Read Rongmei Naga RIAKDANV KALUAIHMEI 22 Bible Online

RIAKDANV KALUAIHMEI 22 - Rongmei Naga bible

RIAKDANV KALUAIHMEI 22

¹“Isaraelmei nchamc tuang guaic hamh e thei lauziu pak duakna tat bammei ta how e thei hei tei mpatlou riu; kakaipouc khou nym guang dat nina e.

²Kakaipouc tei duh thangc bam e thei, hamh e thei kakai thay mak ge thei nang kai thangc laaguang nina e. Kakaipouc rui phu guang dat pw e thei tii dat nina e.

³Kuanniam pwni, pheybaan pwni, baih baihmei Isaraelmei tuang puat guay amaanloumei tuang ariw e thei nkamhlou nuh mak ge.

⁴“Isaraelmei tuang kuanniam hamh e thei guaih bowkeylou bammei ta ariw e thei, zay thaulou dat nina e.

⁵“Ntumei rui nggaanvmei tuang pheybaan piu lak nina e, nggaanvmei ni ntumei pheybaan piu lak nina e; mi kumhmei nunc ta tei RINGHPOUC rui karaeng e.

⁶“Nruayna kaduy naina pwni, kanac naina pwni kabou khou kakui dungc bammei ta ariw e thei nangniw mi nruayna kui ta tei laa nuh mak ge.

⁷Nangniw kanac nunc ta tei thu laa nuh e tiki kakui ta tei thu mpatlou nina e. Kum sw e thei nangniw amanvna panty lungsingna lungc puni.

⁸“Nangniw kaithanh sw pwkhou kainam tin khou karaengv lou nina e. Kum pwkhou thowkumhmei taek keyna theic sini hei tei nang manv hamh the.

⁹“Drakha lau khou nap lingc nuh mak ge; lingc kariulou e thei drakhathai tei ni nap tei ni nang tu nuh mak khe.

¹⁰“Guaituamchic lev kuanniam ta guaihphu tiphungc kariu nuh mak ge.

¹¹“Ramhhiw langc lev linen langc dak kariumei pheybaan piu nuh mak ge.

¹²“Nangniw tuang pheytin padeih khou pheyphaanthai lou nina e.

¹³“Nggaanvmei gaanv khat rui tunac gaanv khat ta kaw the kumna katangv thangc kamei rui mipui ta tei kahaw dat mak khe.

¹⁴Kumna kaney lungc kariu pwkhou mipui tei liuchang hamh e twmei thay the twna saraamcna mipui ruc khou tei lat phungc ku the.

¹⁵“Mi kumhmei tuang hei pat re thei, ntumei puipu tei rui nowsuanhlou nungc tuang zei swloumei zybamphey tei kaidai tuang peikai khou tei kapy nunc khou guang lyan nina e.

¹⁶Ntumei pu tei rui kumna sa nina e, ‘Ai rui anac aluhpui ta mipu now khang hei tiilou tiki ntaw kamei rui kata laa dat zih the.

¹⁷Kamei kata kaw khou anac aluhpui hei liuchang hamh the twna saraamcna nkhamh the. Anac aluhpui hei liuchang de twmei mi hei rui lyan the; nowsuanhlou nungc zybamv khou naimei zei hei zauc tho!’ kumna zybamv phey tei laamv ntyngpat nina e.

¹⁸Khoutei kaidai tuang kapy nunc tei rui kagaanv ta tei nym lana bai nina e.

¹⁹Kata tei daandi paek 100 tikhap nina e. Mi syan tei ntumeipu khang tei tii nina e, kalam thu mipu tei rui Isaraelmei tunac akhat ta tizaklou the. Kumlana mipui tei kanow sw bam nina e. Kumna kamei ringc bam saanv kanow tei mu nuh mak ge.

²⁰“Tiki kagaanv rui samei tei nchumhna, ntumei tei liuchang de twmei tuang nchin nuhmei tuang ramh maek ge thei thu

²¹kaniw rui kata tei kapu kai kaimun daeng khou laaguangna nggaanvmei guay rui khou tei kata ntauh kwamluai nina e. Kalam thu kamei mih makna kapu kai khou bam khou rui nggaanvmei ta thaylouna Isaraelmei pang khou zakmei taanv taanclou the. Heikumhmei simei ti hei swmaan nina e.

²²“Nggaanvmei gaanv khat rui meickai now khou tatlouna bam khou baanhtyang sin e thei, kaney gaanv nei ta tei swluai nina e. Heikumhmei simei ta tei kumna swmaan nina e.

²³“Meic akhat khang thanvloumei tunac akhat khou tatlouna bam khou nym e thei,

²⁴kaney ta tei kaidai paengc thangc zay patna ntauh kwamluai nina e. Tunacpui tei ni theic nina e kalam thu kakhwan meic chu nuhmei khou kaidai lungc khou tei bam lana kauh makmei zaeng rui e. Nggaanvmei tei ni theic nina e, kalam thu meickai now khang thanvloumei ta kamei rui sw kasicloupui zaeng rui e. Mi kumhmei simei ti hei swmaan nina e.

²⁵“Nggaanvmei gaanv khat rui nwmbangc khou meickai khang thanvloumei tunac akhat ta nym e thei, nggaanvmei ta na swluai nina e.

²⁶Ntumei ta thu ramh sw nuh mak ge, kalam thu kamei thei biuhmei paap taanh mak ge. Mi latbamv hei nggaanv gaanv khat rui gaanv khat ta akwamna swluaimei latbamv lev nchamc e.

²⁷Mipu rui nymmei tei nwmbangc timei zaeng rui mipui tei rui kauc bam tisini meic nkhavlou nimei maek ge.

²⁸“Meic khang thanvlou makmei tunac akhat ta nggaanvmei gaanv khat rui nym bam khou ariw e thei,

²⁹kamei tei nowpeic manv daandi paek 50 ntumei pu khang tii nina e, kumna kamei rui mipui ta tei kaw nina e, kalam thu kamei rui mipui ta tei nymna tatlou tang the. Kamei ringh saanv mipui ta tei mu dat nuh mak khe.

³⁰“Meic gaanv khat na sini kapu now khou tatlouna kapu ta tizak nuh mak ge.