁴Tiki mi kaidai khou naimei ntumei nunc, alauc nunc, khouringh guay, khatni baih baihmei guay tei nangniw khang laa nina e. Nangniw tuang zauczihmei nunc tuang guay tei nangniw khang laa nuh e. Hei tei RINGHPOUC rui nangniw khang tiiloumei tuang the.

¹⁵Nangniw rui lungc nimei kaidai guay khou rui duh thangc naimei kaidai guay khou sw nimei thak kiu mi hei the.

¹⁶“Tiki RINGHPOUC rui nangniw khang tiiloumei kandic khou kiu kaidai guay ta nangniw lai pwkhou meic kaguayna ta swluai ngam nina e.

¹⁷RINGHPOUC tuang latdanv theilayna Hittimei, Ammormei, Kanaanmei, Perizimei, Hivimei, khatni Jebusimei hei nunc guay ti hei swluai ngampary nina e.

¹⁸Kaniw tuang rav kalum khou sw bammei chanymei tuang thak guay tei nangniw khou nchamlouna nangniw ta RINGHPOUC hu khou paapc tisw mak khang kaniw ta tei swluai ngam nina e.

¹⁹“Nangniw rui kaidai akhat ta laa khang swpui ganv khou, mi kaidai ta tei kaganv tingsaengcna dingbin bam sini tingthai bang guay ta thu dowbau nuh mak ge. Kathai tei thu tu o, tiki kabang tei thu sw kasic riu; thingbang guay tei zauczihmei nunc tuang hamh e.

²⁰Thingbang baih baihmei guay tei thu dow key lana nangniw tuang rilinbamv khang kasiamh o.