Read Rongmei Naga RIAKDANV KALUAIHMEI 21 Bible Online

RIAKDANV KALUAIHMEI 21 - Rongmei Naga bible

RIAKDANV KALUAIHMEI 21

¹“RINGHPOUC nangniw Racguangc rui tiiloumei kandic khou meic gaanv khat ta kaipouc thay makna dowluailou bam khwan e thei,

²nangniw tuang kapy nunc khatni latzanpouc nunc rui pat lana theicloumei bamv khou tei rui kadaeng khou naimei kaidai guay kak khou duhmei tei ndat nina e.

³Kumlana ana liang liangmei kaidai tuang kapy nunc rui taanv sinsw zat makmei guaituamnay akhat kadah nina e.

⁴Luangc taek zat makmei duithuak akhat daeng khou mi guaic tei zay keyna kaisw lautaanclou zat makmei bamv khou mi guaic guang tei dangv nina e.

⁵Khoutei Levimei amuh nunc ni kazauh nina e, kalam thu meicbiw meicdowmei tuang latzan guay khou hei kaniw kazauh nina e. RINGHPOUC nangniw Racguangc rui kaniw ta kataanvtaanh khang khatni kazanc khou suaihiam kauc pat khang kadahloumei nunc the.

⁶Ana liangmei kaidai tuang kapy nunc tei rui kaniw baanc swluailoumei guaituamnay ruc khou tei khiu lana

⁷kumna sa nina e, ‘Aniw rui mipu ta tei swluai mak ge, thow rui swluai cho twmei ni aniw thay mak ge.

⁸He RINGHPOUC, nang rui Izip khou rui kanpatloumei Isaraelmei nunc ti hei kuaklou o khatni khuay maekmei ta swluaimei tuang nwan aniw ruc khou tikeylou riu.’

⁹Heikumna RINGHPOUC rui samei tei piupui zaeng rui khuay maekmeipu tuang zeimanv nangniw khou keylou lak ge.

¹⁰“RINGHPOUC nangniw Racguangc rui nangniw ta rih tingamlouna rih nym pwkhou,

¹¹nym guangmei pang khou tei kalwn kachav gaymei, nangniw now khang laa nii rapmei ntumei ni kazauh nuh e.

¹²Kumhmei ta tei nangniw kai khou laaguanglou o, khoutei kapy guatna, kabaanctin rianc lana

¹³kaphey kabaan kalaic nina e. Kamei rui nang kai khou bamna kata puanhmei kapui kapu khang bw akhat latlu nina e. Mi tangv tei nang rui kata nang now khang laa nuh the.

¹⁴Katang thangc nang rui kata kahaw dat mak ge thei kamei rui tat nii niimei bamv thangc ti tat dat nuh e. Kata tei zuanc nuh mak ge, bangh ta kumcna ni sw nuh mak ge kalam thu nang rui kata tiluakkeylou tangmei tuang di the.

¹⁵“Meic gaanv khatpu rui nownei kawna khat ta nzian mbumaih khat ta nzian changh mak, gaanv neimei tei nah mpouh gaanv nei puanclou the, tiki nareimei nac mpouh tei nzian changh makmeipui nac the.

¹⁶Kamei rui kanac pang khou katuang lanv nzanhpui ganv khou nareimei tuang dam tei kamei rui nzian dianghmeipui nac mpouh khang tei tiina nchumh makmei taanv taanc nuh mak ge.

¹⁷Nareimei mpouh khang tei thu kamei rui nzian dianghmeipui nac hamh bam sini kadam kanei tii nina de. Kanah mpouh ta tei kalwn thayna kakhang tii nimei dam tei tii nina de.

¹⁸“Thowkumhmei nac mpouh kanu tanhmei cha patna kapui kapu rui riapna ncham bam tisini lat piu mak khe.

¹⁹Kumhmei nac ta tei katuang kaidai tuang kapy nunc bamv khou zay guangna latzan sw nina e.

²⁰Kapui kapu rui latzanpouc nunc khou tei kumna sa nina e, ‘Anei nac mpouh hei meicliam the, anei rui samei piu mak khe. Kamei tutu zangv zangvna zouh mba the.’

²¹Kum e thei mi kaidai tuang mei nunc tei rui mi nac ta tei ntauh nkwamluai nina e. Kumna mi kumhmei simei ti hei swmaan nina e. Hei tei Isaraelmei kathuic rui chu lana ping puni.

²²“Nkhuaimei gaanv khat ta swluaina kapumc tei thaengclou e thei,

²³hei tei zingbangc lou thangc lak nina e. Hei tei katingmik nungc rui mbeih nina e. Kalam thu theihmei pumc thaengclou bammei tei rui mi ramc khou tei Ravguangc tuang syang phungc guang e. RINGHPOUC nangniw Racguangc rui tiiloumei kandic ta tei sw tanac mak khang mi pumc tei mbeih nina e.